ފިހިފަ އޮތް މޫނުގަ ހާދަ ވޭނެއް އަޅައެވެ... ލޯ ކުރިމަތީ އެތައް ކުދިންނެއް މަރުވަނީ ކޮށްދެވެނޭ ކަމެއް ނެތިއެވެ!

މޫނުގެ އެއް ފަޅިއާއި ފައިގެ ބޮޑު ސަރަޙައްދެއް އިންތިހާއަށް ފިހިފައި ވާ ޙާލު، އޭނާގެ ހަށިގަނޑުގައި އަޅަމުންދާ ގަދަފަދަ ވޭނާއެކު މުޅި ދުވަސް، ރީމް ޢަލީ ޖާބިރު ހޭދަ ކުރަމުން ދަނީ ޝުހާދާ އަލް-އަޤްޞާ ހޮސްޕިޓަލުގައެވެ. އެއީ ނިރުބަވެރި ޔަހޫދީންގެ ޤަތުލުޢާންމު ހިންގަމުން ދާ ޣައްޒާގެ މެދު ތެރޭ ސަރަޙައްދުގައި މިއަދު ކިރިއާވެސް ޚިދުމަތެއް ދެވޭ ފެންވަރުގައި ހުރި ހަމަ އެކަނި ހޮސްޕިޓަލެވެ.

ރީމްގެ ޢާއިލާ ދިރިއުޅެމުން ދިޔައީ ބުރެއިޖު ރެފިއުޖީ ކޭމްޕުގައެވެ. އެ ކޭމްޕުގައި 80 ވަރަކަށް ދުވަސް ވީ ފަހުން، ރީމްއަށް މަޖުބޫރުވީ އޭނާގެ ތިމާގެ މީހެއްގެ ގާތަށް ބަދަލު ވާށެވެ. އެހާ ހިސާބުން އޭނާ ބަދަލުވީ ނުސައިރާތު ކޭމްޕަށެވެ. ޔަހޫދީންގެ ޙަމަލާ އަމާޒު ކުރީ އެ ކޭމްޕަށެވެ. ރީމްގެ ޢާއިލާއަށް ހޭލެވުނީ ހަފުސްކޮށްލާފައި އޮތް ކޭމްޕަކަށެވެ. ޒަޚަމްވެފައި ތިބި އެތައް ބަޔަކު ތިބި ކޭމްޕަކަށެވެ.

ރަނގަޅު ފަރުވާއެއް ލިބޭތޯ ރީމް އެތައް މަސައްކަތެއް ކުރިއެވެ. ހަށިގަނޑުގައި އަޅަމުން ދިޔަ ގަދަ ވޭނާ އެކުގައިވެސް އަލް-އަވްދާ ހޮސްޕިޓަލުން ޝުހާދާ އަލް-އަޤްޞާ ހޮސްޕިޓަލަށް ބަދަލުވިއެވެ.

ވޭނީ ދަތުރަކަށް ފަހު ޝުހާދާ އަލް-އަޤްޞާ ހޮސްޕިޓަލަށް ދެވުމަކުން އަދި ރީމްއަކަށް ހަމަޖެހުމެއް ނެތެވެ. އެތަނުން އޭނާއަށް ފެނުނީ ސިހުން ގެނުވަނިވި އެތައް މަންޒަރެކެވެ. ބަލިމީހުންގެ ޢަދަދު ގިނަ ކަމުންނެވެ. ޙާލު ދެރަ މީހުންގެ އިތުރުވަމުން ދާތީއެވެ. އެތައް ދުވަހެއް ވަންދެން، ޚުދު ރީމްވެސް ހޭދަ ކުރީ އިންތިހާ ވޭނާއި ކެކުޅުމުގައެވެ. ފިނިކޮށްލާނެ ފަންކާއެއް ނެތުމުގެ ސަބަބުން، ފިހިފައި ހުރި ތަންތަނުން ނަގަމުން ދިޔަ އިންތިހާ ދިލައިގެ ސަބަބުންނެވެ. އިސާހިތަކު، އެ ތަނުގައި އޮތް އެހެން ބަލި މީހެއްގެ އަތުން، ވަގުތުކޮޅަކަށް ފަންކާއެއް ހޯދާ، ފިނި ވައިޖައްސާލަން ފެށިއެވެ.

ޖިސްމާނީ ވޭނުގެ އިތުރަށް، ނަފްސާނީ އަނިޔާއަކީވެސް މިއަދު ޣައްޒާގެ ރައްޔިތުން ތަޙައްމަލު ކުރަމުންދާ ވޭނެކެވެ. ފަރުވާއެއް ލިބެން ނެތްތާ، ޤަތުލުޢާންމު މަޑުޖައްސާލާނެ ދުވަހެއްވެސް އެނގެނީއެއް ނޫނެވެ.

