ޕާޓީގެ ރައީސްކަމުގައި ޝާހިދު ހުންނަވައިގެން ގައުމާއި ރައްޔިތުންނަށް އަގުހުރި މަސައްކަތްތަކެއް ކުރައްވާނެކަމުގެ ޔަގީންކަން އެބައޮތް: ރައީސް ޞާލިޙު

މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ރައީސްކަމަށް ކުރީގެ ފޮރިން މިނިސްޓަރު ޢަބްދުﷲ ޝާހިދު ހޮވިވަޑައިގަތުމާ ގުޅިގެން، އެމަނިކުފާނަށް އެމްޑީޕީގެ ކުރީގެ ރައީސް، ރައީސް އިބްރާހީމް މުޙައްމަދު ޞާލިޙު ތަހުނިޔާއާއި މުބާރިކުބާދީ ފޮނުއްވައިފިއެވެ.

އެމްޑީޕީގެ ރައީސްކަމަށް ޝާހިދު ހޮވިވަޑައިގަތީ، އެމްޑީޕީގެ ރައީސްކަމަށް ކުރިމަތިލުމަށް ހުޅުވާލި މުއްދަތު ހަމަވިއިރު އެމަގާމަށް ކުރިމަތިލެއްވީ ހަމައެކަނި ޝާހިދު ކަމަށް ވުމުންނެވެ. އެމްޑީޕީގެ ރައީސްކަމަށް ޝާހިދު ހޮވިވަޑައިގަތުމުން ރައީސް ޞާލިޙު އެކްސްގައި ކުރެއްވި ޕޯސްޓެއްގައި ވިދާޅުވީ، ޕާޓީގެ ރައީސްކަމުގެ މަގާމުގައި ހުންނަވައިގެން ގައުމާއި ރައްޔިތުންނަށް އަގުހުރި މަސައްކަތްތަކެއް ޝާހިދު ކޮށްދެވާނެކަމުގެ ފުރިހަމަ އިތުބާރާއި ޔަގީންކަން އެމަނިކުފާނަށް އެބައޮތްކަމަށެވެ.

އެމްޑީޕީގެ ރައީސްކަމަށް ހޮވިވަޑައިގަތުމުން ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސްކަމުގެ ޒިންމާއާ ހަވާލުވެވަޑައިގަންނަވަނީ ޕާޓީގެ މެމްބަރުންގެ ފުރިހަމަ އިތުބާރާއެކު، އާ ބާރެއްގައި އެމްޑީޕީ ކުރިޔަށް ގެންދަވަންކަމަށެވެ. އަދި ދިވެހި ގައުމާއި ދިވެހި ރައްޔިތުންގެ އުންމީދުތަކަށް އެމްޑީޕީ ކާމިޔާބު ހޯދާނެކަމަށް ޝާހިދު ވިދާޅުވިއެވެ.

ޝާހިދު އެމްޑީޕީއާ ގުޅިވަޑައިގަތީ ކުރީގެ ރައީސް މުޙައްމަދު ނަޝީދުގެ ވެރިކަމުގައެވެ. އެމަނިކުފާނަކީ މިހާރު ވެސް އެމްޑީޕީގެ އިސް ސަފުގައި މަަސައްކަތް ކުރައްވާ ބޭފުޅެކެވެ. ޝާހިދު ވަނީ މީގެ ކުރިން ރައްޔިތުންގެ މަޖިލީހުގެ ރައީސްގެ މަގާމާއި ރައްޔިތުންގެ މަޖިލީހާއި ޚާއްޞަ މަޖިލީހުގެ މެންބަރުކަން ވެސް ކުރައްވާފައެވެ. އަދި މީގެ ކުރިން އެމްޑީޕީގެ ސަރުކާރުގައި ވަޒީރުކަން ކުރެއްވުމުގެ އިތުރުން، އދ.ގެ އާންމު މަޖިލީހުގެ ރައީސްކަން ވެސް ވަނީ ކުރައްވާފައެވެ.

އެމްޑީޕީގެ ރައީސްގެ މަގާމު ހުސްވެފައިވަނީ ކުރިން އެ މަގާމުގައި ހުންނެވި ރައީސް މުޙައްމަދު ނަޝީދު މިދިޔަ އަހަރުގެ ޖޫން 21 ވަނަ ދުވަހު މަގާމުން އިސްތިއުފާދެއްވާފައި ވާތީއެވެ. އެމްޑީޕީގެ ރައީސްގެ ޒިންމާ ވަގުތީގޮތުން މިހާތަނަށް އުފުއްލަވަމުން ގެންދެވީ ކުރީގެ ރައީސް އިބްރާހީމް މުޙައްމަދު ޞާލިޙެވެ.