ސަރުކާރުގެ މާމުއި ހަނދުވަރުގެ ރޭތައް ނިމުމަކަށް އައިސްފައިވާ ކަމަށް ކުރީގެ އިކޮނޮމިކް މިނިސްޓަރ އަދި އެމްޑީޕީގެ ޗެއަރޕަރސަން ފައްޔާޒް އިސްމާއިލް ވިދާޅުވެއްޖެއެވެ.
ފައްޔާޒް އެފަދައިން ވިދާޅުވީ އޭނާ އެކްސްގައި ކުރެއްވި ޕޯސްޓެއްގައެވެ. އެ ޕޯސްޓްގައި މާމުއި ހަނދުވަރުގެ ރޭތައް ނިމުމަކަށް މިހާރު އައިސްފައިވާ ކަަމަށް ފާހަގަކުރެއްވުމުގެ އިތުރުން އޮޅުވާލުމާއި އަނިޔާވެރިކަމުގެ އަމަލުތައް މި ސަރުކާރުން ހިންގަމުންދާ ކަމަށް ފާހަގަކުރައްވާފައިވެއެވެ. އިތުރަށް ފައްޔާޒް ވިދާޅުވީ ހުދުމުހުތާރުކަން ހުއްޓުވުމަށް ކުރެވެން ހުރި ހުރިހާކަމެއް ކުރަން މިހާރު މިއޮތީ ޖެހިފަ ކަމަށެވެ. އަދި الله ގެ އިރާދަފުޅާއެކު ކާމިޔާބު ލިބޭނެ ކަމަށް ވެސް ފައްޔާޒް ވިދާޅުވިއެވެ.
ފައްޔާޒް މިފަދައިން ވިދާޅުވެފައި މި ވަނީ ސަރުކާރުގެ ކުންފުނިތަކުން ގިނަ އަދަދެއްގެ ބަޔަކު ވަކިކުރަމުންދާ ދަނޑިވަޅެއްގައެވެ. ވަޒީފާގެ ރައްކާތެރިކަން ގެއްލޭގޮތަށް އެއް ފަހަރާ ގިނަ ޢަދަދެއްގެ މުވައްޒަފުން ވަކިކުރާތީ އެކަމާއި މެދު އެމްޑީޕީން ވަނީ ކަންބޮޑުވުން ފާޅުކޮށްފައެވެ.