ޝުހާދާ އަލް-އަޤްޞާ ހޮސްސްޕިޓަލު ތެރޭގައި ހިނގަން އޮންނަ މަގުތަކުގައިވެސް މީހުންނެވެ. ގެދޮރު ގެއްލިފައިވާ އެތައް ސަތޭކަ ބަޔަކާއި، ބަލިމީހުންނެވެ. ހޮސްޕުޓަލުގެ އެމަރޖެންސީ ޑިޕަރޓްމަންޓްގައި ހިލޭ ސާބަހަށް މަސައްކަތް ކުރަމުން ގެންދާ، ޑރ ރަޝީދު ޢަބްދުލްޙާދީ ބުނި ގޮތުގައި، އެ ހޮސްޕިޓަލު މިއަދު އޮޕަރޭޓް ކުރަމުން ދަނީ ޙަޤީޤީ ކެޕޭސިޓީގެ 800 ޕަސެންޓް އިތުރަށް ކަމަށެވެ.

ޑރ ރަޝީދު ފާހަގަ ކުރި ގޮތުގައި އިޒްރޭލުގެ ޢުދުވާންތަކުގައި ހޮސްޕިޓަލުތައް ސުންނާފަތި ކުރަމުން ދިއުމުގެ ސަބަބުން، ޝުހާދާ އަލް-އަޤްޞާ ހޮސްޕިޓަލަށް ގިނަ ޢަދަދެއްގެ ބަޔަކު ބަދަލު ކުރެއެވެ. ގެދޮރު ގެއްލިފައި އެތައް ބަޔަކުވެސް ޖަމާވަނީ ހަމަ އެ ހޮސްޕިޓަލަށެވެ. އެތައް ކުދިންނެއް މި ދުނިޔެއާ ވަކިވެ ދަނީ ލޯ ކުރިމަތީގައެވެ. ކޮށްދެވޭނެ މާ ބޮޑު ކަމެއް ނެތިއެވެ.

ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ) އިން ހާމަ ކުރި ގޮތުގައި، ޣައްޒާގެ ޞިއްޙީ ދާއިރާގައި މިހާރު މަސައްކަތް ކުރަމުން ދަނީ، ޤަތުލުޢާންމުގެ ކުރިން އެ ދާއިރާގައި ޚިދުމަތް ކުރަމުން ދިޔަ މީހުންގެ އެންމެ 30 ޕަސެންޓް މީހުންނެވެ. އަނެއް ބައި މީހުން ވީ ޢުދުވާންތަކުގައި މި ދުނިޔެ ދޫކޮށްފައެވެ. ނުވަތަ ޔަހޫދީންގެ ޖަލުތަކުގައި ޤައިދުކޮށްފައެވެ. ނުވަތަ ގެދޮރު ގެއްލި ރެފިއުޖީންނަށް ވެފައެވެ.

އެވަރުން އަދި ނިމުނީއެއް ނޫނެވެ. ސާފުތާހިރުކަން ކުޑަވުމާއި ބޭހުގެ ދަތިކަން ކުރިމަތިވެފައި އޮތުމުގެ ސަބަބުން، ޒަޚަމްތަކަށް ފަރުވާ ހޯދާ ޕޭޝަންޓުންނާއި، ދާއިމީ ގޮތެއްގައި ޤަވައިދުން ޞިއްޙީ ފަރުވާ ހޯދަން ޖެހޭ ޕޭޝަންޓުންނަށްވެސް އިންތިހާ ތަކުލީފު ވަނީ ޖެހިފައެވެ. އޭގެ ތެރޭގައި ކީމޯތެރަޕީއާއި ޑައެލަސިސް ފަދަ ސީރިއަސް ފަރުވާތައް ހޯދާ ޕޭޝަންޓުން ހިމެނެއެވެ.

އޮކްޓޯބަރ 7 ވަނަ ދުވަހުން ފަށައިގެން ޔަހޫދީން ޣައްޒާގައި ހިންގަމުންދާ ޤަތުލުޢާންމުގައި ފަލަސްޠީނުން މަރުވި މީހުންގެ ޢަދަދު 22000 އަށް ވުރެ މައްޗަށް ވަނީ އަރާފައެވެ. އެއީ 2.3 މިލިއަން މީހުންގެ އާބާދީއެއް އޮތް ޣައްޒާގެ ޖުމުލަ އާބާދީގެ ގާތްގަނޑަށް 1 ޕަސެންޓް މީހުންނެވެ. އިޒްރޭލުގެ ޢުދުވާންތަކަކީ، ނަސްލު ދޮވެލުމަށް ހިންގާ ޤަތުލުޢާންމެކޭ ނުބުނާންވީ އެއްވެސް ސަބަބެއް އެބަ އޮތް ހެއްޔެވެ؟