ސްޕެނިޝް ލީގުގައި ގްރަނަޑާއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބާސެލޯނާ އެއްވަރުވެއްޖެ އެވެ.

ލީގުގައި އާދިއްތަ ދުވަހުގެ ރޭ ކުޅުނު މެޗު ނިމުނީ ދެ ޓީމު 3-3 އިން އެއްވަރުވެގެންނެވެ. މެޗުން މޮޅުވެ ފަރަގު ކުޑަ ކުރުމުގެ ފުރުސަތު ބާސެލޯނާ އަށް އޮތް ނަމަވެސް، އެއްވަރުވުމާއެކު ލީގު ރޭހުގައި ވަނީ ފަހަތަށް ޖެހިލައިފަ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ބާސެލޯނާ އިންނެވެ. މެެޗު ފަށައިގެން 14 ވަނަ މިނެޓުގައި އެ ޓީމަށް ލީޑު ނަގައިދިނީ ޒުވާން ކުޅުންތެރިޔާ ލަމިން ޔަމާލް އެވެ. އޭނާ އެ ލަނޑު ޖެހީ ޔާއޯ ކަންސޭލޯ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން ފުރަތަމަ ހާފު ނިމުމުގެ ކުރިން ގްރަނަޑާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ރިކާޑް ސަންޗޭޒް އެވެ.

ދެ ވަނަ ހާފުގައި ގްރަނަޑާ އިން ލީޑު ނެގީ ފަކުންޑޯ ފެލިސްޓްރީ ޖެހި ލަނޑުންނެވެ. ގްރަނަޑާ އިން ލީޑު ނެގީތާ ތިން މިނެޓު ފަހުން، ބާސެލޯނާ އަށް ނަތީޖާ ހަމަހަމަ ކޮށްދިނީ ރޮބާޓް ލެވަންޑޯސްކީ އެވެ. ނަމަވެސް ނަތީޖާ ހަމަހަވެފައި އޮތީ ތިން މިނެޓަށެވެ. އިގްނާސީ މިކޭލް ވަނީ ލަނޑު ޖަހައި ގްރަނަޑާ އަށް ލީޑު ނަގައިދީފަ އެވެ. މެޗުން ބާސެލޯނާ ސަލާމަތްކޮށްދިނީ 80 ވަނަ މިނެޓުގައި ޔަމާލް ލަނޑު ޖަހައިގެންނެވެ.

ނަތީޖާ އާއެކު ބާސެލޯނާ އޮތީ ލީގު ތާވަލްގެ ތިން ވަނައިގަ އެވެ. އެއީ މިހާތަނަށް ކުޅުނު 24 މެޗުން 51 ޕޮއިންޓާއެކު އެވެ. އެއް ވަނައިގައި އޮތް ރެއާލް މެޑްރިޑާއި ބާސެލޯނާއާ ދެމެދު މިހާރު އޮތީ 10 ޕޮއިންޓުގެ ފަރަގެކެވެ.