ޓޮޓެންހަމް އިން ލޯނަކަށް ޓިމޯ ވާނާގެ ސޮއި ހޯދަނީ

އާރުބީ ލައިޕްޒިގް ކުޅެމުން އަންނަ ޖަރުމަނު ފޯވާޑް ޓިމޯ ވާނާގެ ސޮއި ހޯދަން ޓޮޓެންހަމް އިން ތައްޔާރުވެއްޖެއެވެ.

ޓޮޓެންހަމް އިން ޓިމޯ ވާނާ ގެންދަނީ ލޯނު އެއްބަސްވުމެއްގެ ދަށުންނެވެ. ރިޕޯޓުތައް ބުނާގޮތުން ވާނާ ގެންދަން ކުރަންޖެހޭ މަސައްކަތްތަކަށް ޓޮޓެންހަމް އޮތީ އެއްބަސްވެ, ސޮއި ހޯދުމާ ހަމައިގައެވެ. ލޯނު އެއްބަސްވުމެއްގެ ދަށުން ގެންދިޔަ ނަމަވެސް, ޓޮޓެންހަމް އިން ވާނާ ގެންދަނީ އެއްބަސްވުން ދާއިމީ ކުރުމުގެ ފުރުޞަތު ލިބޭ ގޮތަށެވެ. 27 އަހަރުގެ ފޯވާޑް މިހާރު ހުރީ މެޑިކަލް ފުރިހަމަ ކުރުމަށް ލަންޑަނަށް ދިއުމަށް ތައްޔާރަށެވެ.

ޓިމޯ ވާނާ އަކީ އިނގިރޭސި ލީގުގެ ތަޖުރިބާ ހުރި ކުޅުންތެރިއެކެވެ. އާރުބީ ލައިޕްޒިގަށް ބަދަލުވީ ޗެލްސީން ނެވެ. 2020 ވަނަ އަހަރު އާރުބީ ލައިޕްޒިގުން ޗެލްސީއަށް ބަދަލުވެ, ކުރީގެ މޮޅު ކުޅުން ނުދެކުމުން އެނބުރި ކުރީގެ ކެލަބަށް ބަދަލުވީ އެވެ. ޗެލްސީ އަށް ކުޅުނު 89 މެޗުން ޖެހުނީ 23 ގޯލެވެ. މިސީޒަންގައި ޖަރުމަނުގައި 14 މެޗުން ޖެހުނީ 2 ގޯލެވެ. އޭނާ ވަނީ ގައުމީ ޓީމަށް 57 މެޗު ކުޅެފައެވެ.

ޓިމޯ ވާނާ ކްލަބް ދޫކޮށްލާކަން އާރުބީ ލައިޕްޒިގުން ވެސް ވަނީ ޔަޤީން ކޮށްދީފައެވެ.