ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވެރިކަމަށް ވަޑައިގެންނެވުމަށް ކުރެެއްވި ރިޔާސީ ކެމްޕެއިނުގައި ގިނަ ވަޢުދުފުޅުތަކެއް ވަނީ ވެވަޑައިގެންފަ އެވެ. މި ވައުދުފުޅުތަކުގެ ތެރޭގައި އެކިއެކި ދާއިރާތަކުން މުހިންމު ވަޢުދުފުޅުތަކެއް ހިމެނެ އެވެ. އޭގެ ތެރޭގައި އެމަނިކުފާނުގެ އެންމެ މުހިންމު އެއް ވަޢުދުފުޅަކީ ދިވެހިރާއްޖޭގެ މިނިވަންކަމާއި، ސިޔާދަތު 'އަލުން އަނބުރާ' ހޯދުމެވެ. ވެރިކަމަށް ވަޑައިގެންނެވުމަށް، ރައްޔިތުންނަށް ގިނަ ހުވަފެންތަކެއް ދެއްކެވި އެވެ. ވެރިކަމަށް ދެ މަސް ދުވަސްވާން ވެފައިވާއިރު، އެއިން އެއްވެސް ކަމެއްގައި ކުލަ ޖެހޭ މަންޒަރެއް ނުފެނެ އެވެ. އެތައް އުންމީދެއް ދައްކައިގެން އައި ސަރުކާރުން، ރައްޔިތުން ނާއުންމީދު ކޮށްލަން ފަށައިފި އެވެ.

ވެރިކަމަށް ވަޑައިގެންނެވުމުގެ ކުރިން، ރިޔާސީ ވަޢުދުފުޅުތަކުގެ ތަފްސީލު ހިމެނޭހެން ބޮޑު ޕްލޭނެއް ވެސް ހެއްދެވި އެވެ. "ހަފުތާ14" ގެ ނަމުގަައި ޚާއްސަ ވެބްސައިޓެއް ހައްދަވައި، ވަޢުދުތައް ފެންނާހެން އެހުރީ އެވެ. ނަމަވެސް، ސަރުކާރުގެ ބަސްމަގު ހުރި ގޮތުން، ހަފުތާ 14ގައި ހިމެނޭ އެންމެ މުހިންމު އެއް ވަޢުދުފުޅު ފުރިހަމަ ނުވާނެ ކަމުގެ ޔަޤީންކަން މިހާރު ލިބިއްޖެ އެވެ. އެވެސް އަދި ވެރިކަމަށް ވަޑައިގެންނެވުމަށް ދެއްކެވި އެންމެ މުހިންމު އެއް ވާހަކަފުޅެވެ.

މިނިވަންކަމާއި ސިޔާދަތުގެ ދަށުން ވެފައިވާ އެންމެ މުހިންމު އެއް ވައުދަކީ، ދިވެހިރާއްޖޭގެ އެކްސްކްލޫސިވް އިކޮނޮމިކް ޒޯން (އީއީޒެޑް)ގެ ތެރެއިން ދެކުނު ކަނޑުގެ ސަރަހައްދުން ބައެއް ގެއްލޭ ގޮތަށް އިންޓަނޭޝަނަލް ޓްރައިބުނަލް ފޮރ ދަ ލޯ އޮފް ދަ ސީ (އިޓްލޮސް) އިން ކޮށްފައިވާ ޙުކުމް އިސްތިޢުނާފުކުރުމެވެ. ކުރީ ސަރުކާރުން ރާއްޖޭގެ ކަނޑުގެ ބައެއް ވިއްކާލިކަމަށް ބުނެ، އެންމެ ގަދަޔަށް އެ ވާހަކަ ދެއްކެވީ މިހާރުގެ ރައީސާއި، އެމަނިކުފާނުގެ ޕާޓީ އާއި އެކްޓިވިސްޓުންނެވެ.

