ސިޔާސީ އިސް މަގާމުތަކަށް އިތުރަށް މީހުން އައްޔަނު ނުކުރަން ނިންމައިފިން: ރައީސް
5 ފެބުރުއަރީ 2024 | ހޯމަ 04:55މިއީ ވެރިކަމުގައި އެންމެ ކުރު މުއްދަތެއްގައި އެންމެ ގިނަ ސިޔާސީ މަގާމު އުފެއްދި ސަރުކާރު
ރިޔާސީ ބަޔާން އިއްވުމަށް ބޭއްވި ޖަލްސާގެ ތެރެއިން
ސިޔާސީ އިސް މަގާމުތަކަށް އިތުރަށް މީހުން އައްޔަނު ނުކުރަން ނިންމަވާފައިވާކަމަށް ރައީސް ޑރ މުޙައްމަދު މުއިއްޒު ވިދާޅުވެއްޖެއެވެ.
ރިޔާސީ ބަޔާން އިއްވަވަމުން ރައީސް ވިދާޅުވީ، ސަރުކާރުގެ ހަރަދުތައް ކުޑަކުރުމުގެ ގޮތުން ފިޔަވަޅުތަކެއް އަޅަންޖެހިފައިވާކަމަށެވެ.
ރައީސް ވިދާޅުވީ، އިސްތިސްނާ ހާލަތްތައް ފިޔަވައި ސިޔާސީ އިސް މަގާމުތަކަށް މީހުން އިތުރަށް އައްޔަނު ނުކުރަައްވަން އެމަނިކުފާނު ނިންމަވާފައިވާކަމަށެވެ.
މި ސަރުކާރުގެ ސިޔާސީ މަގާމުތަކުގެ ތެރެއިން ރައީސް އޮފީހުގެ ސައިޓުން އަދި ހާމަކޮށްފައިވާ މައުލޫމާތުތަކަށް ބަލާއިރު، ކެބިނެޓްގައި ރައީސް އަދި ނައިބްރައީސްގެ އިތުރުން 22 ވަޒީރުން ހިމެނެއެވެ. ސީނިއަރ މިނިސްޓަރުންގެ ގޮތުގައި ޢަބްދުއްރަޙީމް ޢަބްދުﷲ އައްޔަން ކުރައްވާފައިވެއެވެ.
މިނިސްޓަރުންގެ ފެންވަރުގެ ބޭފުޅުންގެ ގޮތުގައި 12 ބޭފުޅުން ރައީސް އޮފީހަށް އައްޔަނުކުރައްވާފައިވާއިރު، މިނިސްޓްރީތަކާއި އިދާރާތަކަށް 8 ބޭފުޅަކު ވަނީ މިނިސްޓަރުންގެ ފެންވަރުގައި އައްޔަނުކުރައްވާފައެވެ. މިއީ ރައީސް އޮފީހުގެ ވެބްސައިޓުގައިވާ މައުލޫމާތެވެ. މީގެ އިތުރުންވެސް އެކިއެކި ކުންފުނިތަކާއި ތަންތަނަށް މިނިސްޓަރުންގެ ފެންވަރުގައި ވަނީ އެތައް ބަޔަކު އައްޔަނުކޮށްފައެވެ. އެގޮތުން ހަމައެކަނި ސްޓޭޓް މިނިސްޓަރުންގެ އަދަދުވެސް 100 އާ ގާތްކުރެއެވެ.
މިނިސްޓަރުންގެ ނައިބުންގެ ގޮތުގައި ރައީސުލްޖުމްހޫރިއްޔާގެ އޮފީހުގައި 9 ބޭފުޅަކު އެބަތިއްބެވެ. އަދި މިނިސްޓްރީތަކާއި އިދާރާތަކަށް 150ށް ވުރެ ގިނަ ނައިބުން ވަނީ އައްޔަނުކުރައްވާފައެވެ.
މީގެ އިތުރުން ކުންފުނިތަކުގެ މެނޭޖިންގ ޑިރެކްޓަރުންނާއި، ޑެޕިއުޓީ މެނޭޖިންގ ޑިރެކްޓަރުންނާއި، ސިޔާސީ މަގާމުތައް ސަރުކާރުން ހާމައެއް ނުކުރެއެވެ. މީގެ އިތުރުން ރާއްޖެއިން ބޭރުގަ ހުރި މިޝަންތަކަށް އައްޔަނު ކުރަމުންދާ ސިޔާސީ މުވައްޒަފުންނާއި އަދި މިނިސްޓްރީތަކަށް ވައްދަމުންދާ އެހެނިހެން ސިޔާސީ މުވައްޒަފުންނާއި ކުންފުނިތަކަށް ވައްދަމުންދާ ސިޔާސީ މުވައްޒަފުން ވެސް ސަރުކާރުން ސާފުކޮށްދީފައި ނުވެއެވެ.
މިއީ ވެރިކަމުގައި އެންމެ ކުރު މުއްދަތެއްގައި އެންމެ ގިނަ ސިޔާސީ މަގާމު އުފެއްދި ސަރުކާރެވެ.
