ކަސްޓަމްސްގެ އޮޕަރޭޝަންތަކުގައި އާޓިފިޝަލް އިންޓެލިޖެންސް ބޭނުންކުރަން ފަށާފައިވާކަމަށް އެސިސްޓެންޓް ކޮމިޝަނަރ އިސްމާއިލް ހަމްދޫން ވިދާޅުވެއްޖެއެވެ.
ހޯމަ ދުވަހު އޮތް ނޫސްވެރިންގެ ބައްދަލުވުމުގައި ކަސްޓަމްގެ ފަރާތުން އެސިސްޓެންޓް ކޮމިޝަނަރ އިސްމާއިލް ހަމްދޫން ވިދާޅުވީ، ރައީސްގެ ވެރިކަމުގެ ފުރަތަމަ 14 ހަފްތާގެ މަގުޗާޓުގައި ހިމެނޭ މުހިއްމު މަސައްކަތްތަކެއް ކުރެވެމުންދާ ކަމަށާއި، މުހިއްމު ލަނޑުދަނޑިތަކެއް ޙާސިލު ކުރެވިފައިވާ ކަމަށެވެ.
އެގޮތުން ކަސްޓަމްސްގެ އޮޕަރޭޝަންތަކުގައި އާޓިފިޝަލް އިންޓެލިޖެންސް ބޭނުންކުރަން ފަށާފައިވާކަމަށް އޭނާ ވިދާޅުވިއެވެ.
މިއީ އިމްޕޯޓް އެކްސްޕޯޓު ޚިދުމަތަށް ލުއިފަސޭހަވެެގެންދާނެ އަދި މުދާ ކްލިއަރ ކުރުމަށް އިތުރަށް ފަސޭހަވެގެންދާނެ ކަމެއްކަމަށް އޭނާ ވިދާޅުވިއެވެ.
މި ބައްދަލުވުމުގައި ހަމްދޫން ވަނީ ކަސްޓަމްސްގެ ޚިދުމަތްތައް ފުޅާކުރުމަށް ކުރިއަށް ރާވާފައިވާ ބައެއް ކަންކަމަށްވެސް އަލިއަޅުވާލައްވާފައެވެ. އޭގެ ތެރޭގައި ބައެއް ޚިދުމަތްތަކުގައި ހިމެނޭ ކަންކަން އޮންލައިން ކުރުންވެސް ހިމެނެއެވެ.
މި ކަންކަމަކީ ޚިދުމަތް ހޯދާ ފަރާތްތަކަށް ލުއިފަސޭހަވެގެންދާނެ ކަމެއްކަން އޭނާ ފާހަގަ ކުރެއްވިއެވެ.
ހަމްދޫން ވިދާޅުވީ، ކަސްޓަމްސްއިން އަބަދުވެސް ދެމި އޮންނާނީ ރައްޔިތުންނަށް ދޭންޖެހޭ ޚިދުމަތްތައް ޒަމާނާ އެއްގޮތަށް، އެންމެ ފުރިހަމައަށް ދިނުމުގެ އަމާޒުގައި ކަމަށެވެ.
