ހުޅުމާލެ ފޭސް 1ގެ ސޯޝަލް ހައުސިންގ ޔުނިޓްތަކުގެ ކުލިން 20 އިންސައްތަ ކުޑަކުރުމަށް ނިންމާފައިވާކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފިއެވެ.

މިއީ ރައީސް ޑރ މުހައްމަދު މުއިއްޒުގެ ސަރުކާރުގެ ހަފްތާ 14 ގައި ހިމެނޭ ކަމެކެވެ. އެޗްޑީސީން ބުނީ މި ޑިސްކައުންޓް ދެވިގެންދާނީ ފެބްރުއަރީ މަހުގެ 1 ގައި އިންސްޓޯލްމަންޓްގެ ގޮތުގައި ދައްކަންޖެހޭ ކަމަށް ކަނޑައަޅާފައިވާ އަދަދުން، 20 އިންސައްތަ އުނިވާގޮތަށް ކުރިޔަށް އޮތްތަނުގައި ހިނގާ ކޮންމެ މަހަކަށް ކަމަށެވެ. އަދި މި ޑިސްކައުންޓްގައި މެއިންޓެނަންސް ފީ ނުހިމެނޭނެކަމަށް އެޗްޑީސީން ބުނެއެވެ.

މިގޮތަށް ނިންމުމުން، ފްލެޓްތަކުގެ ކުލިން މިހާތަނަށް ނުދައްކާ ހުރި ބައި ދައްކާއިރު 20 އިންސައްތަ އުނިވުމެއް ނާންނާނެ އެވެ.

ރައީސް މުއިއްޒު ނިންމަވާފައި ވަނީ ކުލި ކުޑަކޮށްދިނުމާ އެކު، ނުދައްކާ ހުރި ކުލީގެ ފައިސާ ވެސް ބަހާލައިގެން ދެއްކޭނެ ގޮތް ހަމަޖައްސައިދިނުމަށެވެ. ހުޅުމާލެ ފޭސް 1ގެ ފްލެޓުތަކުގެ ކުލިން 20 އިންސައްތަ ކުޑަކުރުމަށް ނިންމާފައިވާ ކަން ރައީސް އިއުލާންކުރެއްވިއިރު ކުލިން ކަނޑާ 20 އިންސައްތަ ސަރުކާރުން އަމިއްލައަށް މެނޭޖުކުރާނެ ކަމަށް ރައީސް ވަނީ ވިދާޅުވެފައެވެ.