ރާއްޖޭގައި ކުޅިވަރު ކުޅޭ ބޮޑެތި ކުލަބުތައް މާލީ އަނދަވަޅު ސަލާމަތްކޮށް، ކުރިއަރާނެ މަގުތައް ފަހި ކޮށްދެއްވާނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙާއްމަދު މުޢިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ، ރައްޔިތުންގެ މަޖިލިސް ހުޅުވައި ދެއްވުމުގެ ގޮތުން، ހޯމަ ދުވަހު އިއްވެވި ރިޔާސީ ބަޔާނުގަ އެވެ. ރައީސް ވިދާޅުވީ ކުލަބުތަކަށް މާލީ ގޮތުން އެހީތެރިވެދެއްވާ، ކުރިއެރުވުމަށް މަސައްކަތް ކުރައްވަނެ ކަމަށެވެ. ހަމައެހެންމެ، ދިވެހި ކުޅުންތެރިންނަށް ތަމުރީނު އަދި އާމްދަނީގެ ފުރުސަތު އިތުރު ކުރަން ޖެހޭ ކަމަށާއި، އެ ހުރިހާ ކަމެއްގައި ވެސް ދިވެހި ކުޅުންތެރިންގެ އަޑު އައްސަވާ، ކުޅިވަރު ކުރިއެރުވުމަށް ސަރުކާރުން އެއްބާރުލުން ދެއްވާނެ ކަމުގައި ވެސް ރައީސް ވަނީ ވިދާޅުވެފަ އެވެ.
މީގެ އިތުރުން ރައީސް ވިދާޅުވީ، ދިވެހި ފުޓުބޯޅަ މިއަދު އޮތީ ވަރަށް ދުވަހަކު ނުދާ ދަށަށް ގޮސްފައި ކަމަށެވެ. އެގޮތުން ސަރަހައްދީ މުބާރާތްތަކުގައި ދުވަހަކު ނުދާހާ ދަށަށް ރާއްޖެ ގޮސްފައިވާ ކަމަށާއި، ކުޅުންތެރިންނަށް އިތުރު ތަމްރީނާއި އާމްދަނީގެ ފުރުސަތު ވެސް ބަންދުވެފައިވާ ކަމަށް ރައީސް ވަނީ ވިދާޅުވެފަ އެވެ. އެއީ ހިތާމަ ހުރި ކަމެއް ކަމަށާއި، މިއަހަރުގެ ތެރޭގައި ކުޅިވަރުގެ އެސޯސިއޭޝަންތަކަށް ކުރިއެރުމާއި، ހަރަކާތްތެރިކަން އަންނާނެ މަގުތައް ސަރުކާރުން ފަހި ކޮށްދެއްވާނެ ކަމުގައި ވެސް ރައީސް ވިދާޅުވި އެވެ.
ކުޅިވަރުގެ ބޮޑެތި ކުލަބުތައް މާލީ އަނދަވަޅުތަކުން ސަލާމަތްކޮށް، ކުރިއަރާނެ ގޮތްތައް ފަހި ކުރަން އެބަޖެހޭ. އަދި ކުޅުންތެރިންނަށް ތަމްރީނާއި، އާމްދަނީގެ ފުރުސަތު އިތުރު ކޮށްދޭން ޖެހޭ. މި ހުރިހާ ކަމެއްގައި ވެސް ދިވެހި ހުރިހާ އެތުލީޓުންނާއި، ކުޅުންތެރިންގެ އަޑު އަހައިގެން ކުޅިވަރު ކުރިއެރުވުމަށް ސަރުކާރުން ފުރިހަމަ އަށް އެއްބާރުލުން ދޭނެ ކަމުގެ ޔަގީންކަން އަޅުގަނޑު ދެން.ރައީސުލްޖުމްހޫރިއްޔާ ޑޮކްޓަރ މުޙާއްމަދު މުޢިއްޒު
ރިޔާސީ ބަޔާނުގައި ރައީސް ވަނީ ކުޅިވަރުގެ ބައެއް ވަސީލަތްތައް ޤާއިމު ކުރުމަށް ވެސް އަލި އަޅުއްވާލައްވައިފަ އެވެ. އެގޮތުން ފުރަތަމަ ފަހަރަށް ރާއްޖޭގައި މަލްޓިސްޓޯރީ ފުޓްސަލް ކޮމްޕްލެކްސް އަކާއި، ނެޓުބޯޅަ ކޮމްޕްލެކްސް އެއް ޤާއިމު ކުރުމަށް، ހުޅުމާލެ އިން މިހާރު ދެ ބިމެއް ކަނޑަައަޅުއްވާފައިވާނެ ކަމުގައި ރައީސް ވިދާޅުވި އެވެ. ރައީސް ވިދާޅުވީ، ރާއްޖޭގެ ބިމުގެ ޖާގައަށް ބަލާއިރު، ކުޅިވަރުގެ ކުރިއެރުވުމަށް، ފަންގިފިލާތަކަށް ހެދިފައިވާ ކުޅިވަރު ކުޅޭ ތަންތަން ޤާއިމު ކުރަން ޖެހޭ ކަމަށެވެ.
ކުޅިވަރަށް ޚާއްސަ ސަމާލުކަމެއް ދިނުމުގެ ގޮތުން މި ސަރުކާރުން ވަނީ، ކުޅިވަރަށް ޚާއްސަ ވުޒާރާ އަށް އުފައްދައިފަ އެވެ. ކުޅިވަރާއި ހަށިހެޔޮކަމާ ބެހޭ ވުޒާރާ އުފައްދަވައި، އެ ވުޒާރާ ހިންގުން ހަވާލު ކުރައްވާފައި ވަނީ، ކުޅިވަރުގެ ޚިދުމަތްތެރިޔާ ޢަބްދުﷲ ރާފިއު (ރާއްޕެ)އާ އެވެ. ރިޔާސީ ބަޔާނުގަައި ރައީސް ވަނީ، އެ ވުޒާރާ ވަކިން އުފައްދަވައި، ޙާސިލު ކުރަން ބޭނުންވާ ކަންކަމަށް ވެސް އަލި އަޅުއްވާލައްވައިފަ އެވެ.
