މިހާރު ފެންނަމުންދަނީ އަދުގެ ސަރުކާރު ވެރިކަމަށް އައިއިރު ވީ ވައުދުތަކާއި، ރައްޔިތުންނަށް ހެދި ދޮގުތައް ވެރިކަމަށް އައުމަށްފަހުވެސް ތަކުރާރު ކުރަމުންދާ މަންޒަރުކަމަށް ކުރީގެ ރައީސް އިބްރާހީމް މުޙައްމަދު ސާލިޙު ވިދާޅުވެއްޖެއެވެ.

ކުރިއަށް އޮތް މަޖިލިސް އިންތިޚާބުގައި ހިންނަވަރު ދާއިރާއަށް އެމްޑީޕީން ވާދަ ކުރައްވާ ޖީހާން މަހުމޫދުގެ ކެމްޕޭނު ޙަރަކާތެއްގައި ވާހަކަ ދައްކަވަމުން ކުރީގެ ރައީސް ސާލިޙު ވިދާޅުވީ، ކުރިއަށް އޮތް ރައްޔިތުންގެ މަޖިލީހަކީވެސް ބުރަ މަސައްކަތްތަކެއް ކުރަން ޖެހޭނެ މަޖިލީހެއް ކަމަށެވެ. އެގޮތުން ޤައުމު މިއަދު މި ދަނީ ރަނގަޅު މިސްރާބަކަށް ނޫންކަމަށާއި ލޯ މަރާލައިގެން ހުރެވޭކަށް ނެތްކަމަށް ސާލިޙު ވިދާޅުވިއެވެ.

ސާލިޙު ވިދާޅުވީ، މިއަދުގެ ސަރުކާރުން ވެރިކަމަށް އައިއިރު ވީ ވައުދުތަކާއި، ރައްޔިތުންނަށް ހެދި ދޮގުތައް ވެރިކަމަށް އައުމަށްފަހުވެސް ތަކުރާރު ކުރަމުންދާ މަންޒަރު ފެންނަމުންދާކަމަށެވެ.

ސާލިޙު ވިދާޅުވީ، މިފަދަ ދަނޑިވަޅެއްގައި ކެރިގެން ރައްޔިތުންގެ ވިސްނުމާއެކު މަސައްކަތް ކުރާނެ ބަޔަކު މަޖިލީހަށް ބޭނުންވާކަމަށެވެ.

އަދި މަޖިލީހުގެ އަޣުލަބިއްޔަތު ލިބުމުން، އެންމެ ފުރަތަމަ އަމާޒަކީވެސް މި ސަރުކާރު ހަމަ މަގަށް އަޅުވައި، އިތުރުފުޅު ނުހެއްދެވުމަށް ރައީސް ޑރ މުޙައްމަދު މުއިއްޒު އަރިހުން އެދިލެއްވުންކަން ވެސް ފާހަގަ ކުރެއްވިއެވެ.

ޖީހާނަކީ އެފަދަ ކެންޑިޑޭޓެއްކަން ފާހަގަ ކުރައްވައި ސާލިޙު ވަނީ ޓީމެއްގެ ގޮތުގައި ނުކުމެ، ހިންނަވަރު ދާއިރާގެ ގޮނޑި އެމްޑީޕީއަަށް ކާމިޔާބު ކޮށްދިނުމަށް އެދިވަޑައިގެންފައެވެ.

ކުރީގެ ރައީސް ސާލިޙު ވަނީ ޤައުމީ ވިސްނުމެއްގައި، ޕާޓީގެ ރޫޙުގައި ނުކުމެ މަސައްކަތް ކުރުމަށް ވެސް އިލްތިމާސް ކުރައްވާފައެވެ.