ކަމެއް ނުނިމިގެން އާންމުން ސިޓީ ކައުންސިލުގެ ދޮރުގައި ޓަކިޖަހާކަށް ނުޖެހޭނެ: އާޒިމް
އެއްވެސް މީހަކާމެދު ސިޓީ ކައުންސިލުން ފަރުވާކުޑައެއް ނުކުރާނެ
މާލެ ސިޓީ ކައުންސިލުގެ މޭޔަރު ކަމަށް ވާދަކުރައްވާ އާދަމް އާޒިމް، ޖަލްސާގައި ވާހަކަ ދައްކަވަނީ
ކަމެއް ނުނިމިގެން އާންމުން ސިޓީ ކައުންސިލުގެ ދޮރުގައި ޓަކިޖަހާކަށް ނުޖެހޭނެކަމަށް މާލެ ސިޓީ މޭޔަރު އާދަމް އާޒިމް ވިދާޅުވެއްޖެއެވެ.
އަންގާރަ ދުވަހު އޮތް ނޫސްވެރިންގެ ބައްދަލުވުމެއްގައި އާޒިމް ވިދާޅުވީ، އެއްވެސް މީހަކާމެދު ސިޓީ ކައުންސިލުން ފަރުވާކުޑައެއް ނުކުރާނެ ކަމަށާއި އާންމުންގެ ކަންބޮޑުވުންތަކަށް ޙައްލު ހޯދުމަށް ކައުންސިލުން އަބަދުވެސް އިސްކަންދޭނެ ކަމަށެވެ.
ކަމެއް ނުނިމިގެން އާންމުން ސިޓީ ކައުންސިލުގެ ދޮރުގައި ޓަކިޖަހާކަށް ނުޖެހޭނެކަމަށް އާޒިމް ވިދާޅުވިއެވެ.
މާލެ ސިޓީގެ ކަންކަން ކުރިއަށްގެންދާންވީ ގޮތް ރައްޔިތުން ސާފުކޮށް ބުނެފައި ވަނިކޮށް، އަދި ޤާނޫނުއަސާސީގެ 8 ވަނަ ބާބާއި ލާމަރުކަޒީ ޤާނޫނުގައި ކަނޑައަޅާފައިވާ ގޮތާއި ޚިލާފަށް، ރައީސްއޮފީހުގެ ވަޒީރުބޭފުޅުން ވަންނަވައިގެން ސިޓީ ކައުންސިލުގެ މަސައްކަތްތައް އަތުލައްވަން ކުރައްވާ މަސައްކަތްތައް ހުއްޓާލެއްވުމަށް އާޒިމް ސަރުކާރަށް ގޮވާލައްވާފައިވެއެވެ.
ބަދަލު ކުރަން ނިންމި މަޝްރޫޢުތަކުގެ ތެރޭގައި މަސްމާރުކޭޓާއި ލޯކަލް މާރުކޭޓް އަދި ޕާކިން ބިލްޑިންތަކުގެ މަަޝްރޫއު ހިމެނެއެވެ.
ރައީސް އޮފީހުގެ ބައެއް ބޭފުޅުން ސިޓީ ކައުންސިލަށް ވަންނަވާ އެތަނުގެ ލިއެކިއުންތައް ނެގުމާއި، ބެލުން ފަދަ ކަންކަން ކުރަމުން ދާތީ ބައެއް ކައުންސިލަރުން މީގެ ކުރިން ވެސް ކަންބޮޑުވުން ފާޅުކޮށްފައިވެއެވެ.
މިހާރުގެ ރައީސުލްޖުމްހޫރިއްޔާ އަދި ކުރީގެ މޭޔަރު ޑރ މުހައްމަދު މުއިއްޒު ރައީސްކަމަށް ހަވާލުވެވަޑައިގަތުމާއި ގުޅިގެން ކުރިން ސިޓީ ކައުންސިލުގައި ވަޒީފާ އަދާކުރަމުންދިޔަ ގިނަ ބަޔަކަށް ރައީސް އޮފީހާއި އެހެން މުއައްސަސާތަކުން ވަނީ ވަޒީފާތައް ދީފައެވެ.
