އުނދަގޫ މޮޅަކާއެކު، ބަޔާނަށް ހަމަޖެހުމެއް

ޖަރުމަނު ލީގުގައި ޔޫނިއަން ބާލިންއާ ދެކޮޅަށް ކުޅުނު މެޗުން، އެންމެ ފަހުގެ ޗެމްޕިއަން ބަޔާން މިއުނިކަށް އުނދަގޫ މޮޅެއް ލިބިއްޖެ އެވެ.

ލީގުގައި ބުދަ ދުވަަހުގެ ރޭ، ބަޔާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. އެ މެޗާ ކުރިމަތިލީއިރު ވެސް، ބަޔާން އޮތީ ވަރަށް ބޮޑަށް ޕްރެޝަރުގަ އެވެ. އެއީ ލީގުގައި އެންމެ ފަހުން ވާޑާ ބްރެމަންއާ ދެކޮޅަށް ކުޅުނު މެޗުން ބަލިވެ، ލީގު ރޭހުގައި ފަހަތަށް ސޮއްސާލުމުންނެވެ.

ބާލިންއާ ދެކޮޅަށް ކުޅުނު މެޗުގައި ވެސް ބަޔާނުން ވަނީ ލަނޑު ޖެހުމަށް ގިނަ މަސައްކަތްތަކެއް ކޮށްފަ އެވެ. ނަމަވެސް، ފުރަތަމަ ހާފު ނިންމާލަން ޖެހުނީ ލަނޑެއް ނުޖެހި އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި ބަޔާނުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ރަފައެލް ގުރެއިރޯ އެވެ. އޭގެ ފަހުން ބަޔާނަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ލަނޑެއް ޖެހި ނަމަވެސް، ވީއޭއާރު ބެލުމަށްފަހު ރެފްރީ ނިންމީ އެ ލަނޑު ބަަލައި ނުގަތުމަށެވެ.

މޮޅާއެކު ވެސް ބަޔާން އޮތީ ދެ ވަނައިގަ އެވެ. މިހާތަނަށް ކުޅުނު 18 މެޗުން އެ ޓީމަށް ލިބެނީ 44 ޕޮއިންޓެވެ. އެއް ވަނައިގައި އޮތް ބަޔާ ލެވަކޫސަނާ ދެމެދު މިހާރު އޮތީ ހަތަރު ޕޮއިންޓުގެ ފަރަގެކެވެ. 18 މެޗުން ލެވަކޫސަނަށް ލިބެނީ 48 ޕޮއިންޓެވެ.