މާލޭ ސަރަހައްދުގައި ޖިނާއީ މައްސަލަތަކުގެ ޝަރީއަތްތައް އޮތީ ހުއްޓިފައި، މިކަމަށް އަވަސް ހައްލެއް ބޭނުންވޭ - އުއްތަމަ ފަނޑިޔާރު
ފާއިތުވި އަހަރު ފާހަގަކުރެވުނު އެންމެ މުހިންމު ކަމަކީ ފަނޑިޔާރުންނާއި މުވައްޒަފުން ގުޅިގެން އެއް ރޫހެއްގައި މަސައްކަތް ކުރުންކަމަށް ވިދާޅުވި
އުއްތަމަ ފަނޑިޔާރު، އަހުމަދު މުއުތަސިމް އަދުނާން
ކްރިމިނަލް ކޯޓު ހިންގާ އިމާރާތް ބާވުމާއި ގުޅިގެން، މާލޭ ސަރަހައްދުގެ ޖިނާއީ މައްސަލަތަކުގެ ޝަރީއަތްތައް ހުއްޓިފައި އޮތް އޮތުމަށް އަވަސް ހައްލެއް ހޯއްދަވާދެއްވުމަށް އުއްތަމަ ފަނޑިޔާރު، އަހުމަދު މުއުތަސިމް އަދުނާން އެދިވަޑައިގަންނަވައިފިއެވެ.
އެމަނިކުފާނު އެފަދައިން އެދިވަޑައިގަތީ ގަޟާއީ އަހަރު 2024 އިފްތިތާހުކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އެގޮތުން، އެހެން އަހަރުތަކެކޭ އެއްފަދައިން ފާއިތުވެ ދިޔަ އަހަރު ވެސް ޝަރުއީ ދާއިރާ އަށް ބޭނުންވާ އުމްރާނީ ތަރައްޤީ ހީނަރުވެފައިވާ ކަމަށް އެމަނިކުފާނު ފާހަގަކުރެއްވިއެވެ. އަދި މިދިޔަ އަހަރު ވެސް ޖާގައިގެ ދަތިކަމާއި ކުރިމަތިލާން ޖެހުނު ކަމަށް ވިދާޅުވިއެވެ.
ނިމިދިޔަ އަހަރު ވާރޭ ވެހުމުގެ ސަބަބުން ކްރިމިނަލް ކޯޓާއި، ފެމިލީ ކޯޓާއި، ޑްރަގް ކޯޓުގެ އިތުރުން ބައެއް މެޖިސްޓްރޭޓް ކޯޓުތަކުގެ އިމާރާތްތަކަށާއި ތަކެއްޗަށާއި ވަސީލަތްތަކަށް ގިނަ ގެއްލުންތަކެއް ލިބުނުކަން އެމަނިކުފާނު ވަނީ ފާހަގަކުރައްވާފައެވެ. ފެމިލީ ކޯޓަށް ލިބުނު ގެއްލުންތަކަށް އަވަސް ހައްލެއް ހޯދައިދެވިފައިވާ ކަމަށާއި ކްރިމިނަލްް ކޯޓަށް ދިމާވި މައްސަލަ އަށް ހައްލު ގެނައުމަށް މަސައްކަތް ކުރެއްވި ކަމަށް އެމަނިކުފާނު ވިދާޅުވިއެވެ.
ފާއިތުވި އަހަރު ކްރިމިނަލް ކޯޓަށް 854 މައްސަލަ ހުށަހަޅާފައިވީ ނަމަވެސް ކްރިމިނަލް ކޯޓު ހިންގަމުންދިޔަ އިމާރާތް ބާވެ، އެތަނަކީ މީހުން ހާޒިރުކޮށް މަސައްކަތް ކުރަން އެކަށީގެންވާ އިމާރާތަކަށް ނުވާތީ އެ ކޯޓުގެ މަސައްކަތްތައް ހުއްޓިފައިވާ ކަމަށް އެމަނިކުފާނު ވަނީ ވިދާޅުވިއެވެ. މިކަމަކީ ޖިނާއީ އަދުލުގެ ނިޒާމް ހުއްޓި މުޖުތަމައުއަށް ނޭދެވޭ އަސަރުތަކެއް ކުރާނެ ކަމެއް ކަަމަށް އުއްތަމަ ފަނޑިޔާރު ވިދާޅުވިއެވެ.
މީގެ އިތުރުން، ފާއިތުވި އަހަރު ފާހަގަކުރެވުނު އެންމެ މުހިންމު ކަމަކީ ފަނޑިޔާރުންނާއި މުވައްޒަފުން ގުޅިގެން އެއް ރޫހެއްގައި މަސައްކަތް ކުރުން ކަމަށް ވެސް އުއްތަމަ ފަނޑިޔާރު ވިދާޅުވިއެވެ. އަދި މެޖިސްޓްރޭޓް ކޯޓުތަކަށް ޒިޔާރަތްކުރައްވާ އެ ތަންތަނުގެ މަސައްކަތް ކުރިއަށްދާ ގޮތް ބައްލަވާލައްވާފައިވާ ކަމަށާއި މެޖިސްޓްރޭޓުންނާއި މުވައްޒަފުންނާއި ވާހަކަދައްކައިގެން ބެލި ބެލުމުން ބައެއް ކޯޓުތަކަށް ދިމާވެފައިވަ އެންމެ ބޮޑު ގޮންޖެހުމަކީ ޖާގައިގެ ދަތިކަންކަމަށް ފާހަގަކުރެއްވުނު ކަަމަށް އެމަނިކުފާނު ވިދާޅުވިއެވެ. އެހެންނަމަވެސް މި ދަތިތަކާއެކު ވެސް ޚިދުމަތް ފޯރުކޮށްދިނުމަށް ކޯޓުތަކުން މަސައްކަތްކުރަމުންދާ ކަމަށް އުއްތަމަ ފަނޑިޔާރު ވިދާޅުވިއެވެ.
