ޣައްޒާގައި މަރުވި ގިނަ މީހުންނަކީ ކުށެއް ނެތް އާންމުން: ބައިޑެން

ފަލަސްތީނުގެ ޣައްޒާގައި އިސްރާއީލުން ދޭ ހަމަލާތަކުގައި މަރުވި ގިނަ މީހުންނަކީ ކުށެއް ނެތް އާންމުން ކަމުގައި އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ.

"މި ހަމަނުޖެހުންތަކުގައި މަރުވި ފަލަސްތީނުގެ 28،000 އަށް ވުރެ ގިނަ މީހުންގެ ތެރެއިން ގިނަ މީހުންނަކީ ކުށެއް ނެތް އާންމުން ކަމަށާއި އޭގެ ތެރޭގައި އެތައް ހާސް ކުޑަކުދިން ވެސް ހިމެނޭ،" އުރުދުންގެ ރަސްގެފާނު އަބްދުالله ދެވަނައާ އެކު ވައިޓް ހައުސްގައި ބޭއްވި ޖޮއިންޓް ޕްރެސް ކޮންފަރެންސްގައި ބައިޑެން ވިދާޅުވިއެވެ.

ބައިޑެން އިތުރަށް ވިދާޅުވީ އެތައް ލައްކަ ބަޔަކަށް ކާބޯތަކެއްޗާއި ފެނާއި އެހެނިހެން އަސާސީ ހިދުމަތްތައް ނުލިބޭ ކަމަށާއި އެތައް އާއިލާއަކަށް ގެއްލުނީ އެކަކު ނޫން ކަމަށާއި އެތައް ގާތް ތިމާގެ ބަޔަކު ވެސް ގެއްލިފައިވާ ކަމަށެވެ.

އެ ބައްދަލުކުރެއްވުމުގައި ދެއްކެވި ވާހަކަފުޅުގައި ބައިޑެން ވިދާޅުވީ ޣައްޒާއިން ގެއްލުނު ކޮންމެ ކުށެއް ނެތް ފުރާނައަކީ ހިތާމަވެރި ހާދިސާއެއްކަމާއި އަދި އިސްރާއީލުގައި ގެއްލުނު ކޮންމެ ކުށެއް ނެތް ފުރާނައަކީ ވެސް ހިތާމަވެރި ހާދިސާއެއް ކަމަށެވެ.

އިސްރާއީލާއި ފަލަސްތީނުގެ ކުށެއްނެތް ރައްޔިތުންގެ ތެރެއިން ފުރާނަ ގެއްލުނު މީހުންނަށާއި އެ އާއިލާތަކަށް ހެޔޮ ދުއާ ކުރާ ކަމަށް ވެސް އޭނާ ވިދާޅުވިއެވެ.

ބައިޑެން އިތުރަށް ވިދާޅުވީ އިސްރާއީލާއި ފަލަސްތީނުގެ ހަމާސް ޖަމާއަތާ ދެމެދު ސުލުޙަ ޤާއިމުކުރުމުގެ އެއްބަސްވުމެއް އެކުލަވާލުމުގެ މަސައްކަތް އެމެރިކާއިން ކުރަމުން އަންނަ ކަމަށާއި، އެ އެއްބަސްވުމުގެ ސަބަބުން މަދުވެގެން ހަ ހަފުތާވަންދެން ހަމަލާ ބަދަލުކުރުން ހުއްޓިގެންދާނެ ކަމަށެވެ. އަދި އެ އެއްބަސްވުން އިތުރަށް ދެމެހެއްޓެނިވި ގޮތެއްގައި ބިނާކުރުމަށް ވަގުތު ނަގާނެ ކަމަށެވެ.

ރަފަޙްގައި އަސްކަރީ ބޮޑު އޮޕަރޭޝަނެއް އިސްރާއީލުން ކުރިއަށް ގެންދަން އުޅެނީ "އެތަނުގައި ހިމާޔަތް ހޯދާ އެއް މިލިއަނަށް ވުރެ ގިނަ މީހުންގެ ސަލާމަތާއި އެހީތެރިކަން ކަށަވަރު ކުރުމަށް އިތުބާރު ކުރެވޭ ޕްލޭނެއް ނެތި" ކަމަށް ވިދާޅުވެ އެމެރިކާގެ ކުރީގެ ގޮވާލުންތައް ތަކުރާރު ކުރެއްވިއެވެ.

