ސިޔާސަތަކީ މަގުމައްޗަށް ނުކުތުމެއް ނޫން ނަމަވެސް ޑިމޮކްރަސީގެ ނިޒާމު ފުނޑުފުނޑުކޮށްލާނަމަ މަގުމައްޗަށް ނުކުންނާނަން: ފައްޔާޒު

ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ސިޔާސަތަކީ މަގުމައްޗަށް ނުކުތުން ނޫން ކަމަށާއި، ނަމަވެސް ޑިމޮކްރަސީގެ ނިޒާމު ފުނޑުފުނޑުކޮށްލާ، ރާއްޖެ ބިރުވެރިކަމަކަށް ވައްޓާލާނަމަ މަގުމައްޗަށް ނުކުންނާނެ ކަމަށް އެޕާޓީގެ ޗެއާޕަރސަން ފައްޔާޒު އިސްމާއީލް ވިދާޅުވެއްޖެއެވެ.

އެމްޑީޕީ-ދަ ޑިމޮކްރެޓްސް ގުޅިގެން ބޭއްވި ނޫސްވެރިންގެ ބައްދަލުވުމުގައި ފައްޔާޒު ވިދާޅުވީ އެމްޑީޕީއަކީ މަގުމައްޗަށް ނުކުންނަންޖެހޭ ހާލަތުގައި މަގުމައްޗަށް ނުކުންނާނެ ޕާޓީއެއް ކަމަށެވެ.

ފައްޔާޒު ވިދާޅުވީ މަގު މައްޗަށް ނުކުންނަނީ ނުކުންނަ ހިތްވެގެން ނޫން ކަމަށާއި، އެގޮތަށް އަމަލުކުރަންޖެހެނީ ގައުމުގައި ހިންގާ ބައެއް ކަންކަމުގެ ސަބަބުން ބިރުވެރިކަން ރައްޔިތުންނަށް ކުރިމަތިވުމުން ކަމަށެވެ.

މީގެ އިތުރުން ފައްޔާޒު ވިދާޅުވީ މި ސަރުކާރަށް ޖެއްސުން ކުރަން މަސައްކަތްނުކުރާ ކަމަށާއި، ގައުމު ހިންގުމަށް ފުރުސަތު ދޭން ބޭނުންވާ ކަމަށެވެ. އެމްޑީޕީން ސަރުކާރަށް ބަހެއް ބުނެފައި ހުންނާނީ މާލެސިޓީގެ މޭޔަރުގެ އިންތިޚާބުގެ ކެންޕޭން ތެރޭގައި ކޮންމެހެން ބުނަންޖެހިގެން ކަމަށާއި، ނަމަވެސް ފާއިތުވި ދެ މަސްދުވަހުގެ ތެރޭގައި ސަރުކާރަށް ފާޑުކިޔައި، ބަސް ބުނެފައިނުވާނެ ކަމަށް ފައްޔާޒު ވިދާޅުވިއެވެ.

މީގެއިތުރުން ރައީސް ޑރ.މުހައްމަދު މުއިއްޒުގެ ފޮރިން ޕޮލިސީއަށް އިޝާރާތް ކުރައްވައި ފައްޔާޒު ވިދާޅުވީ ފޮރިން ޕޮލިސީގެ ސިޔާސަތުގެ ސަބަބުން ބިރުވެރި ނާޒުކު ފައްތަރަކަށް ރާއްޖޭގެ އިތުރުން މުޅި ރީޖަން ވެއްޓިގެންދާ ކަމަށެވެ. މި ކަމުގެ ސަބަބުން ނޭދެވޭ އަސަރު މުޅި ގައުމަށް ކުރާނެ ކަމަށް ފައްޔާޒު ވިދާޅުވިއެވެ. އަދި ވިދާޅުވީ ގައުމާއި ރައްޔިތުންނަށް ގެއްލުން ލިބޭ ކަންކަމުގައި ބަލަން ނުތިބޭނެ ކަމަށެވެ.

ފައްޔާޒު ވިދާޅުވީ ގައުމަށް ކުރިމަތިވާ މިފަދަ މައްސަލަތައް ހައްލު ކުރުމުގައި ދެ ޕާޓީން ގުޅިގެން މަސައްކަތް ކުރާނެ ކަމަށެވެ.