އެފްރިކާ ކަޕް ކާމިޔާބުކުރުމަށް މަސައްކަތް ކުރަމުން އަންނަ މިސުރުގެ ކީޕަރު މުހައްމަދު އަލް ޝަނާވީގެ ކޮނޑުހުޅު ނެއްޓިއްޖެއެވެ.
މި އަނިޔާގެ ސަބަބުން އޭނާއަށް މުބާރާތުގައި ދެން އިތުރު މެޗެއް ނުކުޅެވޭނެ ކަމަށް މިސުރުގެ ފުޓްބޯޅަ ފެޑަރޭޝަނުން ވަނީ ބުނެފައެވެ. ޝަނާވީ ފަރުވާއަަށް ފޮނުވީ ޖަރުމަނަށެވެ. އެއީ ޚާއްސަ ޑޮކްޓަރެއްގެ ލަފާގެ މަތިން ކޮނޑަށް ފަރުވާ ކުރުމަށެވެ.
އޭނާއަށް އަނިޔާވީ ހޯމަ ދުވަހުގެ ރޭ ކޭޕް ވާޑޭއާ ވާދަކޮށް، މިސުރު 2-2ން އެއްވަރުވި މެޗުގައެވެ.
ކީޕަރަށް އަނިޔާވީ މިސުރުގެ ކެޕްޓަން އަދި އެންމެ މުހިންމު ފޯވާޑް މުހައްމަދު ސަލާހަށް އަނިޔާވެ، ޓީމާ ވަކިވިތާ ދެ ދުވަސް ފަހުންނެވެ. ސަލާހް މިވަގުތު ފަރުވާ ހޯދަމުންދަނީ އޭނާގެ ކުލަބު ކަމަށްވާ ލިވަޕޫލްގެ މެޑިކަލް ޓީމާއެކުގައެވެ. އޭނާއަށް ވެސް މުބާރާތުގައި ދެން ކުޅެވޭނެކަމުގެ ޔަގީންކަމެއްނެތެވެ.
މި ދެ ކުޅުންތެރިން ނެތުމަކީ އެފްރިކާ ކަޕް އަށްވަނަ ފަހަރަށް ކާމިޔާބު ކުރުމަށް މިސުރުން ކުރަމުން އަންނަ މަސައްކަތަށް އެޅުނު ވަރަށް ބޮޑު ހުރަހެކެވެ. ނަމަވެސް ސަލާހް ބުނަނީ އޭނާ ނެތަސް ޓީމުގައި މޮޅު ކުޅުންތެރިން އެބަތިބި ކަމަށާއި ޓީމަށް ކާމިޔާބު ލިބޭނެ ކަމަށް އުއްމީދުކުރާ ކަމަށެވެ.
ލިވަޕޫލްގެ ކޯޗު ޔާގެން ކްލޮޕް ބުނީ ސަލާހް ފިޓްވެއްޖެނަމަ މިސުރު މުބާރާތުގައި ކުޅެން ޖެހޭ މެޗެއް އޮވެއްޖެނަމަ އެ މެޗަކަށް އޭނާ ފޮނުވާނެ ކަމަށެވެ.
