ފީފާގެ އޮޑިޓަރުން، އެފްއޭއެމުގެ ލިޔުންތައް ބަލަން ޕޮލިހަށް
6 ޖެނުއަރީ 2024 | ހޮނިހިރު 06:29އެފްއޭމުގެ ޚިޔާނާތުގެ މައްސަލަ ތަހުގީގުކުރަން އެންގީ ޕޮލިހުން
އެފްއޭއެމްގެ ރައީސް ބައްސާމް އަދީލް ޖަލީލް (ވ)
ފުޓްބޯޅަ އެސޯސިއޭޝަން އޮފް މޯލްޑިވްސްގެ ވެރިންގެ މައްޗަށް ކުރެވޭ ޚިޔާނާތުގެ ތުހުމަތުތައް ބެލުމަށް، ފީފާގެ އޮޑިޓަރުން ދިވެހި ފުލުންގެއަތުގައި ހުރި، އެފްއޭއެމުގެ ލިޔުންތައް ބަލަން ފަށައިފިއެވެ.
އިތުބާރުހުރި ގޮތަކަށް ކަށަވަރުވެފައިވާ ގޮތުގައި ފީފާގެ އޮޑިޓަރުން ރާއްޖެ އައީ ކޮންމެ އަހަރަކު ކުރަންޖެހޭ އެފްއޭއެމުގެ އޮޑިޓް ފުރިހަމަކުރުމަށެވެ.
އެފްއޭއެމުގެ ލިޔެކިއުންތައް ފުލުހުން ގެންދިޔައީ އެ އިދާރާގެ ވެރިންގެ މައްޗަށް ކުރެވޭ ޚިޔާނާތުގެ ތުހުމަތުތައް ތަހުގީގުކުރުމަށް ޕްރޮސެކިއުޓަރ ޖެނެރަލް އެންގެވުމުން، އެފްއޭއެމަށް ވަދެއެވެ. މިކަން ހިނގީ އޮކްޓޫބަރު މަހުގެ ތެރޭގައެވެ.
އެފްއޭއެމުގެ ޚިޔާނާތުގެ މައްސަލަ ފެންމަތިވެ، ރައީސް ބައްސާމް އަދީލް ޖަލީލަށް ވަނީ އިންތިހާއަށް އާއްމުންގެ ފާޑުކިއުން އަމާޒުވެފައެވެ. އަދި ޚިޔާނާތުގެ ތުހުމަތުގައި އޭނާގެ ޕާސްޕޯޓް ހިފެހެއްޓުމުން މިހާރު ވަނީ އަވަސް އިންތިޚާބަކަށް ގޮވާލާފައެވެ. ނަމަވެސް އިންތިޚާބުގެ ކަންކަން ފޮރުވައިގެން ކުރިއަށް ގެންދާތީ އާއްމުންގެ ފާޑުކިއުން ބޮޑެވެ. އަދި އަސާސީ ގަވާއިދާ ޚިލާފަށް ގިނަ ކަންކަން ކޮށްފައި ވުމާއި، އެކްސްކޯ ބައްދަލުވުންތައް ހަމައެކަނި ވަޓްސްއަފް ގްރޫޕުގައި މަޝްވަރާކޮށްގެން ނިންމާފައިވާތީ، ކަމިޝަނަރ އޮފް ސްޕޯޓްސް ވަނީ ފީފާއާއި އޭއެފްސީގެ ލަފާ ހޯދައި، ވަކި ގޮތެއް އަންގަންދެން އިންތިޚާބު ފަސްކުރަން އަންގާފައެވެ. ނަމަވެސް ކަމިޝަނަރުގެ އެންގުމަށް ބެލުމެއްނެތި، އެފްއޭއެމުން ވަނީ އިންތިޚާބުގެ މަސައްކަތް ކުރިއަށް ގެންދާނެކަމަށް ބުނެފައެވެ.
އެފްއޭއެމުގެ ފައިސާ ހުސްވެ، މުވައްޒަފުންނަށް މުސާރަނުދޭތާ 10 މަސްދުވަސްވެ، މައްސަލަ ބޮޑުވުމުން މިހާރު މުސާރައިގެ ބައެއް ދީފައިވަނީ ފީފާގެ ޚާއްސަ އެންގުމެއްގެ ދަށުން ފޮނުވި ފައިސާއިންނެވެ. އެފްއޭއެމުގެ މައްޗަށް ރާއްޖޭގެ ގިނަ ކުންފުނިތަކުންނާއި، ހޮޓާ ރެސްޓޯރަންޓްތަކާއި، ސްޓެލްކޯއާއި، އަމިއްލަ ކުންފުނިތަކުންވަނީ ޚިދުމަތަށް ފައިސާ ނުލިބިގެން ދައުވާކޮށްފައެވެ. މީގެ ތެރެއިން ބައެއް މައްސަލަތައް ވަނީ ވަގުތުން ފައިސާދީ ޚަލާސްކުރުމަށް ނިންމާފައެވެ.
