އަޒްމީންގެ ރައްދު: މަގާމުން އިސްތިއުފާއެއް ނުދެން!

ކުލަބު ވެލެންސިއާގެ ޗެއާމަންގެ މަގާމުން އިސްތިއުފާ ދީފައި ނުވާނެ ކަމަށް ބުނެ، އެ ކުލަބުގެ ޗެއާމަން ޢަބްދުﷲ އަޒްމީން ރައްދު ދެއްވައިފި އެވެ.

އަޒްމީންގެ ފަރާތުން އާދީއްތަ ދުވަހުގެ ރޭ ނެރުނު ނޫސް ބަޔާނެއްގައި ވަނީ، އާދީއްތަ ދުވަހު އިލްމާއު ހުސެއިން އިބްރާހިމް (މައު) އަދި ހަސަން ވަހީދު (ދޮނާ) ކޮށްފައިވާ ތުހުމަތުތައް ދޮގު ކޮށްފަ އެވެ.

އެ ބަޔާނުގައި އަޒްމީން ވިދާޅުވީ، ކުލަބު ވެލެންސިއާގެ ހިންގުމުގައި އޭނާ އަމަލީ ގޮތުން ބައިވެރިވާން ފެށީ 2023 ވަނަ އަހަރުގެ މާޗު މަހުގެ ހަތް ވަނަ ދުވަހުން ފެށިގެން ކަމަށެވެ. އެއީ ކުލަބުގެ ޖެނަރަލް ސެކްރެޓަރީގެ ޙައިސިއްޔަތުން ކަމަށް ވެސް ވަނީ ވިދާޅުވެފަ އެވެ. އޭގެ ފަހުން، 2023 ވަނަ އަހަރުގެ ޑިސެމްބަރު މަހުގެ 11 ވަނަ ދުވަހު ކުލަބުގެ ރައީސްކަމަށް އޭނާ އިންތިޚާބުކުރިކަން ވެސް އަޒްމީން ފާހަގަ ކުރެއްވި އެވެ.

ހަމަ އެދުވަހު، ކޮމިޝަނަރ އޮފް ސްޕޯޓްސްގައި ކުލަބުގެ ހިންގާ ކޮމެޓީ ރަޖިސްޓްރީވެގެން އާންމުވި ކަމަށް އަޒްމީން ވަނީ ވިދާޅުވެފަ އެވެ. އޭގެ ފަހުން އޭނާ އިސްތިއުފާ ދިނުމުގެ ގޮތުން ވެލެންސިއާގެ އެއްވެސް ބޯޑު މެމްބަރަކަށް ސިޓީ ފޮނުވާފައި ނުވާނެ ކަމަށް އަޒްމީން ވިދާޅުވި އެވެ.

ވެލެންސިއާގެ ޗެއާމަންކަމުން އަޒްމީން އިސްތިއުފާ ދީފައިވާ ކަމަށް ބުނާ ސިޓީއެއް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ވަގުުތީ ޖެނަރަލް ސެކްރެޓަރީ މުޙައްމަދު ޖައުޝަން ޝަރީފް އަށް ވަނީ ފޮނުވައިފަ އެވެ. ވެލެންސިއާގެ މެއިލް އިން ފޮނުވި އެ ސިޓީ، ފަހުން ވަނީ ޑިލީޓް ކޮށްފަ އެވެ.