ދިވެހިރާއްޖޭގެ ސަރަހައްދުން އިސްރާއީލްއާއި ގުޅުންއޮތް ދެ ތެޔޮ ޓޭންކަރަކަށް ބޮމުގެ ހަމަލާދިން ކަމަށް ބުނާ ޚަބަރު އެމްއެންޑީއެފުން ދޮގު ކޮށްފިއެވެ.
ބައެއް ޚަބަރު ފަތުރާ ވަސީލަތްތަކުގައި ބުނެފައިވަނީ ރާއްޖެ ސަރަހައްދުން ދަތުރުކުރި އިސްރާއީލްއާއި ގުޅުން އޮތް ދެ ތެޔޮ ޓޭންކަރަށް ސޫސައިޑް ޑްރޯން ބޭނުންކޮށްގެން ބޮމުގެ ހަމަލާތަކެއް ދީފައިވާ ކަމަށެވެ.
ރާއްޖެއެމްވީއަށް އެމްއެންޑީއެފުން ބުނީ މިފަދަ ހާދިސާއެއް ރާއްޖޭގެ ކަނޑުގެ ސަރަހައްދުގައި ހިންގާފައިވާ ކަމުގެ އެއްވެސް ރިޕޯޓެއް މިހާތަނަށް ލިބިފައިނުވާ ކަމަށެވެ.
އެމްއެންޑީއެފުން ބުނީ މިހާތަނަށް ބެލިބެލުމުން ބޭރުގެ ޚަބަރުގައިވާ ބަައެއް މައުލޫމާތާއި ފޮޓޯއަކީ މިީގެ ކުރިން ރާއްޖޭގެ ކަނޑުގެ ސަރަހައްދުން ބޭރުން ވަރަށް ދުރުން ހިނގާފައިވާ ހާދިސާތަކުގެ މައުލޫމާތާއި ފޮޓޯކަން އެނގިފައިވާތީއާއި، މިފަދަ ކަމެއް ރާއްޖެއާއި ކައިރިން ހިންގިކަމުގެ އެއްވެސް އިންޑިކޭޝަނެއް ފެންނަން ނެތް ކަމަށެވެ. މައުލޫމާތު ހިއްސާ ކުރާ ސަރަހައްދީ އިދާރާތަކަށްވެސް އެފަދަ ރިޕޯޓެއް ލިބިފައިވާކަމުގެ އެއްވެސް މައުލޫމާތެއް މިހާތަނަށް ލިބިފައިނުވާތީ ރާއްޖޭގެ ކަނޑުގެ ސަރަހައްދެއްގައި ނުވަތަ ކަނޑުގެ ސަރަހައްދާއި ކައިރިން އެފަދަ ހާދިސާއެއް ހިނގިކަމަށް ފަތުރާ ޚަބަރަކީ ސައްހަ ޚަބަރެއްނޫން ކަމަށް ބެލެވޭ ކަމަށް އެމްއެންޑީއެފުން ބުނެއެވެ.
އަދިވެސް މިކަން އިތުރަށް ބަލަމުންދާ ކަމަށް އެމްއެންޑީއެފުން ބުނެއެވެ.
