ސާދިއޯ މާނޭ ކައިވެނިކޮށްފި، ޒުވާން ބައިވެރިޔާއަކީ ކާކު؟

ސެނަގާލް އާއި ސައޫދީ އަރަބިއްޔާގެ އައް ނަސްރުގެ ފޯވަޑް ސާދިއޯ މާނޭ ކައިވެނިކޮށްފި އެވެ.

އުމުރުން 31 އަހަރުގެ ލިވަޕޫލްގެ ކުރީގެ ފޯވަޑް ކައިވެނިކުރީ އޭނާ އަށްވުރެ 13 އަހަރު ހަނގު، އުމުރުން 19 އަހަރުގެ އައިޝާ ތަމްބާއާ އެވެ.

ކައިވެނީގެ ރަސްމިއްޔާތު އޮތީ މިމަހުގެ ހަތް ވަނަ ދުވަހު އެވެ. އެއީ އެފްރިކަން ކަޕް ނޭޝަންސް ކުޅެން ގައުމީ ޓީމާއެކު ފުރުމަށް ސައޫދީ އަރަބިއްޔާގައި ހުރެފައި ސެނަގާލަށް އައިސް މުބާރާތަށް ފުރުމުގެ ކުރިންނެވެ.

ސެނަގާލްގެ ކަމާސާގައި ބޭއްވި ކައިިވެނީގެ ރަސްމިއްޔާތުގައި ބައިވެރިވީ ދެ ފަރާތުގެ އާއިލާގެ މެންބަރުންނާއި ރަހުމަތްތެރިންނާއި މާނޭގެ ގާތް ބައެއް ފުޓްބޯޅަ ކުޅުންތެރިންނެވެ.

ސެނަގާލްގެ ރިޕޯޓްތައް ބުނާ ގޮތުން އައިޝާ ތަމްބާ އަށްވީ 18 ނުވަތަ 19 އަހަރެވެ. އޭނާ އާއި މާނޭ ރައްޓެހިވެގެން އުޅޭތާ ވީދުވަހެއް ބުނަން އެނގޭ އެކަކު ވެސް ނެތެވެ. ނަމަވެސް ސެނަގާލްގެ ގާނޫނުތައް ބުނާގޮތުން މިކަމަށް ހުއްދަ ލިބެނީ އުމުރުން 16 އަހަރުވުމުންނެވެ. މާނޭ އާއި އައިޝާ ފުރަތަމަ ބައްދަލުވީ އޭނާގެ އުމުރުން 13 އަހަރުގައި ކަމަށްވެ އެވެ. އަދި އައިޝާކުރެން ކައިވެންޏަށް އެހުމުގެ ކުރިން އެކަމާ ބެހޭ ގޮތުން މާނޭ ވާހަކަ ދައްކަމުންދިޔައީ އައިޝާގެ ބޭބެއާ ކަމުގައި ވެސް ސެނެގާލްގެ ނޫސްތަކުން ބުނެ އެވެ.

ދެ މީހުންނަކީ ވެސް މުސްލިމުންނެވެ. އައިޝާ ތަމްބާ ސްކޫލްގައި ކިޔަވަން އުޅުނުއިރު އޭނާގެ ބިލްތައް ދެއްކުމާއި ހަރަދުބަރަދު ބެލެހެއްޓީ މާނޭ އެވެ. އަދި އައިޝާގެ އާއިލާގެ ގިނަ ހަރަދުތައް ވެސް ބަލަހައްޓަމުންދިޔައީ އެފްރިކާގެ ކުރީގެ އެންމެ މޮޅު ކުޅުންތެރިޔާ އެވެ. އައިޝާގެ ބައްޕައަކީ އާކިޓެކްޓެކެވެ. ކައިވެނީގެ ރަސްމިއްޔާތުގައި ބޮޑު އަކުރުން ޖަހާފައިވަނީ "ﷲ އަށް ޝުކުރުކުރަން" މިހެންނެވެ.

