ޕީޕީއެމް ޕީއެންސީ ޕްރައިމަރީގެ ވޯޓާސް ލިސްޓާ ގުޅޭގޮތުން ޒުވާބާއި ހަމަނުޖެހުން
ބައެއް ވޯޓުފޮށިތައް ކައިރީގައި ހަމަނުޖެހުންތައް ހިނގާފައިވޭ
ޕީޕީއެމް ޕީއެންސީ ޕްރައިމަރީގެ ވޯޓާސް ލިސްޓާ ގުޅޭގޮތުން ޒުވާބާއި ހަމަނުޖެހުން
ޕީޕީއެމް ޕީއެންސީ މަޖިލިސް ޕްރައިމަރީ ހޫނުވެ، ބައެއް ވޯޓުފޮށިތައް ކައިރީގައި ހަމަނުޖެހުންތައް ހިނގައިފިއެވެ.
ބައެއް ވޯޓުފޮށިތައް ކައިރީގައި ހަމަނުޖެހުންތައް ހިނގައިގެން އުޅޭ މަންޒަރުތައް ފެންނަ ވީޑިއޯތަކާއި ފޮޓޯތައް ސޯޝަލް މީޑިއާގައި ދަނީ ދައުރުވަމުންނެވެ. އެގޮތުން ހެންވޭރުގެ ފޮށިތަކުގައި މައްސަލަތައް ގިނަ ކަމަށާއި، ލިސްޓުން ނަން އުނިކުރިކަމަށް ބުނެ ބައެއް ފަރާތްތަކުން ޒުވާބާއި ހަމަނުޖެހުންތައް ހިންގާފައިވާކަމަށް އެކަމުގެ މައުލޫމާތު އެނގޭ ފަރާތްތަކުން ބުނެފައިވެއެވެ.
ބައެއް ވޯޓުފޮށިތައް ހުރި ތަންތަނަށް ފުލުހުން ވަދެ ކޮންޓްރޯލް ކުރަންވެސް ޖެހިފައިވެއެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި މެދު ހެންވޭރު ދާއިރާއަށް ޕީއެންސީގެ ފަރާތުން ވާދަކުރައްވާ ފަރާތަކަށް ގޮނޑި ހޯދައިދިނުމަށް، އެ ދާއިރާގެ ޕްރައިމަރީ ގައި ވޯޓު ލެވޭ މީހުންގެ ލިސްޓުން، އެ ޕާޓީގެ އިދިކޮޅު މެންބަރަށް ތާއީދުކުރާ 300 އަށް ވުރެ ގިނަ އާންމު މެންބަރުން ވެރިކަން ކުރާ ކޯލިޝަނުން އުނިކޮށްފައިވާކަމަށް ބުނާ މައްސަލައެއްވެސް ފެންމަތިވެފައިވެއެވެ.
މިކަން ހިނގިކަން އެނގުނީ، އެ ޕާޓީން ނެރުނު ވޯޓާސް ލިސްޓުން 330 އާންމު މީހަކު މަދުވުމާ ގުޅިގެން، އެ ދާއިރާގެ އާންމު މެންބަރުން ބެލި ބެލުމާ ގުޅިގެންނެވެ. އެގޮތުން "ރާއްޖެ އެމްވީ" އަށް އެނގިފައިވާ ގޮތުގައި، މެދު ހެންވޭރު ދާއިރާގެ ޕްރައިމަރީގައި ވޯޓު ލުމުގެ ހައްގު 985 ފަރާތަކަށް ލިބޭ ކަމަށް ޕީއެންސީން އެންމެ ފުރަތަމަ ނެރުނު ލިސްޓުގައި އޮތް ނަމަވެސް، ބުރާސްފަތި ދުވަހު ޕީއެންސީން އާންމު ކުރި ލިސްޓުގައި އޮތީ 656 މެންބަރެކެވެ. އެއީ އެ ޕާޓީން އެންމެ ފުރަތަމަ އިއުލާން ކުރި ލިސްޓުގައި ހުރި އާންމު މެންބަރުންނަށް ވުރެ 330 އާންމުން މަދު ލިސްޓެކެވެ.
