ބްރެޒިލްގެ ގައުމީ ކޯޗުކަން އެ ގައުމުގެ ސައުޕޯލޯގެ ކޯޗު ޑޮރިވޯލް ޖޫނިއާ އަށް ދޭން ނިންމައިފި އެވެ.
ބްރެޒިލްގެ ފުޓްބޯޅަ ފެޑަރޭޝަނުން މިކަން ގޮތަށް ނިންމިކަން ސައުޕޯލޯއިން ވަނީ ޔަގީންކޮށްދީފަ އެވެ. އެކުލަބުން ނެރުނު ބަޔާނުގައި ބުނެފައިވަނީ މިއީ ޑޮރިވޯލްގެ ހުވަފެން ހަގީގަތަކަށް ހަދަން ފުރުސަތު ލިބުމުން އޭނާ އަށް ދިން ފުރުސަތެއް ކަމަށެވެ.
ބްރެޒިލްގެ ކޯޗުކަން ޑޮރިވޯލް އަށް ދިނުމަށް އޭނާ އަށް މަގާމު އޮފާކުރިކަން އެ ގައުމުގެ ފުޓްބޯޅަ ފެޑަރޭޝަނުން ވެސް ޔަގީންކޮށްދެ އެވެ. ނަމަވެސް އޭނާއަށް ދެނީ ކިތައް އަހަރުގެ ކޮންޓްރެކްޓެއް ކަމެއް ނުބުނެ އެވެ. އޭނާ ވަނީ ކޯޗެއްގެ ގޮތުގައި ކުލަބު ލެވެލްގައި 12 ތަށި ކާމިޔާބުކޮށްފަ އެވެ.
ބްރެޒިލުން ކޯޗުކަމަށް ގެނައުމަށް ފުރަތަމަ މަސައްކަތް ކުރީ ރެއާލް މެޑްރިޑްގެ ކޯޗު ކާލޯ އެންޗެލޯޓީ އެވެ. އޭނާ ރެއާލްގައި 2026ގެ ނިޔަލަށް ހުންނަން ނިންމުމުން ފަހުން ހޯސޭ މޮރީނިއޯ އަށް ވެސް ކޯޗުކަން ހުށަހެޅި އެވެ. ބްރެޒިލަށް 2002 ވަނަ އަހަރުގެ ވޯލްޑްކަޕް ކާމިޔާބުކޮށްދިން ކޯޗު ލުއިސް ފިލިޕޭ ސްކޮލާރީ ވެސް ކޯޗުކަމާ ހަވާލުވާން އެއްބަހެއްނުވި އެވެ.
