އެފްއޭއެމް ކޮންގްރެސް އަށް ފީފާ އާއި އޭއެފްސީގެ އޮފިޝަލުން އަންނަނީ
ފީފާ، އޭއެފްސީން ބައިވެރިވާ ގޮތަށް ހަމަޖެއްސީ ވަރަށް ބޮޑަށް ބައިބައިވެފައިވަނިކޮށް
އެފްއޭއެމްގެ ރައީސް ބައްސާމް، ފީފާގެ ރައީސް އަދި އޭއެފްސީގެ ރައީސާއެކު
މާދަމާ ބާއްވަން ހަމަޖައްސާފައިވާ ފުޓްބޯޅަ އެސޯސިއޭޝަން އޮފް މޯލްޑިވްސްގެ އެކްސްޓްރާ އޯޑިނަރީ ކޮންގްރެސް އަށް ފީފާ އާއި އޭއެފްސީގެ އޮފިޝަލުން އަންނަ ގޮތަށް ހަމަޖެހިއްޖެ އެވެ.
ދުނިޔޭގެ ފުޓްބޯޅަ ޖަމިއްޔާ (ފީފާ) އާއި އޭޝިޔާގެ ފުޓްބޯޅަ ޖަމިއްޔާ (އޭއެފްސީ)ގެ އޮފިޝަލުން މި ކޮންގްރެސްގައި ބައިވެރިވާ ގޮތަށް ހަމަޖެއްސީ ވަރަށް ބޮޑަށް ބައިބައިވެފައިވަނިކޮށެވެ. ފީފާ އާއި އޭއެފްސީގެ އޮފިޝަލުން ރާއްޖެ ވަޑައިގަންނަވާނީ މިރޭގެ ވަގުތެއްގަ އެވެ.
އިންތިހާބުގައި ވޯޓުލެވޭ އެއްބައި ކުލަބުތަކުން ބޭނުންވަނީ އޮންލައިންކޮށް އިންތިހާބު ނުބޭއްވުމަށެވެ. އެފްއޭއެމުން މިކަން ފަހު ވަގުތު ބަދަލުކުރީ އޭއެފްސީ ފީފާގައި ބައެއް ކުލަބުތަކުން މައްސަލަ ޖައްސާފައިވަނިކޮށެވެ.
އެފްއޭއެމް އެކްސްޓްރާ އޯޑިނަރީ ކޮންގްރެސް ބާއްވަން ޖެހުނީ އެއިދާރާގެ އިންތިހާބު އިއުލާނުކުރިއިރު އިލެކްޓޯރަލް އަދި އެޕީލްސް ކޮމިޓީއެއް ނެތުމުންނެވެ. މިކަން އެނގުނި ކެނޑިޑޭޓް އަހުމަދު ތޯރިގްގެ ކެންޑިޑެސީ ބާތިލް ކުރުމުން އޭނާ އެ މައްސަލަ އެޕީލް ކުރުމުންނެވެ.
އެފްއޭމުގެ އިންތިހާބުގައި މި ފަހަރު ރައީސް ބައްސާމް އަދީލް ޖަލީލް ވާދަނުކުރައްވަ އެވެ. މިދިޔަ އަށް އަހަރު އެފްއޭއެމުގައި ހުރި ރައީސް ބައްސާމް ވާދަނުކުރައްވަން ނިންމީ އެފްއޭއެމް ހިންގުން ބޮއްސުންލައި، މުވައްޒަފުންނަށް މުސާރަ ނުދެވި، ފައިސާއަށް ހިޔާނާތްވި ކަމުގެ ތުހުމަތުގައި ދައުވާކުރަން ފޮނުވާފައިވަނިކޮށެވެ. އަދި އެފްއޭއެމުގެ ފައިސާގެ ތަހުގީގެއް ފީފާ އާއި އޭއެފްސީން ފަށާފައިވަނިކޮށެވެ.
