މިދިޔަ އަހަރުގެ ފަހުކޮޅުން ފެށިގެން މިއަހަރުގެ މިހާތަނަށް ގާތްގަނޑަކަށް 27 މިލިއަން ރުފިޔާ ގެއްލިފައިވޭ، ހޯދިފައިވަނީ މިލިއަނެއްހާ ރުފިޔާ: ފުލުހުން
ސްކޭމްގެ ކަންކަން ކުރިއަށް ގެންދަނީ ވަރަށް ބޮޑަށް ރޭވިގެން ސިއްރިއްޔާތުގައި
ފުލުހެއް އާއްމު ރައްޔިތުންނަށް މައުލޫމާތު ދިނުމުގައި ހަރަކާތްތެރިވަނީ - ފައިލް ފޮޓޯ
މިދިޔަ އަހަރުގެ ފަހުކޮޅުން ފެށިގެން މިއަހަރުގެ މިހާތަނަށް ގާތްގަނޑަކަށް 27 މިލިއަން ރުފިޔާ ގެއްލިފައިވާ ކަމަށާއި، ހޯދިފައިވަނީ މިލިއަނެއްގެހާ ރުފިޔާ ކަމަށް ފުލުހުން ބުނެފިއެވެ.
ފުލުހުންގެ މަސައްކަތްތަކާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި އެކްޓިން ހެޑް އޮފް ކްރައިމް އިންވެސްޓިގޭޝަން ކޮމާންޑް ޗީފް ސުޕްރިޓެންޑެންޓް އޮފް ޕޮލިސް އަހުމަދު ނާފިޒު ވިދާޅުވީ ސްކޭމްގެ މައްސަލަތައް ރާއްޖޭގައި އިތުރު ކަމަށާއި، މިމައްސަލައަށް ސަމާލުވާންޖެހޭ ކަމަށެވެ.
ނާފިޒު ވިދާޅުވީ ސްކޭމްގެ ކަންކަން ކުރިއަށް ގެންދަނީ ވަރަށް ބޮޑަށް ރޭވިގެން ސިއްރިއްޔާތުގައި ކަމަށާއި، މިމައްސަލަތަކުގައި އެންމެ ފުނާހަމައަށް ދިއުމަކީ ވަރަށް އުދަނގޫ ބޮޑު މަސައްކަތެއް ކަމަށެވެ. މީޑިއާގެ އެކިއެކި ވަސީލަތްތައް ފުޅާވެފައިވާ މިޒަމާނުގައި, ގިނަ ދަތިތަކާއި ކުރިމަތިލާން ޖެހުނު ނަމަވެސް ރައްޔިތުންގެ އަތުން ގެއްލޭ ފައިސާ ހޯދުމުގެ މަސައްކަތް ކުރަމުންދާ ކަމަށް އޭނާ ވިދާޅުވިއެވެ.
ނާފިޒު ވިދާޅުވީ ރިކޯޑުތަކުން ދައްކާގޮތުގައި މިހާތަނަށް ގާތްގަނޑަކަށް ސްކޭމްގެ މައްސަލަތަކުގައި ރައްޔިތުންގެ އަތުން 57 މިލިއަން ރުފިޔާ ގެއްލިފައިވާ ކަމަށެވެ. އަދި މިދިޔަ އަހަރުގެ ފަހުކޮޅުން ފެށިގެން މިއަހަރުގެ މިހާތަނަށް ގާތްގަނޑަކަށް 27 މިލިއަން ރުފިޔާ ގެއްލިފައިވާ ކަމަށާއި، މި 27 މިލިއަން ރުފިޔާގެ ތެރެއިން ހޯދިފައިވަނީ މިލިއަނެއްހާ ރުފިޔާ ކަމަށް ނާފިޒު ވިދާޅުވިއެވެ.
ސްކޭމްގެ ރިކޯޑުތައް ފުލުހުން ބަލަހައްޓަން ފަށާފައިވަނީ 2021 ވަނަ އަހަރުގެ ތެރޭގައެވެ.
