އެއްބަސްވެފައިވަނީ 10 މެއިގެ ނިޔަލަށް ރާއްޖޭގައި ތިބި ހުރިހާ އިންޑިއާ ސިފައިން އަނބުރާ ގެންދިއުމަށް - ރައީސް މުއިއްޒު
އިންޑިއާ ސިފައިން ރާއްޖެއިން ބޭލުމުގެ މަސައްކަތް ކުރަމުންދަނީ ޑިޕްލޮމެޓިކް އުސޫލުން ކަމަށް ރައީސް ވިދާޅުވި
ރައީސް ޑރ.މުހައްމަދު މުއިއްޒު ރިޔާސީ ބަޔާން އިއްވަވަނީ
އެއްބަސްވެފައި ވަނީ 10 މޭއިގެ ނިޔަލަށް ރާއްޖޭގައި ތިބި ހުރިހާ އިންޑިއާ ސިފައިން އަނބުރާ ގެންދިއުމަށް ކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
ހޯމަ ދުވަހު ރިޔާސީބަޔާން އިއްވަވަމުން، އެންމެ ބޮޑު ވައުދަކީ ދިވެހިންގެ މިނިވަންކަމާއި އަމިއްލަވަންތަކަން ހިމާޔަތްކޮށްދޭނެކަމުގެ ވައުދުކަމަށް ރައީސް ވިދާޅުވިއެވެ. ރާއްޖޭގައި ތިބި ބޭރުގެ ސިފައިން ރާއްޖެއިން ފޮނުވާލުމާއި، ރާއްޖޭގެ ކަނޑުން ގެއްލުނުބައި ހޯދުމާއި، ރާއްޖޭގެ ސިޔާދަތަށް އުނިކަން އައިސްދާނެ އެއްބަސްވުންތައް ނިމުމަކަށް ގެނައުމަކީ އެ މަނިކުފާނަށް އާއްމުން ވޯޓުދިން ސަބަބުކަމަށް ވެސް ރައީސް ވަނީ ވިދާޅުވެފައެވެ. އެ މަސައްކަތް ވެރިކަމަށް ވަޑައިގަތުމަށް ފަހު ކުރައްވަމުންދާ ކަމަށް ޑރ.މުއިއްޒު ވިދާޅުވިއެވެ.
އެގޮތުން ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމުގެ މަސައްކަތް ކުރަމުންދާ ކަމަށާއި އެކަން ކުރަނީ ޑިޕްލޮމެޓިކް އުުސޫލުތަކުގެ ދަށުން މަޝްވަރާކޮށްގެން ކަމަށް ރައީސް މުއިއްޒު ވިދާޅުވިއެވެ. އެންމެ ފަހުގެ މަޝްވަރާތަކުން އެއްބަސްވެފައި ވަނީ ރާއްޖޭގައި އިންޑިއާ ސިފައިން ތިބި އޭވިއޭޝަން 3 ޕްލެޓްފޯމުގެ ތެރެއިން ފުރަތަމަ ޕްލެޓްފޯމްގައި ތިބި ސިފައިން 10 މަރޗް 2024ގެ ކުރިން އަނބުރާ ގެންދިއުމަށް ކަމަށް ރައީސް ވިދާޅުވިއެވެ. އަދި ބާކީ 2 ޕްލެޓްފޯމުން 10 މޭއި 2024ގެ ކުރިން މިލިޓަރީ ފަރާތްތައް ގެންދާނެ ކަމަށް ރައީސް ވިދާޅުވިއެވެ.
މީގެ އިތުރުން ރާއްޖެ ދިފާއުކުރުމަށް އިތުރު ވަސީލަތްތައް އިތުރުކުރަން ޖެހޭ ކަމަށް ރައީސް ވަނީ ވިދާޅުވެފައެވެ. އެގޮތުން އެއްގަމާއި ކަނޑާއި ވައިގެ މަގުން ރާއްޖެ ދިފާއުކުރުމުގެ ޤާބިލްކަން އިތުރުކުރަން ޖެހޭ ކަމަށް ރައީސް ވިދާޅުވިއެވެ.
