ފަލަމަސްގަނޑު ހަލާކުވުމުން ސަލާހް ރީހެބަށް

އެފްރިކާ ކަޕުގައި ގައުމީ ޓީމަށް ކުޅެނިކޮށް، މިސުރުގެ މުހައްމަދު ސަލާހަށް އަނިޔާވެ ލިވަޕޫލްގައި ފަރުވާ ކުރަން ނިންމައިފި އެވެ.

ސަލާހަކީ މިސުރާއި ލިވަޕޫލްގެ ވެސް އެންމެ މުހިންމު ފޯވަޑެވެ. އޭނާ އަށް އަނިޔާވުމަކީ މިސުރަށް މުބާރާތުގައި ކުރިއަށް ދިއުމަށް އެޅޭ ވަރަށް ބޮޑު ހުރަހެކެވެ. އަދި ލިވަޕޫލް އިނގިރޭސި ޕްރެމިއާ ލީގުގައި މިހާރު ދަމަހައްޓަމުން އަންނަ ރަނގަޅު ފޯމު ހިފެހެއްޓުމަށް ވެސް ދަތިވެދާނެ ކަމަށެވެ.

ޕްރެމިއާ ލީގުގައި ރޭ ބޯނެމައުތު އަތުން 4-0އިން މޮޅުވި މެޗަށް ފަހު ކްލޮޕް ބުނީ ސަލާހަށް އަނިޔާވި މޮޒަންބީކް މެޗަށް ފަހު އޭނާ ކުޅުންތެރިޔާއާ ވާހަކަ ދެއްކި ކަމަށެވެ. އަދި މިވަގުތު އެންމެ މުހިންމީ ސަލާހްގެ ފަރުވާގެ ކަންކަން އެންމެ ރަނގަޅަށް ގެންދިއުން ކަމަށެވެ.

އޭނާ ބުނީ ސަލާހަށް ކުޅެވޭވަރުވެއްޖެނަމަ މިސުރުގެ ކުރިއަށް ހުރި މެޗުތަކަށް ދޫކުރާނެ ކަމަށެވެ. މިސުރުން އުއްމީދު ކުރަނީ ސެމީ ފައިނަލާ ހިސާބަށް ދެވިއްޖެނަމަ އެ ހިސާބުން ސަލާހަށް ކުޅެވޭ ވަރަށް ފިޓްވާނެ ކަމަށެވެ.

އެފްރިކަން ކަޕް އޮފް ނޭޝަންސްގައި ކުޅެން ސީޒަނުގެ މެދުތެރެއިން ކުޅުންތެރިން ދޫކުރަން ޖެހުމުން ކްލޮޕް ވަނީ ކުރިން ވެސް ހިތްހަމަމަނުޖެހިފަ އެވެ.

ސަލާހް ބުނީ އޭނާ އުއްމީދު ކުރަނީ ގައުމީ ޓީމާއެކު މުބާރާތް ކާމިޔާބު ކުރަން ކަމަށާއި އޭނާ އަށް ނުކުޅެވުނަސް ޓީމުގައި ރަނގަޅު ކުޅުންތެރިން އެބަތިބި ކަމަށެވެ.