ޗައިނާގެ އިތުރު ރިސާޗް އުޅަނދެއް ރާއްޖެ ސަރަޙައްދުގައި، އެއީ ޗައިނާގެ އެންމެ ޒަމާނީ އެއް ރިސާޗް އުޅަނދު
ޒިގްޒެގްކޮށް މެދު ކެނޑުމެއްނެތި މި ބޯޓް ރާއްޖޭގެ ޚާއްސަ އިޤްތިސާދީ ސަރަޙައްދު ކައިރީގައި ދުއްވަމުންދޭ
ލެން ހައި 101 (LAN HAI 101)
ޗައިނާގެ އެންމެ ބޮޑު އެއް ރިސާޗް އުޅަނދު ރާއްޖެ ސަރަޙައްދުގައި ޙަރަކާތްތެރިވަމުންދާކަމަށް ބޭރުގެ ބައެއް ނޫސްތަކުން ރިޕޯޓު ކޮށްފިއެވެ.
ޗައިނާގެ އިތުރު ޖާސޫސީ މަނަވަރެއް ރާއްޖޭގެ ހުޅަނގު އުތުރުން އިހަވަންދިއްޕޮޅާ ދިމާލުން ބޭރުގައި ރާއްޖެ ކައިރީގައި ޙަރަކާތްތެރި ވަމުންދާކަމަށް އިންޑިއާގެ ބައެއް ނޫސްތަކުންވެސް ވަނީ ރިޕޯޓު ކޮށްފައެވެ.
އިންޑިއާގެ ނޫސްތަކުން ރިޕޯޓު ކޮށްފައިވާ ގޮތުގައި ލެން ހައި 101 (LAN HAI 101) ކިޔާ މިއުޅަނދަކީ 3000ޓަނުގެ 85 މީޓަރ ހުންނަ އެންމެ ޒަމާނީ ވަސީލަތްތައް ހިމެނޭ ޗައިނާގެ އެންމެ ބޮޑު ޖާސޫސީ އެއް މަނަވަރެވެ.
އަދި ޒިގްޒެގްކޮށް މެދު ކެނޑުމެއްނެތި މި ބޯޓް ރާއްޖޭގެ ޚާއްސަ އިޤްތިސާދީ ސަރަޙައްދު ކައިރީގައި ދުއްވަމުންދާކަމަށްވެސް ރިޕޯޓު ކޮށްފައިވެއެވެ.
އިންޑިއާއިން ވަނީ މި އުޅަނދުގެ ޙަރަކާތްތައް ގާތުން ބަލަމުންދާކަމަށް ބުނެފައެވެ. އެ ބޯޓު ހަރަކާތްތެރިވަމުންދަނީ "ލައިވް ޓްރެކިން ސިގްނަލް" ނިއްވާލައިގެންކަމަށް ބެލެވޭކަމަށްވެސް އިންޑިއާގެ ބައެއް ނޫސްތަކުން ރިޕޯޓުކޮށްފައިވެއެވެ.
މި އުޅަނދު ލޯންޗުކުރިއިރު ޗައިނާގެ ފިޝަރީޒް އެކަޑަމީން ބުނެފައިވަނީ މިއީ މިހާތަނަށް ޗައިނާއިން ޤާއިމުކުރާ އެންމެ ޒަމާނީ އަދި އެންމެ ބޮޑު ރިސާޗު އުޅަނދުކަަމަށެވެ.
ޗައިނާގެ އެންމެ ބޮޑު އެއް ރިސާޗް އުޅަނދު ރާއްޖެ ސަރަަޙައްދުގައި ޙަރަކާތްތެރިވަމުންދާކަމުގެ ރިޕޯޓުތައް ލިބެމުންދާއިރު، ކަނޑު ދިރާސާކުރާ ޗައިނާގެ އުޅަނދު، "ޒިއަންގް ޔެންގް ހޮންގް 3" ރާއްޖޭގެ އިގްތިސާދީ ސަރަހައްދުގެ ތެރޭގައި ވެސް ހަރަކާތްތެރިވި ކަމަށާއި، އެ ބޯޓު ހަރަކާތްތެރިވަމުންދަނީ "ލައިވް ޓްރެކިން ސިގްނަލް" ނިއްވާލައިގެންކަން ވަނީ ހާމަވެފައެވެ.
ދެކުނު ޗައިނާ ކަނޑުގެ ޝިއާމެންގެ އައްސޭރިފަށުގައި އޮވެފައި، ކްރޫއިންނާއި ކޮއްތު އައު ކުރުމަށް ކަމަށް ބުނެ މި މަހުގެ އަށްވަނަ ދުވަހު މާލެއަށް ބަނދަރުކުރަން ނިންމާފައިވާ މި ބޯޓަކީ ޒަމާނީ އެންމެ ފަހުގެ ވަސީލަތްތައް ހިމެނޭ ގޮތަށް ކަނޑުގެ ސަތަހައިން ފެށިގެން ހުރިހާ މައުލޫމާތެއް ބޯޓުގައި ތިބެގެން ނެގޭ ވަރުގެ ގާބިިލުކަން ހުރި ބޯޓެކެވެ.
އެގޮތުން މި ބޯޓުގެ ދަތުރުގެ މޫވްމަންޓް ހުރިގޮތް ފާހަގަ ކުރަމުން ބޭރުގެ ބައެއް ނޫސްތަކުން ރިޕޯޓްކޮށްފައިވާ ގޮތުން، 30 ޖެނުއަރީން ފެށިގެން މި ބޯޓު ގެންދަނީ ރާއްޖޭގެ އިރުމަތީ ބިތުގައި އުތުރަށް އަދި ދެކުނަށް ގިނަ ބުރުތަކެއް އަޅަމުންނެވެ.
އެގޮތުން އެ ބުރުތަކުގެ ތެރެއިން ބައެއް ސަރަހައްދުތަކުން އެ ބޯޓު އޮތް ހިސާބު ނޭނގޭ ގޮތަށް، ރިއަލް ޓައިމް ލޮކޭޝަން ވެސް އޮފްކޮށްގެން އެ ބޯޓު މަސައްކަތް ކުރާ ކަމަށް ބޭރުގެ ބައެއް ނޫސްތަކުން ރިޕޯޓްކޮށްފައިވެއެވެ.
