މިއަހަރުގެ ދެވަނަ ޑިވިޝަންގައި ނިއުރޭޑިއަންޓުގެ މެޗެއް ބަލަން އިތުރު އިންތިޒާރެއް ކުރަން ޖެހިއްޖެއެވެ.

ރާއްޖޭގެ ފުޓްބޯޅައިގެ އެންމެ ކާމިޔާބު އަދި ކުރީގެ ގަދަ ބާރު ކަމަށްވާ ނިއުރޭޑިއަންޓް ދެވަނަ ޑިވިޝަންގައި ވާދަކުރަން އޮތް ފުރަތަމަ މެޗު، ވިއްސާރައިގެ ސަބަބުން ފަސްކުރީ ދަނޑަށް ހާޒިރުވި ފަހުންނެވެ. ދަ ގްރާންޑޭއާ ވާދަކުރަން އޮތް އެ މެޗު ފަސްކުރުމުން ނިއުރޭޑިއަންޓަށް ދެން އޮތީ ޓީނޭޖާ ވާދަކުރަން އޮތް ދެވަނަ މެޗެވެ. ދެވަނަ މެޗަށް ނިއުރޭޑިއަންޓް ހާޒިރުވިނަމަވެސް, އިދިކޮޅުން ކުޅެން އޮތް ކްލަބް ޓީނޭ ހާޒިރެއްނުވެއެވެ. އެހެންކަމުން މެޗު ނުކުޅެ ތިން ޕޮއިންޓާއި ފައިދާ ދެ ގޯލް ނިއުއަށް ދިނުމަށްފަހު، މެޗުގެ ނަތީޖާ ކަނޑައެޅީއެވެ. ތިންވަނަ މެޗަކަށް ނިއުރޭޑިއަންޓް ނިކުންނަން ޖެހޭނީ މިމަހުގެ 19 ވަނަ ދުވަހުއެވެ. އެއީ ފަސްކުރި ދަ ގްރާންޑޭ މެޗެވެ. އެހެންކަމުން މުބާރާތުގައި އެންމެ އަވަހަސް ނިއުރޭޑިއަންޓްގެ މެޗެއް ފެނުމުގެ ފުރުސަތު އޮތީ މިމަހުގެ 19 ވަނަ ދުވަހުއެވެ.

ނިއުރޭޑިއަންޓުގެ އިތުރުން ފުރަތަމަ ޑިވިޝަންގެ ޖާގަ އަލުން ހޯދަން މަސައްކަތްކުރަމުން އަންނަ ކުރީގެ ގަދަބާރު ވިކްޓްރީން ވަނީ ދެ މެޗު ކުޅެ, ދެ މެޗުންވެސް ބޮޑު މޮޅެއް ހޯދާފައެވެ. މުބާރާތް ފެށީ މިދިޔަ މަހުގެ 16 ވަނަ ދުވަހުއެވެ. ފުރަތަމަ ދެމެޗަށް ދިމާވި ގޮތުން، ނިއުރޭޑިއަންޓް މެޗެއް ކުޅެން ޖެހޭނީ މުބާރާތް ފެށިތާ 23 ދުވަސް ފަހުންނެވެ.