ސްމިތް ރޯވް ހޯދުމަށް ވެސްޓު ހޭމުން ހުށަހެޅި ހުށަހެޅުން، އާސެނަލް އިން ރިޖެކްޓު ކޮށްފި

އާސެނަލަށް ކުޅެމުން އަންނަ އިންގްލެންޑުގެ އެޓޭކިން މިޑްފީލްޑަރު ހޯދުމަށް، ވެސްޓް ހޭމް ޔުނައިޓެޑުން ހުށަހެޅި ހުށަހެޅުން، އާސެނަލުން ރިޖެކްޓު ކޮށްފި އެވެ.

އުމުރުން 23 އަހަރުގެ ޒުވާން ކުޅުންތެރިޔާ އޭނާގެ ސީނިއާ ކެރިއަރު ފެށީ ވެސް އާސެނަލް އިންނެވެ. 2018 ވަނަ އަހަރު އާސެނަލް އިން ސީނިއާ ކެރިއަރު ފެށި ނަމަވެސް، ލޯނު އެއްބަސްވުމެއްގެ ދަށުން އޭނާ ވަނީ ދެ ކުލަބަކަށް ކުޅެފަ އެވެ. އެއީ ޖަރުމަނު ލީގުގައި އާރްބީ ލައިޕްޒިގްގެ އިތުރުން އިންގްލެންޑުގެ ހަންޑަސްފީލްޑް ޓައުން އަށެވެ. އޭގެ ފަހުން، 2020 ވަނަ އަހަރުގެ އޯގަސްޓު މަހުން ފެށިގެން އަނެއްކާ ވެސް އޭނާ އަންނަނީ އާސެނަލަށް ކުޅެމުންނެވެ.

ވެސްޓް ހޭމުން ހުށަހެޅީ ލޯނު އެއްބަސްވުމެއްގެ ދަށުން ސްމިތް ރޯވް ހޯދުމަށެވެ. ނަމަވެސް އާސެނަލުން ވަނީ އެ ހުށަހެޅުން ބަލައި ނުގަންނަން ނިންމައިފަ އެވެ. އެއީ ލޯނު އެއްބަސްވުމެއްގެ ދަށުން ވެސް ނުވަތަ، ދާއިމީ އެއްބަސްވުމެއްގެ ދަށުން ވެސް އޭނާ ދޫކޮށްލަން ބޭނުން ނުވާތީ އެވެ. ބައިނަލްއަޤުވާމީ މީޑިއާ ތަކުގައި ރިޕޯޓުކޮށްފައިވާ ގޮތުން އާސެނަލްގެ ކޯޗު މިކޭލް އާޓެޓާގެ ޕްލޭންގައި އޭނާ އަކީ މުހިންމު ކުޅުންތެރިޔެކެވެ. އެހެންވެ، އޭނާ ދޫކޮށްލުމަށް ދެކޮޅު ހަދަނީ ވެސް އާޓެޓާ ކަމަށް ވަނީ ބުނެފަ އެވެ.

ސްމިތް ރޯވް ވަނީ މިހާތަނަށް އާސެނަލަށް 107 މެޗު ކުޅެދީ 18 ލަނޑު ޖަަހައިފަ އެވެ. މިހާރު ކުރިއަށްދާ ސީޒަންގައި އޭނާ ވަނީ އާސެނަލަށް 11 މެޗު ކުޅެދީފަ އެވެ. އޭގެ ތެރެއިން އިނގިރޭސި ޕްރިމިއާ ލީގުގަައި އޭނާ ކުޅެފައި ވަނީ ހަ މެޗެވެ. މީޑިއާ ތަކުގައި ބުނެފައިވާ ގޮތުން އާސެނަލްގައި ކުޅުމުގެ ފުރުސަތު ނުލިބޭތީ، ސްމިތް ރޯވް ހުންނަނީ ހިތްހަމަ ޖެހިގެނެއް ނޫނެވެ. އާސެނަލާ އެކު އޭނާ ވަނީ އެފްއޭ ކޮމިއުނިޓީ ޝީލްޑް ދެ ފަހަރު ކާމިޔާބު ކޮށްފަ އެވެ.