18 ޓަޗް، އެއް ހަމަލާ، ކޭން އުޅުނީ ގްރޭޑް 6ގެ ކުއްޖެއްހެން!

ޖަރުމަނު ލީގުގައި ރޭ ބަޔާން ލެވަކޫސަން އަތުން 3-0އިން ބަޔާން މިއުނިކް ބަލިވި މެޗަށް ފަހު އިނގިރޭސި ކެޕްޓަން ހެރީކޭން އަށް ވަރަށް ބޮޑަށް ފާޑުކިއުން އަމާޒުވެއްޖެ އެވެ.

ޖަރުމަނުގެ ނޫސްތަކުން ބުނަނީ މި ސީޒަނު ފެށުމުގެ ކުރިން 100 މިލިއަން ޔޫރޯ އަށް ބަޔާންއަށް ގެނައި ފޯވަޑް ރޭގެ މެޗުގައި އުޅުނީ ގްރޭޑް 6ގެ ކުއްޖަކު އުޅޭހެން ކަމަށެވެ.

އިތުރަށް ބައެއް މީޑިއާތަކުން ބުނެފައިވަނީ ބޮޑުއަގުގައި ކޭން ބަޔާން އަށް ގެނައީ ބުންޑަސްލީގާގެ ތަށި ހޯދަން ކަމަށާއި ބޯޅަ ނުކުޅޭ ތަނެއްގައި ވެސް އޭނާއަށް އެންމެ ގިނަ ގޯލު ޖަހާ ކުޅުންތެރިޔާ އަށް ދޭ ރަންބޫޓު ހޯދިދާނެ ކަމަށެވެ. މި ގޮތަށް ބުނެފައިވަނީ ލީގުގައި އެންމެ ގިނަ ގޯލު ޖަހާ ކުޅުންތެރިޔާގެ ރަންބޫޓަށް ވާދަކުރާ ލިސްޓުގެ ކުރީގައި 24 ގޯލު ޖަހައިގެން އޭނާ ހުރުމުންނެވެ.

މެޗަށް ފަހު ކޭން ވެސް ވަނީ އޭނާ އާއި މުޅި ޓީމަށް ވެސް ރޭގެ މެޗުގައި ނުކުޅެވުނު ކަމަށް އެއްބަސްވެފަ އެވެ.

މިވާހަކަ އަށް ތަޖުރިބާކާރު ފޯވަޑް ތޯމަސް މުލާ ވެސް އެއްބަސްވި އެވެ. ނަމަވެސް އޭނާ ބުނީ ޕްރެޝަރު ބޮޑުވިޔަސް ޓީމުގެ ކުޅުން މާބޮޑަށް ދަށް ކަމަށެވެ.

ކޭން ބުނީ ފަސް ޕޮއިންޓްގެ ލީޑެއް ލެވަކޫސަން އަށް ލިބުނަސް ލީގުގައި އަދި ގިނަ އަދަދެއްގެ މެޗުތައް ހުރުމުން ތައްޓާމެދު އުއްމީދު ކަނޑާނުލާ ކަމަށެވެ.