ވަޒީރުންނަށް ރުހުން ދިނުމާއި އިތުރު ކަންތައް ހިމެނޭ ގޮތަށް ދައުރުން ބޭރު ޖަލްސާއެއް ބާއްވަން މަސައްކަތް ފަށައިފިއެވެ.

އެމްޑީޕީގެ ޕާލަމެންޓްރީ ގްރޫއްޕުން އެ ގްރޫއްޕުގެ މެންބަރުންނަށް ފޮނުވި މެސެޖެއްގައި ބުނެފައިވަނީ ދައުރުން ބޭރުން ބާއްވާ ޖަލްސާއެއް މި މަހުގެ 28 ވާ އާދީއްތަ ދުވަހު ބޭއްވުމަށް ހަމަޖެހިފައިވާ ކަމަށެވެ. އަދި މެންބަރުން މާލޭގައި ތިބުމަށް ވެސް ވަނީ އެދިފައެވެ.

ޖަލްސާގައި އެޖެންޑާ ކުރަން މަޝްވަރާ ކުރެވިފައި ހުރި ކަންތައްތަކުގެ ތެރޭގައި، ވަޒީރުންނަށް ރުހުން އޮތްތޯ ބެލުމާއި، އިންތިހާބާ ބެހޭ ގާނޫނަށް ގެނައި އިސްލާހު އަދި ވުޒާރާތަކުގެ މެންޑޭޓް އަދި ފުރަތަމަ ކިއުން އިއްވަން ހުރި ބިލް އަދި ގަރާރުގެ މަސައްކަތް ހިމެނެއެވެ.

އިންތިހާބާ ބެހޭ ގާނޫނަށް ގެނައި އިސްލާހަށް ބަލާލާއިރު، މި މައްސަލައަކީ، ރޯދަ މަހުގެ ތެރޭގައި މަޖިލިސް އިންތިހާބު ބާއްވަން ނިންމާފައިވާތީ، ރޯދަ މަހުގެ ތެރޭގައި އިންތިހާބު ނުބޭއްވޭގޮތަށް ހުށަހަޅާފައިވާ އިސްލާހެކެވެ.

މި އިސްލާހުގައި ބުނެފައިވަނީ ރަމަޟާން މަހުގެ ދުވަހެއްގައި އިންތިޚާބެއް ބާއްވާއިގެން ނުވާނެ ކަމަށެވެ. އަދި އިންތިޚާބު ބާއްވަންޖެހޭ ތާރީޚު ރަމަޟާން މަހުގެ ދުވަހަކާ ދިމާވާނަމަ، އެ އިންތިޚާބެއް ބާއްވަންވާނީ ރަމަޟާން މަސް ނިމުމުގެ 10 ދުވަސް ފަހުން ކަމަށެވެ.

މީގެ އިތުރުން ސަރުކާރުން ކޮށްފައިވާ ކަންކަމުގެ ތެރެއިން ކަންބޮޑުވުން ހުރި ކަންކަމާއި، ދާދި ފަހުން ސިއްހީ ފަރުވާ ނުދެވި މާލެ ނުގެނެވިގެން ނިޔާވި ކުއްޖާގެ މައްސަލައިގައި ހުށަހަޅާފައިވާ ގަރާރުވެސް ހިމެނެއެވެ.