އަށް އަހަރަށް ފަހު ކްލޮޕް ލިވަޕޫލުން ވަކިވާން ނިންމައިފި

އަށް އަހަރަށް ފަހު ލިވަޕޫލްގެ ކޯޗުކަމުން ޔާގެން ކްލޮޕް ވަކިވާން ނިންމައިފި އެވެ.

އޭނާ ބުނީ މި ސީޒަނަށް ފަހު ކުލަބާ ވަކިވަނީ އަބަދު މަސައްކަތުގައި ނޫޅެވޭނެތީވެ ކަމަށާއި އޭނާގެ ހަކަތަ ހުސްވެއްޖެ ކަމަށެވެ. އޭނާ މިކަން އިއުލާނުކުރި އިރު ލިވަޕޫލް އޮތީ މި ސީޒަނުގެ ޕްރެމިއަ ލީގުގެ އެއްވަނާގަ އެވެ. އަދި ލީގުކަޕް ފައިނަލްގަ އެވެ.

އުމުރުން 56 އަހަރުގެ ކޯޗަކީ ލިވަޕޫލްގެ އެންމެ ކާމިޔާބު އެއް ކޯޗެވެ. 2015 ވަނަ އަހަރު ޓީމާ ހަވާލުވުމަށްފަހު އޭނާ ވަނީ ތިން ފަހަރު ޗެމްޕިއަންސް ލީގު ފައިނަލް ކުޅެ 2019 ވަނަ އަހަރު ތަށި ހޯދައިފަ އެވެ. އަދި 30 އަހަރަށް ފަހު ފުރަތަމަ ފަހަރަށް ލިވަޕޫލަށް ޕްރެމިއާ ލީގު ކާމިޔާބުކޮށްދިނީ ވެސް އޭނާ އެވެ.

ޖަރުމަނުގެ ބޮރޫޝިޔާ ޑޯޓްމުންޑަށް ކޯޗުކޮށްދިން ކްލޮޕް ބުނީ އޭނާ ދެން ވަޒީފާ އަދާކުރާނީ ކޮންތާކުކަން ބުނަންމިވަގުތު ދަތި ކަމަށެވެ. ނަމަވެސް ލިވަޕޫލާ ވާދަވެރި އެހެން އިނގިރޭސި ކުލަބަކަށް އޭނާ ކޯޗުކޮށް ނުދޭނެ ކަމަށް ވެސް ކްލޮޕް ބުންޏެވެ.