ޖަސްޓިން ބީބާ އޭނާގެ މަންމައާ އެކު ރާއްޖޭގައި

މަޝްހޫރު ލަވަކިޔުންތެރިޔާ ޖަސްޓިން ބީބާ އާއި އޭނާގެ މަންމަ ޕެޓްރީޝިއާ މެލޭޓް (ޕެޓީ މެލޭޓް) ރާއްޖޭގައި ޗުއްޓީ ހޭދަކުރަމުން އެބަދެއެވެ.

ބީބާ އާއި ޕެޓީ މެލޭޓް ޗުއްޓީ ހޭދަކުރަމުން ދަނީ ރާއްޖޭގެ ރިސޯޓެއް ކަމަށްވާ ލަނޑާ ގިރާވަރުގައެވެ.

ބެލެވޭ ގޮތުގައި ބީބާ އާއި އޭނާގެ މަންމަ ރާއްޖެ އައިސްފައި ވަނީ މީގެ ފަސް ދުވަސް ކުރިންނެވެ. ޕެޓީ މެލޭޓް ވަނީ ރާއްޖޭގެ ފޮޓޯތަކެއް އިންސްޓަގްރާމަށް ލާފައެވެ. އޭގެ ތެރެއިން ބީބާ އާއި އެކީގައި އަޕްލޯޑް ކޮށްފައިވާ ފޮޓޯއެއްގެ ކެޕްޝަނުގައި ޖަހާފައި ވަނީ އޭނާ ބީބާއާ މެދު ފަޚުރުވެރިވާ ކަމަށެވެ. އަދި ބީބާއަކީ މަޖާ ކުއްޖެއް ކަމަށާއި އޭނާ އެކަނި ހުންނަ އިރު ބީބާގެ މަޖާ ވާހަކަތައް ހަނދާންވެ ހިނިއަންނަ ކަމަށް ޕެޓީ މެލޭޓް ވަނީ ބުނެފައެވެ. އަދި ބީބާ ދެކެ ވަރަށް ލޯބިވާ ކަމަށް އޭނާގެ މަންމަ ވަނީ ބުނެފައެވެ.

ބީބާގެ އިންސްޓަގްރާމްގައި ރުކެއްގައި ބައްދައިގެން ހުރެ ނަގާފައިވާ ފޮޓޯއެއްގެ ކެޕްޝަންގައި ޖަހާފައި ވަނީ "އޭނާއަށް މިހާރު ލޯތްބަކީ ކޯއްޗެއްކަން އެނގިއްޖެ" ކަމަށެވެ.

ބީބާ އާއި ލަވަކިޔުންތެރިޔާ ސެލީނާ ގޮމޭޒް އަލުން ވަނީ ލޯބީގެ ގޮތުން ގުޅިފައެވެ. އެކަމާ ގުޅޭ ގޮތުން ޕެޓީ މެލޭޓް ބުނެފައި ވަނީ އެ ދެ މީހުން އަލުން ގުޅުމަކީ ވަރަށް އުފާކުރާ ކަމެއް ކަމަށާއި އެގުޅުމާ މެދު ހިތްހަމަޖެހޭ ކަމަށެވެ. އަދި އަލުން ބީބާގެ ހަޔާތަށް ސެލީނާ އައުމުން ބީބާ އަށް ހެޔޮ ބަދަލުތަކެއް އައިސްފައިވާ ކަމަށް ވެސް ބުންޏެވެ.

އުމުރުން 23 އަހަރުގެ ބީބާ ވަނީ މިދިޔަ އަހަރުގެ މެއިމަހުގެ ތެރޭގައި ވެސް ރާއްޖެ އައިސްފައެވެ.