ސެނެގާލް އަކީ 2002 ވަނަ އަހަރުގެ ވޯލްޑް ކަޕުން އޭރުގެ ޗެމްޕިއަން ފްރާންސް ކަޓުވާލުމުގައި އެންމެ މުހިންމު ރޯލެއް އަދާކުރި ޓީމެވެ. މި ޓީމު ގަތަރާ ދެކޮޅަށް މިއަދު ކުޅޭ މެޗަކީ ދެ ވަނަ ބުރަށް ދިއުމަށް ކޮންމެހެން ވެސް މޮޅުވާން މަޖުބޫރު މެޗެކެވެ. ފުރަތަމަ މެޗުގައި ނެދަލޭންޑްސް އަތުން ބަލިވުމުން ދެ ވަނަ ބުރަށް ދިއުމުގެ އަމިއްލަ ބާރު ދެމި އޮންނާނީ މިރޭގެ މެޗުން މަދުވެގެން ޕޮއިންޓެއް ހާސިލްކޮށްގެންނެވެ.

މި މެޗަށް ނުކުންނައިރު ކޯޗު އަލިއޫ ސީސޭ ވަނީ ގޯލްކީޕަރު ބަދަލު ނުކުރަން ނިންމާފައެވެ. ނެދަލޭންޑްސްގެ މެޗުގައި ކީޕަރު އެޑުއާޑޯ މެންޑީ އަށް ގޯސްތަކެއް ހެދުނު ނަމަވެސް އޭނާގެ ގޮވައިގެން މިރޭގެ މެޗަށް ނުކުންނަނީ މެންޑީ އަކީ އެންމެ މެޗަކުން ފުރަތަމަ 11 އިން ބޭރުކުރެވޭ ވަރަށްވުރެ ބޮޑަށް އޭނާގެ ފެންވަރު ސާބިތުކޮށްދީފައިވާ ކީޕަރަކަށްވާތީއެވެ. ކޯޗު ސީސޭ ބުނީ ކޮންމެ ކުޅުންތެރިއަކަށް ވެސް މޮޅަށް ކުޅެވޭ ދުވަސް ދުވަހާއި ގޯސް ހެދޭނެ ވަގުތުތައް އަންނާނެ ކަމަށާއި ފުޓްބޯޅަ ބަލާހިތްވާ އެއްޗަކަށްވަނީ ކުޅުންތެރިން ހަދާ ގޯސްތަކާ އެކުގައި ކަމަށެވެ. އަދި ނެދަލޭންޑްސް މެޗުގައި މެންޑީ ދެއްކީ އޭނާ  ނަގައި ފުރަތަމަ 11 ގައި އެއްލާންޖެހޭ ވަރުގެ ކުޅުމެއްނޫން ކަމަށެވެ.

މި މެޗަށް ނުކުންނައިރު 2002ގެ ފަހުން ވޯލްޑް ކަޕުގައި ބައިކޮޅަށް ގޯލެއް ވަނަނުދީ ސެނެގާލް އަށް މެޗެއް ނިންމާލެވިފައި ނެތެވެ. މިހެންވެ ޓީމުގެ ފަހަތާ މެދު ކުރިއަށްވުރެ ބޮޑަށް ސަމާލުވުމަށް ކޯޗު ވަނީ ކުޅުންތެރިންނަށް އިރުޝާދުދީފައެވެ. ސެނެގާލްގެ އެޓޭކް މައިގަނޑު ގޮތެއްގައި ރާވާފައިވަނީ ވާތް ފަރާތުންނެވެ. މައިގަނޑު ގޮތެއްގައި ކުޅެނީ 4-3-3 ފޯމޭޝަނަށެވެ. ގަތަރުގައި މިވަގުތު ތިބި އެފްރިކާގެ ގައުމުތަކުގެ ތެރެއިން އެބައްރުގެ ރައްޔިތުންގެ އުއްމީދުތައް އެންމެ ބޮޑަށް ގުޅިފައިވާ ޓީމަކީ ވެސް ސެނަގާލްއެވެ. އެމީހުންނަކީ އެފްރިކާގެ ޗެމްޕިއަނުންނެވެ. ސާދިއޯ މާނޭއަށް ނުކުޅެވުނަސް ޓީމުގެ ހުރިހާ ޑިޕާޓްމަންޓެއް ވެސް ވަރުގަދައެވެ.

ސެނަގާލްގެ ކޯޗު ގަބޫލުކުރާ ގޮތުގައި އެމީހުންނަކީ މި ގްރޫޕުގެ ފުރަތަމަ ދެ މެޗުން ޕޮއިންޓެއް ނުލިބި ކަޓައިގެންދާވަރުގެ ޓީމެއް ނޫނެވެ. އަދި މިއީ ސެނަގާލްގެ އެއްވެސް ރައްޔިތަކުން ގަބޫލުކުރާނެ ނަތީޖާއަކަށްނުވާތީވެ ކޯޗު ވެސް ހުރީ ނުތަނަވަސްކަމެއްގައެވެ. ސަބަބަކީ މޭނޭ ނެތޭ ކިޔާފައި ކޮންމެ ކޮންމެ ނަތީޖާއެއް ނެރެގެން އެ ގައުމުގެ ރައްޔިތުން ގަބޫލުނުކުރާނެތީއެވެ.