މާލެ އާއި ރަސްމާލެ ގުޅާލަނީ ކަނޑު އަޑިން އަޅާ ޓަނަލަކުން - ރައީސް
23 ޖެނުއަރީ 2024 | އަންގާރަ 01:45މިއީ މުޅި ދުނިޔޭގައިވެސް ފުރަތަމަފަހަރަށް ޤާއިމުކުރެވޭ އަންޑަރ ވޯޓަރ ޓަނަލް ކަމަށް ރައީސް ވިދާޅުވި
ރައީސް ޑރ. މުހައްމަދު މުއިއްޒު
މާލެ އާއި ރަސްމާލެ ގުޅުވައިލައްވާނީ ކަނޑު އަޑިން އަޅާ ޓަނަލަކުން ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ މާލެ ސިޓީ ކައުންސިލުގެ 4 ވަނަ ދައުރު (ބައި-އިލެކްޝަން) ގެ މޭޔަރ އަދި ކައުންސިލް މެންބަރުން ހުވައިކުރެއްވުމުގެ ދަރުބާރުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ ރަސްމާލެއާ ގުޅުވައިލުމަށްޓަކައި ފަންނީ ވަރަށްގިނަ މަސައްކަތްތަކެއް، އިނޮވޭޓިވް މަސައްކަތްތަކެއް ފައްޓަވާފައިވާ ކަމަށެވެ. އަދި ވަރަށް ޤާބިލް ކުންފުނިތަކާއެކު ސަރުކާރުން މަޝްވަރާ ފަށާފައިވާ ކަމަށެވެ. ރައީސް ވިދާޅުވީ މިއީ މުޅި ދުނިޔޭގައިވެސް ފުރަތަމަފަހަރަށް ޤާއިމުކުރެވޭ އަންޑަރ ވޯޓަރ ޓަނަލް ކަމަށާއި، މާލެއިން ރަސްމާލެއަށް އިރާދަކުރެއްވިއްޔާ ގުޅުވާލުމުގެ މަސައްކަތް ކަމަށް ރައީސް ވިދާޅުވިއެވެ.
ރަސްމާލެ ހިއްކުމުގެ ރަސްމިއްޔާތުގައި ރައީސް ވިދާޅުވެފައިވަނީ އެމަނިކުފާނު ވަޢުދުވެވަޑައިގެންނެވި ގޮތަށް މަސައްކަތް ފަށާތާ 8 މަސްދުވަހުގެ ތެރޭގައި ފުށިދިއްގަރު ފަޅުން 1153 ހެކްޓަރުގެ ބިން ހިއްކާނެކަމަށެވެ.