ސަރުކާރުގެ ފުރަތަމަ 100 ދުވަސް ހަމަވާނެ ތާރީޚަކަށް ވާނީ އަންނަ ފެބްރުވަރީ މަހުގެ 25 ވަނަ ދުވަހެވެ. މި މުއްދަތުގައި ސަރުކާރުން ވައުދުވެފައި ވަނީ، އިޓްލޮސް އިން ކޮށްފައިވާ ޙުކުމް އިސްތިއުނާފު ކުރުމެވެ. ނަމަވެސް، ސަރުކާރުގެ ލަވަ އާއި ރާގު ބަދަލުވެއްޖެ އެވެ. މިދިޔަ އާދީއްތަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި، ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، ޢަބްދުﷲ ނާޡިމް އިބްރާހީމް ވިދާޅުވީ، އެ މައްސަލަ އިސްތިއުނާފު ކުރުމުގެ މަސައްކަތް ކުރަމުން އަންނަ ކަމަށެވެ. އެގޮތުން ބޭރުގެ ޕްރޮފެސަރުންގެ އެހީތެރިކަމާއެކު، ހަދަން ޖެހޭ ދިރާސާތައް ހަދަމުން އަންނަ ކަމަށް ވެސް ވިދާޅުވި އެވެ.

ނާޡިމް ވިދާޅުވީ ޕްރޮފެސަރުގެ ރިޕޯޓު ނިންމާލެވޭނީ އަންނަ ފެބްރުވަރީ މަހުގެ ނިޔަލަށް ކަމަށެވެ. ނާޡިމް ވިދާޅުވި ގޮތުން އެއީ މައްސަލަ އިސްތިއުނާފު ކުރުމުގެ ކުރިން، ކުރަން ޖެހޭ ކަމެއް ކަމަށެވެ. އެއާއެކު ނޫސްވެރިޔަކު ދެންނެވި ސުވާލަކީ، ފެބްރުވަރީ މަހުގެ 25 ވަނަ ދުވަހަށް 100 ދުވަސް ހަމަވާއިރު، އެ ވައުދު ފުރިހަމަ ވާނެތޯ ނުވަތަ ނޫންތޯ އެވެ! ނާޡިމް ވިދާޅުވީ އެ ވަޢުދުގެ ސްޓޭޓްމަންޓް އޮތް ގޮތް ބަލާލުން ރަނގަޅު ވާނެ ކަމަށެވެ. އެއާއެކު ވިދާޅުވީ ނާޡިމް އަށް އެނގިވަޑައިގެންފައި އޮތް ގޮތުން، އޭގައި އޮންނާނީ އިސްތިއުނާފު ކުރުމުގެ މަސައްކަތް ފަށާނެ ވާހަކަ ކަަމަށެވެ. ނަމަވެސް، ނޫސްވެރިޔާ ވަނީ ހަފުތާ 14 ގައި އޮތް ގޮތަށް ބުނެފަ އެވެ. އޭގައި އޮތީ އިސްތިއުނާފު ކުރާނެ ކަމަށެވެ.

އިތުރަށް ނާޡިމް ވިދާޅުވީ، އެކަން ކުރިއަށް ދާނީ ކުރިން ވެސް ދެންނެވި ހަމަތަކާއި، އުސޫލުގެ މަތިން ކަމަށެވެ. އެއީ ހަދަން ޖެހޭ ރިޕޯޓުތަކާއި ދިރާސާތައް ހެދުމަށްފަހު ކަމަށް ވިދާޅުވި އެވެ. ނާޡިމް ވިދާޅުވީ ނޫސްވެރިޔާ ބުނަނީ ހިސާބުތައް ދިމާނުވާ ވާހަކަ ކަމަށާއި އެހެންނަމަވެސް، އެކަމުގައި އިތުރު ބަހުސަކަށް ދާން ބޭނުންނުވާ ކަމަށެވެ. އަދި އެކަން ކުރިއަށް ދާނެ ގޮތަކީ އެއީ ކަމަށް ވެސް ވަނީ ވިދާޅުވެފަ އެވެ.

އެހެންކަމުން، ސަރުކާާރުގެ އެންމެ މުހިންމު ވަައުދުފުޅު، ފުރަތަމަ 100 ދުވަހުގެ ތެރޭގައި ނުފުއްދެވޭނެކަން ޔަގީންވެއްޖެ އެވެ. ފެބްރުވަރީ މަހުގެ 25 ވަނަ ދުވަހަށް، ސަރުކާރަށް 100 ދުވަސް ހަމަވާއިރު، އިސްތިއުނާފު ކުރުމުގެ ކުރިން ހަދާ ރިޕޯޓުތައް ނިމޭނީ ފެބްރުވަރީ މަހުގެ ނިޔަލަށް ކަމަށް ސަރުކާރުން ބުނެ އެވެ.