މާލެ ސިޓީގެ މަގުތަކުގެ ކާނުތައް ކުރިއަށް އޮތް އަހަރުގެ ތެރޭގައި ސާފުކޮށް ނިންމުމަށް ވަނީ އަމާޒުހިފާފައި: އާޒިމް

މާލެ ސިޓީގެ މަގުތަކުގެ ކާނުތައް ކުރިއަށް އޮތް އަހަރުގެ ތެރޭގައި ސާފުކޮށް ނިންމުމަށް އަމާޒު ހިފާފައިވާކަމަށް، މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

މާލެ ސިޓީއަށް ކުޑަކޮށް ވާރޭ ވެހުނު ނަމަވެސް ފެންބޮޑުވެ، ގޯތިގެދޮރަށް ފެން ވަންނަ މައްސަލަ ވަނީ ބޮޑުވެފައެވެ. މި މައްސަލައާ ގުޅިގެން އާއްމު ރައްޔިތުންގެ ޝަކުވާ ވެސް ވަނީ ބޮޑުވެފައެވެ. އެގޮތުން މާލެ ސިޓީގެ މަގުތަކުގެ ކާނުތައް ސާފު ނުކުރާކަމުގެ ޝަކުވާ ލިބިފައިވެއެވެ.

މި މައްސަލައާ ގުޅޭގޮތުން ރާއްޖެޓީވީގެ ފަށާއިރު ޕްރޮގްރާމްގައި އާޒިމް ވިދާޅުވީ، ކާނުތައް ސާފުކުރުމުގެ މަސައްކަތް އެންމެ އެދެވޭ ގޮތުގައި ކުރިއަށްނުދާކަމަށާއި، އެ މަސައްކަތް ކުރަން މިވަގުތު ތިބީ 5 މުވައްޒަފުން ކަމަށެވެ. އަދި އެ މަސައްކަތް ކުރުމަށް ބޭނުންވާ ރަނގަޅު އާލާތްތައް ވެސް ނެތްކަމަށް އާޒިމް ވިދާޅުވިއެވެ.

އާޒިމް ވިދާޅުވީ މި މަސައްކަތް ކުރުމަށް ކުރިއަށް އޮތްތަނުގައި ޕްލޭނެއް އެކުލަވާލައި، އަމަަލީ މަސައްކަތް ފެށިގެންދާނެ ކަމަށާއި، އަމާޒަކީ އަހަރެއްގެ ތެރޭގައި މާލެ ސިޓީގެ ހުރިހާ މަގެއްގެ ކާނުތަކާއި، ކާނުތަކާ ގުޅިފައިވާ ހޮޅިތައް ސާފު ކުރުން ކަމަށެވެ.

އާޒިމް ވިދާޅުވީ މާލެ ސިޓީ ސާފު ތަނަކަށް ހައްދަވާނެ ކަމަށާއި، ރައްޔިތުން އެދޭފަދަ ރީތި މަގުތަކެއް ހޯއްދަވައިދެއްވާނެ ކަމަށެވެ.

އެގޮތުން ކުރިއަށް އޮތް ތަނުގައި ސިޓީ ކައުންސިލުން ކުރަންޖެހޭ މަސައްކަތްތަކަށް ފޯކަސްކޮށްގެން ވަރަށް ބޮޑަށް މަސައްކަތްތައް ކުރިއަށް ގެންދާނެކަމުގެ ޔަގީންކަން އާޒިމް ދެއްވިއެވެ.