ލައިޕްޒިގް ބަލިކޮށް، ލެވަކޫސަންގެ ރެކޯޑު ކުރިއަށް

ޖަރުމަނު ލީގުގައި އާރްބީ ލައިޕްޒިގާ ދެކޮޅަށް ކުޅުނު މެޗުން މޮޅުވެ، ބަޔާ ލެވަކޫސަނުން މޮޅުވުމުގެ ރެކޯޑުގައި ކުރިއަށް ޖެހިލައިފި އެވެ.

ލީގުގައި ހޮނިހިރު ދުވަހުގެ ރޭ، ލައިޕްޒިގްގެ ދަނޑުގައި ކުޅުނު މެޗު ލެވަކޫސަން އިން ކާމިޔާބު ކުރީ 3-2 އިންނެވެ. މި ސީޒަންގެ މިހާތަނަށް ކުޅުނު އެއްވެސް މެޗަކުން، ލެވަކޫސަން ބަލިވެފައެއް ނުވެ އެވެ. ޖަރުމަނު ލީގުގައި ވެސް އެ ޓީމު އަންނަނީ ރަނގަޅު ނަތީޖާތަކެއް ނެރެމުންނެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ލައިޕްޒިގުންނެވެ. މެޗު ފަށައިގެން ހަތް ވަނަ މިނެޓުގައި އެ ޓީމަށް ލީޑު ނަގައިދިނީ ޒަވީ ސިމޮންސް އެވެ. ލެވަކޫސަނުން މެޗުގެ ނަތީޖާ ހަމަހަމަ ކުރުމަށް ކުރި މަސައްކަތް ކާމިޔާބުވީ ދެ ވަނަ ހާފުގަ އެވެ. ދެ ވަނަ ހާފު ފަށައިގެން ދެ ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ނަތަން ޓެލާ އެވެ. އޭނާ އަކީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް ކުޅުންތެރިޔެކެވެ.

ދެ ވަނަ ފަހަރަށް ލައިޕްޒިގުން ލީޑު ނެގީ 56 ވަނަ މިނެޓުގައި ލޮއިސް އޮޕެންޑާ ޖެހި ލަނޑުންނެވެ. ނަމަވެސް، އެ ލީޑު އޮތީ ހަތް މިނެޓަށެވެ. ޖޮނަތަން ޓާ ވަނީ ލަނޑު ޖަހައި، ދެ ވަނަ ފަހަރަށް ލެވަކޫސަނަށް ނަތީޖާ ހަމަހަމަ ކޮށްދީފަ އެވެ. މެޗުން ލެވަކޫސަނަށް މުހިންމު ތިން ޕޮއިންޓު ހޯދައިދިނީ އިތުރު ވަގުތުގައި ޕިއެރޯ ހިކަންޕީ އެވެ.

މޮޅާއެކު ލެވަކޫސަން އެއް ވަނައިގައި އޮތީ މިހާތަނަށް ކުޅުނު 18 މެޗުން 48 ޕޮއިންޓާއެކު އެވެ. ލެވަކޫސަނަށްވުރެ ދެ މެޗު މަދުން ކުޅެގެން، ދެ ވަނައިގައި އެންމެ ފަހުގެ ޗެމްޕިއަން ބަޔާން މިއުނިކަށް ލިބެނީ 41 ޕޮއިންޓެބެ. ލެވަކޫސަން އަތުން ބަލިވި ލައިޕްޒިގް އޮތީ 33 ޕޮއިންޓާއެކު ހަތަރު ވަނައިގަ އެވެ.