އަންހެނުންނަށް ޚާއްސަކޮށްގެން ދޫކުރާ 100 މިލިއަން ރުފިޔާގެ ލޯން ވަރަށް އަވަހަށް ދޫކުރާނެ: މިނިސްޓަރު
20 ޖެނުއަރީ 2024 | ހޮނިހިރު 04:42އަންހެނުން ފުދުންތެރިބަޔަކަށް ވާންޖެހޭ
މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑރ. އާއިޝަތު ޝިހާމް ވާހަކަދައްކަވަނީ
އަންހެނުންނަށް ޚާއްސަކޮށްގެން ދޫކުރާ 100 މިލިއަން ރުފިޔާގެ ލޯން ވަރަށް އަވަހަށް ދޫކުރާނެ ކަމަށް މިނިސްޓަރ އޮފް ސޯޝަލް އެންޑް ފެމިލީ ޑިވެލޮޕްމަންޓް ޑރ. އާއިޝަތު ޝިހާމް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ހިޔަލަ ވީކެންޑް މާކެޓް ފަށްޓަވައިދެއްވައި ދެއްކެވި ވާހަކަފުޅުގައެވެ. މިނިސްޓަރު ވިދާޅުވީ އަންހެނުން ބާރުވެރިކުރުވުމަށް ގިނަ މަސައްކަތްތަކެއް ކުރާނެ ކަމަށެވެ. އެގޮތުން ކުދި ވިޔަފާރިތަކަށް މާލީ އެހީތެރިކަން ފޯރުކޮށްދިނުމަށް ޚާއްސަ ލޯނެއް ވަރަށް އަވަހަށް ތައާރަފްކުރާނެކަމަށާއި، އަންހެނުންނަށް ޚާއްސަކޮށްގެން ދޫކުރާ 100 މިލިއަން ރުފިޔާގެ ލޯން ވަރަށް އަވަހަށް ދޫކުރަން ފަށާނެ ކަމަށް މިނިސްޓަރު ވިދާޅުވިއެވެ.
ހިޔަލަ ވީކެންޑް މާކެޓަށް އިޝާރާތް ކުރައްވައި މިނިސްޓަރު ވިދާޅުވީ ހުކުރު ދުވަހު ހުޅުވިގެން ދިޔަ މި މާކެޓާއެކު އަންހެން ވިޔަފާރިވެރިންނަށް ވިޔަފާރީގެ ފުރުސަތު އިތުރަށް ފަހިވާނެ ކަމަށާއި، ދިވެހި އަންހެނުންގެ އުފެއްދުންތައް އާންމުންނާ ހަމައަށް ފޯރުކޮށްދެވޭނެ ކަމަށެވެ. މިނިސްޓަރު ވިދާޅުވީ މި މާކެޓާއެކު އެއްތަނަކުން އެތައް އަންހެން ވިޔަފާރިވެރިންނެއް ބައްދަލުވެ އެއް އަޒުމެއްގައި މަސައްކަތް ކުރުމުގެ ފުރުސަތު ފަހިވާނެ ކަމަށެވެ.
އަންހެނުން ފުދުންތެރިބަޔަކަށް ވާންޖެހޭކަން ފާހަގަކުރައްވައި މިނިސްޓަރު ވިދާޅުވީ މިފަދަ ފުރުސަތުތަކުގެ ބޭނުން ހިފަންޖެހޭ ކަމަށެވެ. އަދި ވިދާޅުވީ ހިޔަލަ މާކެޓުން ޖާގަ ދޫކުރަނީ ކުޑަ ކުއްޔެއްގައި ކަމަށެވެ.
މި މާކެޓް ކުރިއަށްދަނީ ހުޅުމާލޭގެ ފުރަތަމަ ފިޔަވަހީގައި ހަދާފައިވާ ކޮންޓެއިނަރ ޕާކު ސަރަހައްދުގައެވެ. އެއީ ކޮންމެ ހަފްތާއެއްގެ ހުކުރު އަދި ހޮނިހިރު، މި ދެ ދުވަހުގެ ހަވީރު 4:00 އިން ރޭގަނޑު 11:00 އަށެވެ.
ހިޔަލަ ވީކެންޑް މާކެޓްގައި ބައިވެރިވާން ބޭނުންވާ ފަރާތްތަކަށް ވެއިޓް ލިސްޓް ކުރުމުގެ ފުރުސަތު ވަނީ ހުޅުވާލާފައެވެ.
