"ޟަރޫރަތަކީ އީޖާދުގެ މަންމަ": އުނުއޮރިޔާން ނިވާ ކުރަން ޣައްޒާގެ ފަހުލަވާނަކު ހޯދީ އާދަޔާ ޚިލާފު ޙައްލެއް!

ފަލަސްޠީނުގެ ބިންތަކަށް ވެރިވަގެނެގެން އުޅޭ ޚުދުމުޚޫތާރު ޔަހޫދީ އިޒްރޭލުން، ޣައްޒާގައި ހިންގަމުންދާ ޤަތުލުޢާންމަށް 100 ދުވަސް ފާއިތުވެގެން ދިޔައިރު، އެ އަނިޔާވެރިކަމާއި ހިތްދަތި ތަކުލީފުތަކުގެ ތެރޭގައި ދިރިއުޅުން ކޮޅަށް ޖަހަން، ޣައްޒާގެ ރަށްވެހިން ދަސްކޮށްފިއޭ ބުނުމަކުން ގޯހެއް ނެތެވެ. އަދިވެސް ޙަމަލާތައް އޮތީ ކުރިއަށް ކަމަށް ނިރުބަވެރި ޔަހޫދީ އަސްކަރިއްޔާއިން ބުނަމުން ދިޔަ ކަމުގައި ވީ ނަމަވެސް، ޣައްޒާގެ ރަށްވެހިންގެ ހިތްތަކުން އުންމީދުގެ އަލިކަން ފިލައެއް ނުދެއެވެ. އެފަދަ އެކަކީ މާޖިދު އަބޫ ޙާޖިބުއެވެ.

މާޖިދުއަކީ ދިރިއުޅުމަށްޓަކައި ވިޔަފާރި އުސޫލުން ފެހުމުގެ މަސައްކަތް ކުރަމުން އައި މީހެކެވެ. ނަމަވެސް އޮކްޓޯބަރ 7 ވަނަ ދުވަހު އިޒްރޭލުން ހިންގަން ފެށި ޤަތުލުޢާންމާއެކު ޣައްޒާއާ ދެކޮޅަށް ވަރުގަދަ ކުރި ދަތިކުރުމުގެ ފިޔަވަޅުތަކުގެ ނަތީޖާއެއްގެ ގޮތުން، ކަރަންޓު ފަދަ ޛަރޫރީ ޚިދުމަތްތަކަކީވެސް މިއަދު ޣައްޒާގައި އިންތިހާއަށް ތަދު އެއްޗަކަށް އޮތީ ވެފައެވެ. ނަމަވެސް، ޙާލަތުގެ ޝިކާރައަކަށްވެ، ދެއަތް އުރާލައިގެން އިނުމުގެ ބަދަލުގައި، މާޖިދު ފެށީ އޭނާގެ ދިރިއުޅުން ކުރިއަށް ގެންދެވިދާނެ އިތުރު މަގުތައް ހޯދާށެވެ.

އެ މޭރުމުން މަސައްކަތް ކުރަމުން ގޮސް، މައި ސަޕްލައިން ފޯރުކޮށްދޭ ކަރަންޓާ ނުލާ، ފަހާ ފޮށިން ފަހާލެވޭނެ މަގު، އޭނާ ހޯދިއެވެ. މިއަދުވެސް ރަފަޙުގައި މާޖިދުގެ ވިޔަފާރި ދަނީ ކުރިއަށެވެ. ސިއްރަކީ، މާޖިދުގެ ފިރިހެން ދަރިފުޅު ދުއްވަން ގެންގުޅުނު ބައިސްކަލެވެ. ފަހާ ފޮއްޓަށް ބޭނުންވާ ހަކަތަ ހޯދަނީ ބައިސްކަލު ބޭނުން ކޮށްގެންނެވެ.

އަދުގެ ޙާލަތަށް ރިޢާޔަތް ކޮށް، ދަރިފުޅުގެ ބައިސްކަލު ބަދަލު ކޮށްފައި ވަނީ ވަގުތީ މޯޓަރަކަށެވެ. މާޖިދު ބުނި ގޮތުގައި، ފަހާ ފޮއްޓަށް ބޭނުން ވާ ހަކަތަ، ބައިސްކަލު އަނބުރައިގެން ލިބޭ ގޮތަށް ފަރުމާކޮށްފައި ވާ އިރު، އެ ކަމުގައި އޭނާގެ ފިރިހެން ދަރިފުޅާއި އަދިވެސް ބައެއްގެ އެހީތެރިކަން ލިބެއެވެ.

ކަރަންޓުގެ ސަޕްލައި ދަތިވުމާއެކު މާޖިދުގެ ވިޔަފާރިއަށްވެސް ނޭދެވޭ އަސަރު ފޯރަން ފެށިއެވެ. ނަމަވެސް ޕެޑަލް އަނބުރައިގެން އޮޕަރޭޓް ކުރާ މެޝިންގެ އެހީގައި، މާޖިދުގެ ވިޔަފާރިއަށް އުންމީދީ އިންޤިލާބެއް ވަނީ ގެނެސްދީފައެވެ. މާޖިދު ކަސްޓަމަރުންވެސް އޭނާގެ ޚިދުމަތް ބަލައިގަނެއެވެ.

ކޮންމެ ގޮތަކަށް ކަން އޮތް ކަމުގައި ވީ ނަމަވެސް، މާޖިދު މިއަދު ދެމުން އެ ގެންދާ ޚިދުމަތަކީ، ޣައްޒާއަށް މި ވަގުތު ކޮންމެހެންވެސް ބޭނުން ޖެހިފައި އޮތް ޚިދުމަތެއް ކަން ނިދާލް ފާހަގަ ކުރިއެވެ.

މާޖިދު ބުނި ގޮތުގައި، ޤަތުލުޢާންމު ކުރިން ވިޔަފާރި ހިނގަމުން ދިޔަ ގޮތާ އަޅާ ބަލާއިރު، މިއަދު މާ ބޮޑު ޑިމާންޑެއް ނެތެވެ. ކަން އެހެން އޮތެއް ކަމަކު، އޭނާ އުންމީދު ކަނޑައެއް ނުލައެވެ.

ދުނިޔޭގެ އެންމެ ގަދަ ފަދަ ބާރުތައް ކަމަށް ބުނާ ޤައުމުތަކެއްގެ 'ޙިމާޔަތުގައި' އޮވެގެން ނިރުބަވެރި ޔަހޫދީން ދެމުންދާ ޢުދުވާންތަކުގައި ފަލަސްޠީނުން މަރުވި މީހުންގެ ޢަދަދު 24000 އަށް އަރައެވެ. ޣައްޒާގެ ޢުމްރާނީ ބިނާވެށި ސުންނާފަތި ކޮށްފައި ވާ އިރު، އިޤްތިޞާދު އޮތީ ދެފުށްޖެހިފައެވެ. ކޮންމެ ފަދަ ބިރެއް ދައްކާ، ޢާއިލާތަކެއްގެ ޖީލުތައް ހުރި ގޮތަށް މި ދުނިޔެއާ ވަކި ކުރަމުން ދިޔަ ކަމުގައި ވީ ނަމަވެސް، ޔަހޫދީ އިޒްރޭލުގެ ނިރުބަވެރި މުޖުރިމުންނަށް ނިގުޅައި ނުގަނެވުނު އެއްޗަކީ ޣައްޒާ ރަށްވެހިންގެ ހިތުގައި ވާ އީމާންތެރިކަމާއި، ކެތްތެރިކަމާއި، ސާބިތުކަމެވެ.