އަދި ހަމަނުޖެހުންތަކުން ފިލަން ދިއުމުން ފަލަސްތީނުގެ އެތައްބަޔަކު ގެދޮރު ގެއްލިފައިވާއިރު، އެހުރިހާ އެންމެން ރަފަޙްގައި ތިބިކަން ފައިވާކަން ފާހަގަކުރައްވައި ބައިޑެން ވިދާޅުވީ އެމީހުންނަށް ހިމާޔަތް ދޭން ޖެހޭ ކަމަށެވެ.

އެ ބައްދަލުކުރެއްވުމުގައި އުރުދުންގެ ރަސްގެފާނު އަބްދުالله ދެވަނަ ވެސް ވަނީ ރަފަޙްއަށް ހަމަލާދިނުމަށް އިސްރާއީލުން ރާވަމުންދާތީ ކަންބޮޑުވުން ފާޅުކުރައްވައިފައެވެ. އޭނާ ވިދާޅުވީ "އެކަމުގެ ސަބަބުން އިތުރު އިންސާނީ ކާރިސާއެއް އުފެދިގެން ދާނެކަން ޔަގީން" ކަމަށެވެ.

އަދި ޣައްޒާއަށް ވަދެވޭ ހުރިހާ ޕޮއިންޓްތަކަކާއި މެކޭނިޒަމްތަކެއް މެދުވެރިކޮށް ދެމެހެއްޓެނިވި ގޮތެއްގައި އެހީތެރިކަން ފޯރުކޮށްދިނުމަށް އަވަސް އަދި ވަގުތުން މަސައްކަތް ކުރަން ޖެހޭ ކަމަށްވެސް އޭނާ ވިދާޅުވިއެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވަނީ ހަނގުރާމައިން ހިމާޔަތް ހޯދަމުން އަންނަ 1.4 މިލިއަނަށް ވުރެ ގިނަ މީހުން ދިރިއުޅޭ ރަފަޙްއިން އާންމުން ނެރެ، ބާކީ ތިބި ހަމާސްގެ މުޖާހިދުން ބަލިކުރުމަށް ދެވަނަ ޕްލޭނެއް އެކުލަވާލުމަށް އަސްކަރިއްޔާއަށް އަންގަވާފައެވެ.

އޮކްޓޯބަރު 7 ވަނަ ދުވަހުން ފެށިގެން އިސްރާއީލުން އިން ޣައްޒާގައި ހިންގަމުންދާ ގަތުލުއާއްމުގައި 28،340 މީހުން މިހާތަނަށް ޝާހީދުވެފައިވާއިރު، ލައްކައެއްހާ މީހުންވަނީ ޒަޚަމްވެފައެވެ. އަދި އެ ސަރަހައްދުގެ އާބާދީގެ 85 އިންސައްތަ މީހުން ކާބޯތަކެއްޗާއި ސާފު ފެނާއި ބޭހަށްޖެހި، ގެދޮރު ގެއްލިފައިވާއިރު، އެންކްލޭވްގެ އުމްރާނީ ވަސީލަތްތަކުގެ 60 އިންސައްތަ ވަނީ ހަލާކުވެ ނުވަތަ ބޭނުން ނކުރެވޭވަރުވެފައި ކަމަށް އދއިން ބުނެއެވެ.

މިދިޔަ ޖެނުއަރީ މަހު ބައިނަލްއަގުވާމީ ކޯޓުން ނެރުނު ވަގުތީ ހުކުމުގައި ވަނީ އިސްރާއީލުގެ ސަރުކާރުން ޖިނާއީ އަމަލުތައް ހުއްޓާލުމަށާއި ޣައްޒާގައި ދިރިއުޅޭ އާންމުންނަށް އިންސާނީ އެހީތެރިކަން ފޯރުކޮށްދޭނެ ކަމުގެ ޔަގީންކަން ދިނުމަށް ފިޔަވަޅުތައް އެޅުމަށް އަމުރުކޮށްފައެވެ.