އިންޑިޔާގެ ސިފައިން މިވަގުތު ރާއްޖޭގައި ތިބީ ދިވެހި ސަރުކާރުގެ ރުހުމުގައި ނުވަތަ ނުރުހުމުގައި ތޯ ކުރެވުނު ސުވާލަށް ސަރުކާރަށް ޖަވާބެއް ނުދެވުނެވެ.

އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އިންޑިޔާ ސިފައިންގެ މައުލޫމާތު ސާފުކުރުމަށް ނޫސްވެރިން ކުރި ސުވާލުތަކަށް މާ އެދެވޭ ޖަވާބެއް ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އަށް ދެއްވިފައެއް ނުވެއެވެ.

ގައުމީ ޖިހާދެއްގެ ގޮތުގައި އެކަން ސިފަކުރައްވަމުން ނާޒިމް ވިދާޅުވީ އެކަމުގައި ކޮޅެއްގައި ޖެހެންދެން އިންޑިޔާ ސިފައިން ރާއްޖެއިން ބޭލުމުގެ މަސައްކަތް ކުރައްވަމުން ގެންދަވާނެ ކަމަށެވެ.

އެއާއެކު، މިހާރު ރާއްޖޭގައި ތިބި އިންޑިޔާގެ ސިފައިން ރާއްޖޭގައި ތިބީ ސަރުކާރުގެ ނުރުހުމުގައިތޯ ސުވާލު ކުރުމުން ނާޒިމް ވިދާޅުވީ މިހާރު ރާއްޖޭގައި ތިބި އިންޑިޔާގެ ސިފައިން، ރާއްޖޭގައި ތިބީ ސަރުކާރުގެ ރުހުމުގައިތޯ ބެލުމަކީ މިއަދުގެ ފޯކަސްއެއް ނޫން ކަމަށެވެ.

ނަމަވެސް އެ މައްސަލައިގައި ފޯކަސް ކުރަންވީ، ގާނޫނީ ހަމަތަކުގެ މަތިން އެ މީހުން މި ގައުމުން ފޮނުވާލުމަށް ކަމަށް ނާޒިމް ވިދާޅުވިއެވެ.

އިންޑިޔާ ސިފައިން ރާއްޖެއިން ފޮނުވާލެވޭނެ ދުވަހެއް ނޭނގޭ ކަމަށް މިރޭ ވެސް ސަރުކާރުން ބުނިއިރު، މިހާރު ރާއްޖޭގައި ތިބި އިންޑިޔާގެ ސިފައިން ތިބީ ސަރުކާރުގެ ރުހުމުގައިކަމެއް ވެސް ސަރުކާރަކަށް ނުބުނެވެއެވެ. އެހެން ނަަމަވެސް ސަރުކާރުން ބުނަމުން އަންނަ ވާހަކައަކީ، އިންޑިޔާ ސިފައިން ރާއްޖެއިން ފޮނުވާލެވޭނެ ކަމަށެވެ.

އަދި އެކަން ކުރެވޭނީ ޑިޕްލޮމެޓިކް އުސޫލުން ގާނޫނީ އިމުގެ ތެރެއިން ކަމަށް އާދިއްތަ ދުވަހުގެ ރޭ ވެސް ސަރުކާރުން ބުނެފައިވެއެވެ.

އެހެން ނަމަވެސް ރައީސް މުއިއްޒު ވެރިކަމަށް ވަޑައިގެންނެވީ އިންޑިޔާގެ ސިފައިން ރާއްޖޭގައި ގާއިމްވެ ތިބުމުގެ ސަބަބުން ރާއްޖޭގެ މިނިވަންކަމަށް ބުރޫ އަރާ ކަމަށް ވިދާޅުވެއެވެ. އެއާއެކު، މި ސަރުކާރަށް މިވީ 50 އެއްހާ ދުވަހުގެ ތެރޭގައި ރާއްޖޭގެ މިނިވަންކަމަށް ބުރޫއެއް ނާރާތޯ ނުވަތަ މިނިވަންކަން ގެއްލުން ނިމުނީތޯ އާންމުން ދަނީ ސުވާލުކުރަމުންނެވެ.