ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް މިހާތަނަށް ހުށަހެޅީ 11 ފޯމު
8 ފެބުރުއަރީ 2024 | ބުރާސްފަތި 02:0910 ހުށަހެޅުމެއް އިލެކްޝަންސް ކޮމިޝަނުން ބަލައިގަނެފައިވޭ
ރިޔާސީ އިންތިޚާބު ދާއިމީ ނަތީޖާ އިއުލާންކުރުމަށް ބޭއްވި ނޫސްވެރިންގެ ބައްދަލުވުން
މަރޗް މަހު ބޭއްވުމަށް ތައްޔާރުވަމުން އަންނަ 20 ވަނަ ރައްޔިތުންގެ މަޖިލީހުގެ އިންތިޚާބުގައި ވާދަކުރުމަށް ހުޅުވާލާފައިވާ ފުރުސަތުގައި އަދި މިހާތަނަށް ހުށަހަޅާފައިވަނީ 11 ފޯމު ކަމަށް އިލެކްޝަންސް ކޮމިޝަން(އީސީ)ގެ ނައިބު ރައީސް އިސްމާއީލު ހަބީބު ވިދާޅުވެއްޖެއެވެ.
ރައްޔިތުންގެ މަޖިލީހުގެ އިންތިޚާބްގައި ވާދަކުރުމަށް ބޭނުންވާ ފަރާތްތަކަށް ފޯމު ހުށަހެޅުމަށް އީސީން ހުޅުވާލީ ޖެނުއަރީ 30 ވަނަ ދުވަހުން ފެށިގެން، ފެބުރުއަރީ މަހުގެ 14 ވަނަ ދުވަހާ ހަމަޔަށެވެ. އީސީގެ ނައިބު ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ ހުށަހެޅި ފޯމުތަކުގެ ތެރޭގައި ހިމެނެނީ އަމިއްލަގޮތުން ފޯމު ހުށަހެޅުއްވި 6 ބޭފުޅުން, އެމް.ޑީ.އޭގެ 3 ބޭފުޅުން އަދި ޕީއެންސީ 2 ބޭފުޅުންކަމަށެވެ. މީގެތެރެއިން 10 ހުށަހެޅުމެއް އިލެކްޝަންސް ކޮމިޝަނުން ބަލައިގެންފައިވާކަމަށާއި 1 ހުށަހެޅުން ބަލައިނުގަންނަކަމަށެވެ.
ފޯމު ހުށަހަޅާފައިވަނީ ގަމު ދާއިރާ، ނިލަންދޫ ދާއިރާ، ހިތަދޫ އުތުރު ދާއިރާ، މީދޫ ދާއިރާ، ވެލިދޫ ދާއިރާ، މައްޗަންގޯޅި މެދު ދާއިރާ، ކޮލަމާފުށި ދާއިރާ، ބާރަށު ދާއިރާ، ވެލިދޫ ދާއިރާ އަދި ހޮޅުދޫ ދާއިރާއަށެވެ. މީގެތެރެއިން ވެލިދޫ ދާއިރާ އާއި ހިތަދޫ އުތުރު ދާއިރާއަށް ދެ ފޯމު ވަނީ ހުށަހަޅާފައެވެ.
20 ވަނަ ރައްޔިތުންގެ މަޖިލީހުގައި 93 ދާއިރާއަކަށް މެމްބަރުން އިންތިޚާބުކުރެއެވެ. ކޮމިޝަނުން މައުލޫމާތު ދޭ ގޮތުގައި އެޕްލިކޭޝަން ފޯމު ދޫކުރުމާއި ބަލައިގަތުން އޮންނާނީ ހެނދުނު9:00ން މެންދުރުފަހު2:00ށް ދަރުބާރުގޭގެ ރަންނަބަނޑޭރި މާލަމުގައެވެ. ހުކުރު ދުވަހު އެޕްލިކޭޝަން ފޯމު ދޫކުރުމާއި ބަލައިގަތުން އޮންނާނީ މެންދުރުފަހު2:00ން ހަވީރު4:00އަށެވެ.
އިލެކްޝަންސް ކޮމިޝަނުން ބުނީ، ފައިސާ ބަލައިގަންނާނީ ހަމައެކަނި ޕީއޯއެސް މެޝިން ބޭނުންކޮށްގެން ކޭޝް ކާޑުން ކަމަށާއި، ނަގުދު ފައިސާ ބަލައި ނުގަންނާނެ ކަމަށެވެ.
ރައްޔިތުންގެ މަޖިލީހުގެ އިންތިޚާބަށް ވާދަކުރާނެ ކެންޑިޑޭޓުން ހޯދުމަށް ވެރިކަންކުރާ މައި ޕާޓީ ޕީޕީއެމް/ޕީއެންސީ ކޯލިޝަނުން ޕްރައިމަރީ ބާއްވާފައިވާއިރު އެމްޑީޕީ އާއި ޑިމޮކްރެޓްސް އިންވެސް ވަނީ ޕްރައިމަރީ ބާއްވާފައެވެ.
