މާލޭގެ މަގުމަތީގައި އުޅޭ ބުޅާތަކަށް ޚާއްސަކޮށްގެން ފަރުކޮޅުފުށީގައި ޕެޓް ކެއާ ފެސިލިޓީއެއް އަޅަން ސަރުކާރުން ނިންމައިފިއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ވިދާޅުވީ ބުޅާ ބަލަހައްޓަން އަޅާ ފެސިލިޓީ ހަދަން ހުޅުމާލެ ދެވަނަ ފިޔަވަހީގައި އޮންނަ ފަރުކޮޅުފުށިން ބިން ހަމަޖެހިފައިވާ ކަމަށެވެ.
އެ ފެސިލިޓީ ގާއިމްކޮށް ބަލަހައްޓާނީ އެނިމަލް ވެލްފެއާ މިނިސްޓްރީ އާއި މާލެ ސިޓީ ކައުންސިލްއާ ދެމެދު ވެވޭ އެއްބަސްވުމެއްގެ ދަށުން ކަމަށް ވެސް ނާޒިމް ވިދާޅުވިއެވެ.
ފަރުކޮޅުފުށީގައި ބުޅާތައް ބަލަހައްޓާނެ ތަނެއް އެޅުމަށް ނިންމާފައިވާއިރު، މިހާރުގެ ރައީސް ޑރ. މުޙައްމަދު މުއިއްޒު މާލެ ސިޓީގެ މޭޔަރުގެ މަގާމުގައި ހުންނެވި ދުވަސްވަރު، މާލޭގެ މަސްވެރިންގެ ޕާކުގައި ބުޅާ ބަލަހައްޓާނެ ތަނެއް ގާއިމް ކުރުމަށް ނިންމިއެވެ. އޭރު އެކަމަށް ބަޖެޓުކޮށްގެން ކަނޑައެޅި ނަމަވެސް، މިއަދާ ހަމައަށް ވެސް އޭގެ އަމަލީ މަސައްކަތް ފަށާފައެއް ނުވެއެވެ.
