ކިންގްސް ބަލިކޮށް، ޓީރެކްސް ކުރިއަށް
ޓީރެކްސް ވަނީ ތިން މެޗުންވެސް މޮޅުވެފައި
ކިންގްސްއާއި ޓީރެކްސް ލީގުގައި ވާދަކުރި މެޗުގެ ތެރެއިން
ގައުމީ ބާސްކެޓްބޯޅަ ލީގުގައި ކިންގްސް ބާސްކެޓްބޯޅަ ކްލަބް ބަލިކޮށް, ޓީރެކްސް އިން ކުރިއަށް ޖެހިލައިފިއެވެ.
ވާދަވެރި ކިންގްސް ބަލިކުރުމާއެކު, ޓީރެކްސް އިން ވަނީ ލީގުގައި ކުޅުނު ތިން މެޗުންވެސް މޮޅުވެފައެވެ. ކިންގްސްގެ މައްޗަށް ޓީރެކްސްއިން ކުރިހޯދީ 18 ޕޮއިންޓްގެ ތަފާތަކުންނެވެ. އެއީ 79-61 ޕޮއިންޓުންނެވެ. މެޗުގެ ފުރަތަމަ ކްއާޓާގައި ކިންގްސްއިން ކުރި ހޯދި ނަމަވެސް ޖެހިގެން އައި ތިން ކްއާޓާގައިވެސް ކުރިހޯދީ ޓީރެކްސް އިންނެވެ. މެޗުގައި އެންމެބޮޑު ތަފާތެއް ދެއްކީ ޓީރެކްސްގެ އިސްމާއީލް ވިލްދާން އެވެ. ހަ ޓީމް ވާދަކުރާ ލީގުގައި ތިން މެޗުންވެސް މޮޅުވެ އެއްވަނައިގައި އޮތީ ޓީރެކްސް އެވެ. ކިންގްސް ވަނީ ކުޅުނު ތިން މެޗުގެ ތެރެއިން ދެ މެޗު ކާމިޔާބުކޮށްފައެވެ.
ލީގުގައި ރެޕްޓާސް ބާސްކެޓް ކްލަބުން ވަނީ ބޮޑު ތަފާތަކުން ސްޓިންގާސް ބާސްކެޓް ކްލަބް ބަލިކޮށްފައެވެ. މެޗު ރެޕްޓާސް ކާމިޔާބުކުރީ 97-27 ޕޮއިންޓުންނެވެ.
