ކަރަބޯ ކަޕްގެ ފައިނަލަށް ޗެލްސީ

އިނގިރޭސި ލީގު ކަޕް (ކަރަބޯ ކަޕް) ގެ ފައިނަލުން ޗެލްސީ ޖާގަ ހޯދައިފި އެވެ.

ފައިނަލްގެ ފުރަތަމަ ޖާގަ ޗެލްސީން ޔަގީން ކުރީ ސެމީ ފައިނަލްގެ ދެ ވަނަ ލެގުގައި މިޑްލްސްބަރާ ބަލިކޮށްގެންނެވެ. ފުރަތަމަ ލެގު މިޑްލްސްބަރާގެ އަމިއްލަ ދަނޑުގައި ކުޅުނުއިރު، އެ މެޗުގައި މިޑްލްސްބަރާ އިން ވަނީ 1-0 އިން ޗެލްސީ ބަލިކޮށްފަ އެވެ. ނަަމަވެސް، ޗެލްސީގެ އަމިއްލަ ދަނޑުގައި ކުޅުނު ސެމީ ފައިނަލްގެ ދެ ވަނަ ލެގު އެ ޓީމުން ކާމިޔާބު ކުރީ 6-1 އިންނެވެ.

މެޗު ފަށައިގެން 15 ވަނަ މިނެޓުގައި ޗެލްސީ އަށް ލީޑު ލިބުނީ މިޑްލްސްބަރާގެ ޖޯނީ ހޯސަން އަތުން ބައި ކޮޅަށް ވަތް ލަނޑުންނެވެ. އޭގެ ފަހުން މެޗުގެ 29 ވަނަ މިނެޓުގައި ޗެލްސީގެ ލީޑު ފުޅާ ކޮށްދިނީ އާޖެންޓީނާގެ ޒުވާން ކުޅުންތެރިޔާ އެންޒޯ ފެނާންޑޭޒް އެވެ. ޗެލްސީގެ ތިން ވަނަ ލަނޑު މެޗުގެ 36 ވަނަ މިނެޓުގައި އެލެކްސް ޑިސާސީ ޖެހީ، ރަހީމް ސްޓާލިން ތަނަވަސްކޮށްދިން ފުރުސަތެއްގަ އެވެ. ފުރަތަމަ ހާފު ނިމުމުގެ ކުރިން ޗެލްސީން ވަނީ ހަތަރު ވަނަ ލަނޑެއް ވެސް ޖަހައިފަ އެވެ. 42 ވަނަ މިނެޓުގައި އެ ލަނޑު ޖެހީ، ކޯލް ޕާމާ އެވެ.

ދެ ވަނަ ހާފުގައި ޗެލްސީގެ ފަސް ވަނަ ލަނޑު ޖެހީ ވެސް ޕާމާ އެވެ. އޭގެ ފަހުން ޗެލްސީގެ ހަ ވަނަ ލަނޑު، 81 ވަނަ މިނެޓުގައި ޖެހީ ނޯނީ މަޑުއޭކޭ އެވެ. ޗެލްސީން ހަ ލަނޑު ޖެހި ފަހުން، މިޑްލްސްބަރާގެ ހަމައެކަނި ލަނޑު 88 ވަނަ މިނެޓުގައި ޖެހީ މޯގަން ރޮޖާސް އެވެ.

ކަރަބޯ ކަަޕްގެ ފައިނަލް ކުޅުމަށް ހަމަޖެހިފައި ވަނީ އަންނަ މަހުގެ 25 ވަނަ ދުވަހު އެވެ. ފައިނަލްގައި ޗެލްސީއާ ދެކޮޅަށް ނިކުންނާނެ ޓީމެއް ޔަގީން ވާނީ ބުދަ ދުވަހުގެ ރޭ ލިވަޕޫލް އަދި ފުލަމް ކުޅޭ މެޗުންނެވެ.