ހެންޑަސަން ހޯދުމަށް އަޔެކްސް އިން މަސައްކަތް ކުރަނީ

ސައޫދީ ޕްރޯ ލީގުގެ އަލް އިއްތިފާޤަށް ކުޅެމުން އަންނަ އިންގްލެންޑުގެ މިޑްފީލްޑަރު ޖޯޑަން ހެންޑަސަން ހޯދުމުގެ މަސައްކަތް، އަޔެކްސް އިން ފަށައިފި އެވެ.

ލިވަޕޫލް ދޫކޮށް، ހެންޑަސަން އަލް އިއްތިފާޤަށް ބަދަލުވީ މިދިޔަ އަހަރުގެ ޖުލައި މަހުގެ ތެރޭގަ އެވެ. އޭނާ އެ ކުލަބަށް ބަދަލުވީ 12 މިލިއަން ޕައުންޑުގެ ޑީލެއްގެ ދަށުންނެވެ. އެ ކުލަބަށް އޭނާ ވަނީ މިހާތަނަށް 19 މެޗު ކުޅެދީފަ އެވެ. ނަމަވެސް، ސައޫދީ ޕްރޯ ލީގުގައި އެ ޓީމަށް އެކަށީގެންވާ ނަތީޖާއެއް ނުނެރެވެ އެވެ.

ބޭރުގެ މީޑިއާތަކުގައި ރިޕޯޓުކޮށްފައިވާ ގޮތުން، ހެންޑަސަން ހޯދުމުގެ ޝައުޤުވެރިކަން އަޔެކްސް އިން ގެންގުޅެ އެވެ. އަދި އެ ކުލަބުން މިހާރު އަންނަނީ އެކަމާ ގުޅޭ ގޮތުން އަލް އިއްތިފާޤާ އެކު މަޝްވަރާތައް ކުރިއަށް ގެންދަމުން ކަމަށް ވެސް ވަނީ ބުނެފަ އެވެ. ނަމަވެސް، މިހާތަނަށް ވަކި ގޮތެއް ނިމިފައިނުވާ ކަމަށާއި، ހެންޑަސަން ހޯދޭނެ ކަމުގެ އުންމީދު އަޔެކްސް އަށް ބޮޑު ކަމަަށް ވެސް ބުނެފައިވެ އެވެ.

ސަންޑަލެންޑުން 2008 ވަނަ އަހަރު ސީނިއާ ކެރިއަރު ފެށި ހެންޑަސަން ލިވަޕޫލަށް ބަދަލުވީ 2011 ވަނަ އަހަރު އެވެ. އެ ކުލަބުގައި ހޭދަކުރި މުއްދަތުގެ ތެރޭގައި އޭނާ ވަނީ، 492 މެޗު ކުޅެދީ 33 ލަނޑު ޖަހައިފަ އެވެ. ލިވަޕޫލާ އެކު އޭނާ ވަނީ އަށް ތައްޓެއް ވެސް ކާމިޔާބު ކޮށްފަ އެވެ.