ރެކޯޑް އަދަދަކަށް ވޯލްޑްކަޕް ފައިނަލަށް ދިޔަ މާރިޒޯ ޒަގަލޯ މަރުވެއްޖެ

ރެކޯޑް އަދަދެއް ކަމަށްވާ ފަސް ފަހަރު، ވޯލްޑްކަޕް ފައިނަލަށް ދިޔަ ބްރެޒިލްގެ މަޝްހޫރު ކުޅުންތެރިޔާ އަދި ކޯޗު މާރިއޯ ޒަގަލޯ މަރުވެއްޖެއެވެ.

ބްރެޒިލުގެ ފުޓްބޯޅަ ފެޑަރޭޝަނުގެ ރައީސް އެޑްނާލްޑޯ ޑަސިލްވާގެ ނެރުނު ބަޔާނުގައި ބުނެފައިވަނީ، އުމުރުން 92 އަހަރުގެ ޒަގަލޯ މަރުވީ ހޮނިހިރު ދުވަހު ހެނދުނު ކަމަށެވެ.

އޭނާއަކީ ކުޅުންތެރިއެއްގެ ގޮތުގައާއި ކޯޗެއްގެ ގޮތުގައި ވޯލްޑްކަޕް ކާމިޔާބުކުރި ފުރަތަމަ މީހާއެވެ. ބްރެޒިލުގައި އޭނާ މަޝްހޫރުވެފައިވަނީ ކާމިޔާބު ހޯދާ، ކާމިޔާބު ލިބޭ، އަދި ގައުމުގެ ފުޓްބޯޅައިގެ ހުރިހާ ހަރުފަތެއްގައި ހުރި ހަމައެކަނި މީހާގެ ގޮތުގައެވެ. 

ޒަގަލޯގެ ސޯޝަލް މީޑިއާ ޗެނަލްތަކުން އޭނާ ސިފަކޮށްފައިވަނީ އާއިލާއަށް ވަގުތު ދިން ބައްޕައެއް، އާއިލާ ދެކެ ލޯބިވި ކާފައެއް، އޯގާތެރި ބަފާބެއެއް، ތެދުވެރި ރަހުމަތެރިއެއް، އަދި ކާމިޔާބު ޕްރޮފެޝަނަލްއެއްގެ އިތުރުން އެހާމެ ރަނގަޅު މީހެއްގެ ގޮތުގައެވެ. ޒަގަލޯއަކީ 1958އާ 1962ގެ ވޯލްޑްކަޕް ކާމިޔާބުކުރި ބްރެޒިލް ޓީމުގެ ފޯވާޑެވެ. އަދި 1965ގައި ކުޅުން ހުއްޓާލުމަށްފަހު، މަޝްހޫރު ޕެލޭ ހިމެނުނު ޓީމަށް ކޯޗުކޮށްދީ، 1970ގެ ވޯލްޑްކަޕް ހޯދައިދިނެވެ. ޕެލޭ ނެތި 1974ގައި އޭނާގެ ކޯޗުކަމުގައި ބްރެޒިލަށް ލިބުނީ ހަތަރުވަނައެވެ.

އޭނާއަކީ 1994ގެ ވޯލްޑްކަޕް ކާމިޔާބުކުރި ބްރެޒިލް ޓީމުގެ އެސިސްޓެންޓް ކޯޗެވެ. އަދި 1998ގެ ވޯލްޑްކަޕް ފައިނަލްގައި ފްރާންސް އަތުން 3-0ން ބަލިވިއިރު ކޯޗަކީވެސް އޭނާއެވެ. މަޝްހޫރު ރޮނާލްޑޯއަށް ގޮތްނޭނގޭ ކަމެއް ދިމާވެފައި ވަނިކޮށް، ފައިނަލް މެޗަށް އޭނާ ނެރުނީ "ޑޮކްޓަރުން ރޮނާލްޑޯއަށް ކުޅެވޭނެކަމަށް ބުނުމުން،" ކަމަށް ބުނެއެވެ.

2005 ވަނަ އަހަރުގެ ފަހުން ވަރަށް ގާތްގާތުގައި ޒަގަލޯ ހޮސްޕިޓަލުގައި އެޑްމިޓް ކުރަމުންދިޔައެވެ. ނަމަވެސް 2018 އަދި 2022ގެ ވޯލްޑްކަޕަށް ބްރެޒިލްގެ ކޯޗު ޓިޓޭ ޒަގަލޯގެ ގާތުން އިރުޝާދު ހޯދިއެވެ.