ގަވާއިދާއި ޚިލާފަށް ރާއްޖޭގައި ބިދޭސީން ހިންގާ ވިޔަފާރިތައް ހުއްޓުވުމަށް ކުރެވެން ހުރި ހުރިހާ މަސައްކަތެއް ކުރާނެ: ސައީދު
ގަވާއިދާއި ޚިލާފަށް ބިދޭސީން ވިޔަފާރިތައް ހިންގާ މައްސަލައަކީ ބޮޑު މައްސަލައެއް ކަމަށާއި، ސަރުކާރުންވެސް ކަންބޮޑުވާ މައްސަލައެއް ކަމަށް ވަޒީރު ވިދާޅުވި
އިގްތިސާދީ ތަރައްގީ އަދި ވިޔަފާރިއާ ބެހޭ ވަޒީރު މުޙައްމަދު ސައީދު
ގަވާއިދާއި ޚިލާފަށް ރާއްޖޭގައި ބިދޭސީން ހިންގާ ވިޔަފާރިތައް ހުއްޓުވުމަށް ކުރެވެން އޮތް ހުރިހާ މަސައްކަތެއް ކުރާނެ ކަމަށް އިގްތިސާދީ ތަރައްގީ އަދި ވިޔަފާރިއާ ބެހޭ ވަޒީރު މުޙައްމަދު ސައީދު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ އަހާ ފޯރަމްގައި މިނިސްޓަރު ސައީދު ވިދާޅުވީ ގަވާއިދާއި ޚިލާފަށް ބިދޭސީން ވިޔަފާރިތައް ހިންގާ މައްސަލައަކީ ބޮޑު މައްސަލައެއް ކަމަށާއި، ސަރުކާރުންވެސް ކަންބޮޑުވާ މައްސަލައެއް ކަމަށެވެ.
މިނިސްޓަރު ވިދާޅުވީ ވިޔަފާރި ހިންގުމުގެ ހުއްދަ އިކޮނޮމިކް މިނިސްޓްރީން ނުދޭނެ ކަމަށާއި، މާލޭގެ މާރުކޭޓުގައި ބިދޭސީންނަށް ވިޔަފާރި ކުރުމުގެ ހުއްދައެއް މާލެސިޓީ ކައުންސިލުން ނުދޭނެ ކަމަށެވެ. ވިޔަފާރިތައް ހިންގަނީ ދިވެއްސެއްގެ ނަން މަތީގައި ރަޖިސްޓްރީކޮށްގެންކަން ފާހަގަކުރައްވައި މިނިސްޓަރު ވިދާޅުވީ މިފަދަ ހާލަތުގައި އިންސްޕެކްޓް ކުރިނަމަވެސް އެއީ ދިވެއްސެއް ހިންގާ ވިޔަފާރިއެއްކަން ސާބިތުކޮށްދޭ ކަމަށާއި، ބިދޭސީ މީހާއަކީ މުވައްޒަފު މީހާ ކަމަށް އަންގާ ކަމަށެވެ. އެހެންކަމުން މި މައްސަލަ ހައްލު ކުރުމަށް ވެސް ދަތިތަކާއި ކުރިމަތިވާކަން މިނިސްޓަރު ފާހަގަކުރެއްވިއެވެ.
ދަނޑުވެރި ރަށްތަކަށް އިޝާރާތް ކުރައްވައި މިނިސްޓަރު ވިދާޅުވީ ބައެއް ބިދޭސީން އެޑްވާންސްކޮށް ފައިސާ ދެއްކުމަށްފަހު މުދާ ނަގާ ކަމަށާއި، މިކަންކަން ހައްލު ކުރެވޭނީ އެންމެން ގުޅިގެން ކަމަށެވެ.
މީގެ އިތުރުން މިނިސްޓަރު ވިދާޅުވީ މިމައްސަލަ ހައްލު ކުރުމަށް ތަންފީޒީ އިދާރާތަކާއި ގުޅިގެން މަސައްކަތް ކުރާނެ ކަމަށެވެ.
އެގޮތުން ބިދޭސީން ކުރާ ވިޔަފާރިތައް ބަލައި، އެކަމާއި ގުޅޭ މައުލޫމާތު ހިއްސާކުރުމަށް ދިވެހި ފުލުހުންގެ ޚިދުމަތުގައި އެދިފައިވާ ކަމަށެވެ. އެ މައުލޫމާތު ފޯރުކޮށްދިނުމުން އެފަދަ ވިޔަފާރިތަކާމެދު ފިޔަވަޅުއަޅާނެ ކަމުގެ ޔަގީންކަން މިނިސްޓަރު ދެއްވިއެވެ. އަދި ވިދާޅުވީ ރަށްރަށުގައި ގަވާއިދާއި ހިލާފަށް އުޅޭ ބިދޭސީން ދެނެގަތުމަށް ކޮންމެ ރަށެއްގައި ބިދޭސީންގެ ދަފުތަރެއް އެކުލަވައިލުމަށް، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާގައި އެދިފައިވާ ކަމަށެވެ.
