ކަންކަން ކުރުމުގައި ތަރުތީބެއް އޮންނަން ޖެހޭ، އެއް ފަހަރާ ހުރިހާ ކަމެއް ނުފެށޭނެކަން ގަބޫލުކުރަން ޖެހޭނެ - ރައީސް
8 ފެބުރުއަރީ 2024 | ބުރާސްފަތި 08:52އެ ރަށު ކައުންސިލްގެ ފަރާތުން ވަނީ އެ ރަށަށް ބޭނުންވާ ކަންކަން ވަރަށް ތަފްސީލްކޮށް ރައީސާއި ހިއްސާކުރައްވާފައި
ރައީސް ޑރ.މުއިއްޒު ތ.އަތޮޅަށް ކުރައްވާ ދަތުރުފުޅުގެ ތެރެއިން
ކަންކަން ކުރުމުގައި ތަރުތީބެއް އޮންނަން ޖެހޭ ކަމަށާއި އެއް ފަހަރާ ހުރިހާ ކަމެއް ނުފެށޭނެކަން ގަބޫލުކުރަން ޖެހޭނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ތ. އޮމަދޫ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ.
އެ ރަށު ކައުންސިލްގެ ފަރާތުން ވަނީ އެ ރަށަށް ބޭނުންވާ ކަންކަން ވަރަށް ތަފްސީލްކޮށް ރައީސާއި ހިއްސާކުރައްވާފައެވެ. އަދި އެ ހުރިހާ ކަމަކަށް ވެސް ސަރުކާރުން އެއްބާރުލުން ދޭނެ ކަމަށް ރައީސް ވިދާޅުވިއެވެ. އެހެންނަމަވެސް ކަންކަން ކުރުމުގައި ތަރުތީބެއް އޮންނަން ޖެހޭ ކަމަށާއި އެއް ފަހަރާ ހުރިހާ ކަމެއް ނުފެށޭނެކަމަށް ރައީސް ވިދާޅުވިއެވެ. ރައީސް ވަނީ ކައުންސިލުން ފާހަގަކުރި ކަންކަމަކީ ރާއްޖޭގެ ހުރިހާ ރަށެއްގައިވެސް ފާހަގަވާ ކަންކަން ކަމަށާއި އެއީ ހުރިހާ ރަށެއްގައި ވެސް މިވަގުތު ހުރި މައްސަލަތައް ކަމަށް ވިދާޅުވެފައެވެ. އެގޮތުން ޞިއްޙީ ދާއިރާ، ތަޢުލީމީ ދާއިރާ، ޢުމްރާނީ ތަރައްޤީގެ ދާއިރާ، އިޖުތިމާޢީ އެކިއެކި ދާއިރާތައް އަދި އިޤްތިޞާދީ ދާއިރާގެ މައްސަލަތައް ހުރިކަމަށް ވިދާޅުވިއެވެ.
ރައީސް ވިދާޅުވީ އިޤްތިޞާދު އޮތް ހާލަތުގެ ސަބަބުން ބައެއް ކަންކަން ޖެހެނީ އިސްފަސްކުރަން ކަމަށާއި ކައުންސިލުން ސަރުކާރަށް އެއްބާރުލުންދީ، ކުރިޔަށް މިއޮތް ދެތިން ހަފްތާ ތެރޭގައި ތަރުތީބެއް ކަނޑައެޅުމުން އެ މަގުން ކުރިއަށް ވަޑައިގަންނަވާނެކަމަށް ރައީސް ވިދާޅުވިއެވެ. އަދި ކައުންސިލުން އެންމެ އިސްކަން ދޭން ބޭނުންވާ ކަންކަމަށް ސަރުކާރުން ވެސް އިސްކަން ދޭނެ ކަމަށް ވިދާޅުވިއެވެ.
ރައީސް އިތުރަށް ވިދާޅުވީ އެ ރަށުގެ ސްކޫލްގެ މުޅި މައްސަލަ އެކީ ހައްލުކުރުން އެއީ އެންމެ އިސްކަން ދޭނޭ އެއް ކަމެއް ކަމަށް ހައްދަވާނެ ކަަމަށެވެ. ދެވަނަ ކަމަކަށް ދެން އެންމެ އިސްކަންދޭނީ ފެނާއި ނަރުދަމާ އަށް ކަމަށް ރައީސް ވިދާޅުވިއެވެ.