ރިޕޯޓްތައް ބުނާ ގޮތުން ދެ މީހުންނަކީ ވެސް އެކަހެރި ދިިއުޅުމަކަށް ލޯބިކުރާ ދެ މީހުންނެވެ. އަދި އައިޝާ އަކީ އެއްގޮތަކަށް ވެސް ޝޯޝަލް މީޑިއާގެ ވަސީލަތްތައް ބޭނުންކުރާ މީހެއް ނޫނެވެ.

ކައިވެނީގެ ރަސްމިއްޔާތުގެ ފޮޓޯތައް އާއްމުކޮށްފައިވަނީ ފޮޓޯނެގި މަގްވިޝަން އިވެންޓްސްއިންނެވެ. ފޮޓޯތަކުން ފެންނަނީ ދެ މީހުން އެކަކު އަނެއްގެ އަތުގައި ހިފަހައްޓައިގެން ތިބޭތަނެވެ. އަނެއް ފޮޓޯއިން ފެންނަނީ މާމެލާމެތިން ޒީނަތްތެރިކޮށްފައިވާ ބިތެއްގެ ކުރިމަތީގައި މާނޭގެ ދެމަފިރިން އިށީނދެގެން ތިބި ތަނެވެ. ފަހަތުގައި ޖަހާފައިވަނީ މިިސިޒް މާނޭ އެވެ.

ކައިވެނީގެ ރަސްމިއްޔާތުގައި އައިޝާ ލައިގެން ހުރީ މާމެއިޑް ސްޓައިލްގެ އަތްދިގު ލެސީ ހެދުމެކެވެ. އަދި އަތުގަ އާއި ކަރުގައި ރަން އަޅާފައި ހުއްޓެވެ.

މާނޭ ވަނީ މީގެ ކުރިން އޭނާގެ ހަޔާތުގެ ބައިވެރިޔާގެ ކިބައިގައި ހުންނަން ބޭނުންވާ ސިފަަތަކާމެދު ވާހަކަ ދައްކައިފަ އެވެ. މި ގޮތުން އޭނާ ބުނެފައިވަނީ އަންހެނުން ވާންޖެހޭނީ ސޯޝަލް މީޑިއާގެ ވަސީލަތްތައް ބޭނުން ނުކުރާ މީހަކަށް ކަމަށެވެ. މާނޭ އަކީ މުޅި ދުނިޔެ ދަންނަ މަޝްހޫރު މީހަކަށްވި ނަމަވެސް އޭނާ ވަނީ އައިޝާއާއެކު ގުޅުން ކައިވެންޏާ ހަމައަށް ސިއްރުކޮށްފަ އެވެ.

އޭނާ އަދި ބުނީ ހަޔާުގެ ބައިވެރިޔާ އަކީ އިސްލާމް ދީނަށް ލޯބިކުރާ، ނަމާދުކުރާ މީހަކަށް ވާންޖެހޭނެ ކަމަށެވެ.

މާނޭ އަކީ ސެނެގާލްގައި މަޝްހޫރު އަދި ގަދަރުވެރި މީހެކެވެ. ސަބަބަކީ ދުނިޔޭގެ އެންމެ މުސާރަ ބޮޑު އެއް ކުޅުންތެރިޔާ އަށް އޭނާވި ނަމަވެސް އާދައިގެ ދިރިއުޅުމަކަށް ލޯބި ކުރުމެވެ. އޭނާ ނިސްބަތްވާ ސަހަރައްދުގެ ގިނަ ބަޔަކަށް ގަވާއިދުން އެހީތެރިވަމުންދިއުމެވެ. ހާއްސަކޮށް ބައެއް އާއިލާތަކުގެ ސްކޫލް ހަރަދާއި، ހޮސްޕިޓަލްގެ ބިލްތައް ދެއްކުމާއި ބޭސްފަރުވާ އާއި ދިރިއުޅުމުގެ ފެންވަރު ރަނގަޅު ކުރުމަށް އޭނާ އެހީތެރިވެ އެވެ.