ސްޕެއިންގެ ސެވިއްޔާ އަށް ކުޅެމުން އަންނަ ކްރޮއޭޝިއާގެ މިޑްފީލްޑަރު އިވާން ރަކިޓިޗްގެ އެއްބަސްވުން އެ ކުލަބުން އުވާލައިފި އެވެ.

އުމުރުން 35 އަހަރުގެ ކުޅުންތެރިޔާ ސެވިއްޔާ އަށް ބަދަލުވީ 2020 ވަނަ އަހަރު އެވެ. އެ ކުލަބާއެކު އޭނާ ސޮއި ކުރި ހަތަރު އަހަރު ދުވަހުގެ އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހުގެ ނިޔަލަށެވެ. ނަމަވެސް، އޭގެ ކުރިން ސެވިއްޔާ އިން މިވަނީ އޭނާގެ އެއްބަސްވުން އުވާލައިފަ އެވެ. އެއީ ދެ ފަރާތް ކުރިއަށް ގެންދިޔަ މަޝްވަރާތަކަށްފަހު އެވެ.

ސެވިއްޔާ އިން ރަކިޓިޗްގެ އެއްބަސްވުން އުވާލީ، ސައުދީ ޕްރޯ ލީގުގެ އަލް ޝަބާބަށް އޭނާ ބަދަލުވާށެވެ. އެ ކުލަބަށް ބަދަލުވުމުގެ ކުރިން ފުރިހަމަ ކުރަން ޖެހޭ މެޑިކަލްގެ ފުރަތަމަ ބައިގެ ކަންކަން ރަކިޓިޗް ވަނީ ހޯމަ ދުވަހު ފުރިހަމަ ކޮށްފަ އެވެ. އެއަށްފަހު، އަންނަ ހަފުތާގައި ރަސްމީކޮށް އޭނާ އެ ކުލަބާއެކު އެއްބަސްވުމުގައި ސޮއި ކުރާނެ އެވެ. އަލް ޝަބާބާއެކު ރަކިޓިޗް ސޮއި ކުރާނީ އެއް އަހަރާ ބައިގެ އެއްބަސްވުމެއްގައި ކަމަށް މީޑިއާ ތަކުން ވަނީ ބުނެފަ އެވެ.

ރަކިޓިޗް އެންމެ ބޮޑަށް ފާހަގަކޮށްލެވުނީ ސްޕެއިންގެ ބާސެލޯނާގަ އެވެ. އެ ކުލަބުގައި ހޭދަކުރި ހަ ސީޒަންގެ ތެރޭގައި އޭނާ ވަނީ، ބާސެލޯނާ އަށް 310 މެޗު ކުޅެދީ 36 ލަނޑު ޖަހަައިފަ އެވެ. ބާސެލޯނާ އާއެކު އޭނާ ވަނީ 13 ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު، ސްޕެނިޝް ކަޕް، ސްޕެނިޝް ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަަޕް އަދި ފީފާ ކުލަބު ވޯލްޑް ކަޕް ހިމެނެ އެވެ. ބާސެލޯނާ އަށް ބަދަލުވުމުގެ ކުރިން އޭނާ ކުޅުނީ ވެސް ސެވިއްޔާ އަށެވެ.

ރަކިޓިޗް ވަނީ 2007 ވަނަ އަހަރު ފެށިގެން، 2019 ވަނަ އަަހަރާ ހަމައަށް ކްރޮއޭޝިއާގެ ޤައުމީ ޓީމަށް ވެސް ކުޅެފަ އެވެ. ޤައުމީ ޓީމަށް އޭނާ ވަނީ 106 މެޗު ކުޅެދީ 15 ލަނޑު ޖަހައިފަ އެވެ. ޤައުމީ ޓީމާއެކު އޭނާ ވަނީ 2018 ވަނަ އަހަރު ރަޝިޔާގައި ކުރިއަށް ދިޔަ ފީފާ ވޯލްޑް ކަޕްގެ ފައިނަލްގައި ކުޅެފަ އެވެ.